തിരിച്ചറിയാൻ സഹായിച്ചത് കഴുത്തിലെ പച്ച കുത്തിയത്; മണിപ്പൂർ കലാപത്തിലെ പ്രതി എൻഐഎയുടെ പിടിയിൽ

കണ്ണൂർ: (KasargodVartha) മണിപ്പൂർ കലാപത്തിലെ പ്രധാന പ്രതികളിൽ ഒരാൾ തലശ്ശേരിയിൽ പിടിയിലായി. മെയ്തെയ് വിഭാഗത്തിൽപ്പെട്ട രാജ്കുമാർ മൈപാക് എന്നയാളെയാണ് ഡൽഹിയിൽ നിന്നുള്ള നാഷണൽ ഇൻവെസ്റ്റിഗേഷൻ ഏജൻസി (എൻഐഎ) ഉദ്യോഗസ്ഥർ അറസ്റ്റ് ചെയ്തത്.

ഹോട്ടൽ ജീവനക്കാരനായി ജോലി ചെയ്തുവരികയായിരുന്ന ഇയാളെ ആരോഗ്യ പ്രവർത്തകരുടെ വേഷത്തിലെത്തിയാണ് എൻഐഎ സംഘം പിടികൂടിയത്. കഴിഞ്ഞ മാസമാണ് ഇയാൾ കേരളത്തിലെത്തിയത്. കേരള പോലീസിനെ അറിയിക്കാതെ രഹസ്യമായിട്ടായിരുന്നു എൻഐഎയുടെ ഈ നീക്കം.

മഴക്കാല രോഗങ്ങൾ തടയുന്നതിനുള്ള പരിശോധനയുടെ ഭാഗമായി എത്തിയ ഉദ്യോഗസ്ഥർ തൊഴിലാളികൾ താമസിക്കുന്ന സ്ഥലത്തെ ഓരോ മുറിയിലും കയറി തിരിച്ചറിയൽ കാർഡ് ആവശ്യപ്പെട്ടു. തുടർന്ന്, ആധാർ കാർഡിലെ വിവരങ്ങളും ഫോട്ടോയും ഒത്തുനോക്കിയാണ് രാജ്കുമാറിനെ കസ്റ്റഡിയിലെടുത്തത്. പ്രതിയുടെ കഴുത്തിന് താഴെയായി ചെവിയുടെ ഭാഗത്തുള്ള പ്രത്യേകതരം പച്ചകുത്തൽ ഇയാളെ തിരിച്ചറിയാൻ എൻഐഎയ്ക്ക് സഹായകമായി.

നിരോധിത സംഘടനയായ യുണൈറ്റഡ് നാഷണൽ ലിബറേഷൻ ഫ്രണ്ടി (യുഎൻഎൽഎഫ്) ൽ രാജ്കുമാർ സായുധ പരിശീലനം നേടിയിട്ടുണ്ടെന്നാണ് ലഭിക്കുന്ന വിവരം. ഏതാനും ദിവസങ്ങളായി എൻഐഎ ഇയാളുടെ നീക്കങ്ങൾ നിരീക്ഷിച്ചു വരികയായിരുന്നു.

അറസ്റ്റിലായ രാജ്കുമാറിൽ നിന്ന് വ്യാജ പാസ്പോർട്ട് കണ്ടെടുത്തതായും സൂചനകളുണ്ട്. മണിപ്പൂരിൽ കലാപം വ്യാപകമായതിന് ശേഷം സംസ്ഥാനം വിട്ട പ്രതി, ഹോട്ടലിൽ ഒളിവിൽ കഴിയുകയായിരുന്നു. എൻഐഎ സംഘം ഇയാളെ കൂടുതൽ ചോദ്യം ചെയ്യാനായി കൊണ്ടുപോയി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: A key accused in the Manipur riots, Rajkumar Maipak, belonging to the Meitei community, was arrested by the NIA in Thalassery, Kannur. He was working as a hotel employee and was apprehended by NIA officials disguised as health workers. A distinctive neck tattoo helped identify him. He is reportedly trained by the banned UNLF and was found with a fake passport.

#ManipurRiots, #NIAArrest, #Thalassery, #KeralaNews, #RajkumarMaipak, #UNLF