തെയ്യം കലാകാരൻ ബിജുവിൻ്റെ മരണം കൊലപാതകം: സുഹൃത്ത് അറസ്റ്റിൽ

കാസർകോട്: (KasargodVartha) തെയ്യം കലാകാരനായ ടി. സതീശൻ എന്ന ബിജുവിന്റെ (46) മരണം കൊലപാതകമെന്ന് പോസ്റ്റ്‌മോർട്ടം റിപ്പോർട്ട്. ചന്ദനക്കാട് സ്വദേശിയായ ബിജുവിനെ സുഹൃത്ത് ചിതാനന്ദൻ (32) മദ്യത്തർക്കത്തെ തുടർന്ന് കൊലപ്പെടുത്തിയതാണെന്ന് പോലീസ് കണ്ടെത്തി. കെഎസ്ഇബി കരാർ ജീവനക്കാരനാണ് അറസ്റ്റിലായ ചിതാനന്ദൻ. ആദൂർ ചോമണ്ണ നായികിന്റെ വീട്ടുവരാന്തയിൽ മരിച്ച നിലയിലാണ് ബിജുവിനെ കണ്ടെത്തിയത്.

കൊലപാതകത്തിൻ്റെ ചുരുളഴിയുന്നു

പോലീസ് നൽകുന്ന വിവരമനുസരിച്ച്, തനിച്ച് താമസിക്കുന്ന ചോമണ്ണ നായികിന്റെ വീട്ടിൽ ബിജുവും ചിതാനന്ദനും പതിവായി മദ്യപിക്കാറുണ്ടായിരുന്നു. തിങ്കളാഴ്ച രാവിലെ പത്ത് മണിയോടെ ഇരുവരും ഇവിടെയെത്തി. കർണാടക അതിർത്തിയിൽ നിന്ന് ബിജു രണ്ട് പാക്കറ്റ് ക്വർട്ടർ മദ്യവും ചിതാനന്ദൻ അര ലിറ്റർ വിദേശ മദ്യവും വാങ്ങി. 

ഉച്ചയ്ക്ക് ഒരുമണിയോടെ ചോമണ്ണ നായികിന്റെ വീട്ടിൽ മദ്യപാനം ആരംഭിച്ചു. ചോമണ്ണ നായികിന് അൽപ്പം മദ്യം നൽകിയ ശേഷം ബാക്കി മുഴുവൻ ഇരുവരും കഴിച്ചു. കനത്ത ലഹരിയിലായിരുന്ന ഇവർക്കിടയിൽ, ഒഴിച്ചപ്പോൾ തനിക്ക് മദ്യത്തിന്റെ അളവ് കുറഞ്ഞുപോയെന്ന് പറഞ്ഞ് ബിജു ചിതാനന്ദനുമായി തർക്കത്തിലായി.

നെഞ്ചും കഴുത്തും തകർത്ത് ക്രൂരമായ മരണം

വാക്കുതർക്കം പിന്നീട് അടിപിടിയിലേക്ക് നീണ്ടു. വീടിന്റെ ‘ഇരുത്തിയിൽ’ ഇരിക്കുകയായിരുന്ന ബിജുവിനെ ചിതാനന്ദൻ കാലുകൊണ്ട് ചവിട്ടി നെഞ്ചിൻകൂട്  തകർത്തു. തുടർന്ന് ഒന്നര മീറ്റർ ഉയരമുള്ള ‘ഇരുത്തിയിൽ’ നിന്ന് താഴേക്ക് തള്ളിയിട്ട് കഴുത്ത് ഒടിച്ചു. അബോധാവസ്ഥയിലായ ബിജുവിനെ ചിതാനന്ദൻ തന്നെ താങ്ങിയെടുത്ത് വീട്ടുവരാന്തയിൽ കിടത്തി. വൈകുന്നേരത്തോടെ ചിതാനന്ദൻ വീട്ടിലേക്ക് മടങ്ങി.

