ലഹരിപാർട്ടി സംഘർഷം; പോലീസ് സംഘത്തിന് നേരെ ആക്രമണം; വാഹനങ്ങൾ തകർത്തു; ഉദ്യോഗസ്ഥർക്ക് പരിക്ക്

തൃശ്ശൂർ: (KasargodVartha) ലഹരി ഉപയോഗിച്ച് നടന്ന പിറന്നാൾ പാർട്ടിക്കിടെയുണ്ടായ തർക്കങ്ങളെത്തുടർന്ന് സ്ഥലത്തെത്തിയ പോലീസ് സംഘത്തിന് നേരെ ആക്രമണം നടന്നതായി പരാതി. കൊലക്കേസ് പ്രതിയായ ബ്രഹ്മജിത്തിന്റെ നേതൃത്വത്തിലുള്ള സംഘമാണ് ആക്രമണം നടത്തിയതെന്ന് പോലീസ് അറിയിച്ചു. സംഭവത്തിൽ നാല് പോലീസ് ഉദ്യോഗസ്ഥർക്ക് പരിക്കേറ്റു.

ഗ്രേഡ് എസ്.ഐ. ജയൻ, സീനിയർ സി.പി.ഒ. അജു, സി.പി.ഒ.മാരായ ഷനോജ്, ശ്യാം എന്നിവർക്കാണ് പരിക്കേറ്റതെന്നാണ് പ്രാഥമിക വിവരം. ഇന്ന് പുലർച്ചെ മൂന്ന് മണിയോടെ നല്ലേങ്കരയിലാണ് സംഭവം നടന്നത്.

നല്ലേങ്കര സ്വദേശികളായ അൽത്താഫും അഹദും ചേർന്ന് സംഘടിപ്പിച്ച പിറന്നാൾ പാർട്ടിയിൽ ഇവരുടെ സുഹൃത്തുക്കളായ ബ്രഹ്മജിത്ത്, എബിൻ, ആഷ്‌ലിൻ, ഷാർബൽ എന്നിവരും പങ്കെടുത്തിരുന്നു. അൽത്താഫിന്റെ വീടിനടുത്തുള്ള ഒഴിഞ്ഞ പറമ്പിൽ വെച്ച് നടന്ന പാർട്ടിയിൽ സംഘം ലഹരി ഉപയോഗിച്ചതായി പോലീസ് പറയുന്നു. 

പാർട്ടിക്ക് ശേഷം വീട്ടിലേക്ക് മടങ്ങുന്നതുമായി ബന്ധപ്പെട്ടുണ്ടായ തർക്കമാണ് സംഘർഷത്തിൽ കലാശിച്ചതെന്നാണ് പോലീസിന്റെ നിഗമനം. അൽത്താഫിന്റെ വീടിന് സമീപമെത്തിയ സംഘം അവിടെ വെച്ച് ഏറ്റുമുട്ടുകയായിരുന്നു. ഭയന്നുപോയ അൽത്താഫിന്റെ മാതാവ് പോലീസിനെ വിവരമറിയിക്കുകയായിരുന്നു.

വിവരമറിഞ്ഞെത്തിയ പോലീസ് സംഘത്തിന് നേരെ അക്രമിസംഘം വടിവാളുകളും കമ്പിവടികളുമായെത്തി ആക്രമണം നടത്തിയതായി പോലീസ് പരാതിയിൽ പറയുന്നു. മൂന്ന് പോലീസ് ജീപ്പുകൾ സംഘം പൂർണ്ണമായി തകർത്തതായും പോലീസ് വ്യക്തമാക്കി. 

തുടർന്ന് കൂടുതൽ പോലീസ് സേനയെത്തിയാണ് പ്രതികളെ പിടികൂടിയത്. ബ്രഹ്മജിത്ത് കൊലപാതകം ഉൾപ്പെടെ എട്ട് കേസുകളിൽ പ്രതിയാണെന്നും പോലീസ് അറിയിച്ചു. സംഭവത്തിൽ വിശദമായ അന്വേഷണം നടന്നുവരികയാണ്.

ലഹരി ഉപയോഗിച്ചുള്ള പാർട്ടികളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Police officers attacked, vehicles damaged during drug party in Thrissur.

 #Thrissur #PoliceAttack #DrugParty #KeralaCrime #LawAndOrder #DrugAbuse