പിറ്റേദിവസം രാവിലെ ചിതാനന്ദൻ തിരിച്ചെത്തിയപ്പോഴും ബിജു അതേ സ്ഥലത്ത് കിടക്കുകയായിരുന്നു. ബോധം വീണ്ടുകിട്ടിയപ്പോൾ വേദനയുണ്ടെന്ന് പറഞ്ഞ ബിജുവിന് ചിതാനന്ദൻ മൂവ് പുരട്ടിക്കൊടുക്കുകയും വേദനസംഹാരികൾ വാങ്ങിക്കൊടുക്കുകയും ചെയ്തു. ഇതിനിടെ, സഹോദരി സൗമിനി ബിജുവിനെ ഫോണിൽ വിളിച്ചെങ്കിലും അവ്യക്തമായ മറുപടിയാണ് ലഭിച്ചത്. മദ്യലഹരിയിലായിരിക്കുമെന്നാണ് അവർ കരുതിയത്. പിന്നീട് സഹോദരനെ കാണാത്തതിനെ തുടർന്ന് ചോമണ്ണ നായികിന്റെ വീട്ടിൽ ചെന്ന് നോക്കിയപ്പോഴാണ് ബിജുവിനെ അബോധാവസ്ഥയിൽ കണ്ടെത്തിയത്. സഹോദരി എത്തുന്നതിന് മുൻപ് തന്നെ പ്രതി ചിതാനന്ദൻ അവിടെ നിന്നും മുങ്ങിയിരുന്നു.

അയൽവാസികളുടെ സഹായത്തോടെ ആദൂർ പോലീസിൽ വിവരമറിയിക്കുകയും ബിജുവിനെ കാസർകോട് ജനറൽ ആശുപത്രിയിലെത്തിക്കുകയും ചെയ്തെങ്കിലും അപ്പോഴേക്കും മരണം സംഭവിച്ചിരുന്നു. രണ്ട് ദിവസത്തോളം വേദന സഹിച്ചാണ് യുവാവ് മരിച്ചത്.

പോസ്റ്റ്‌മോർട്ടത്തിൽ തെളിഞ്ഞത് കൊലപാതകം

ആദ്യഘട്ടത്തിൽ ബിജുവിന്റെ ശരീരത്തിൽ പുറമെ പരിക്കുകളൊന്നും കാണാൻ സാധിച്ചിരുന്നില്ല. ചൊവ്വാഴ്ച പുലർച്ചെ ബന്ധുവിന്റെ പരാതിയിൽ ആദൂർ പോലീസ് അസ്വാഭാവിക മരണത്തിന് കേസെടുക്കുകയായിരുന്നു. കാസർകോട് ജനറൽ ആശുപത്രിയിൽ നടത്തിയ പോസ്റ്റ്‌മോർട്ടത്തിലാണ് മരണം കൊലപാതകമാണെന്ന് തെളിഞ്ഞത്. തലയ്ക്ക് ക്ഷതമേൽക്കുകയും കഴുത്ത് ഒടിയുകയും നെഞ്ചിൻകൂട് തകരുകയും ചെയ്തതായി പോസ്റ്റ്‌മോർട്ടം റിപ്പോർട്ടിൽ കണ്ടെത്തി.

ചോമണ്ണ നായികിനെ ചോദ്യം ചെയ്തപ്പോഴാണ് ബിജുവും ചിതാനന്ദനും തമ്മിൽ അടിപിടിയുണ്ടായ വിവരം പോലീസിന് ലഭിച്ചത്. തുടർന്ന് ചിതാനന്ദനെ കസ്റ്റഡിയിലെടുക്കുകയും വ്യാഴാഴ്ച ഉച്ചയോടെ അറസ്റ്റ് രേഖപ്പെടുത്തുകയും ചെയ്തു. ബേക്കൽ ഡിവൈഎസ്പി വി.വി. മനോജ്, ആദൂർ എസ്.ഐമാരായ വിഷ്ണു, വിനോദ് എന്നിവർ ചേർന്നാണ് കേസ് അന്വേഷിച്ചത്. ബിഎൻഎസ് 105 വകുപ്പ് പ്രകാരം മനഃപൂർവമല്ലാത്ത നരഹത്യ കുറ്റം ചുമത്തിയാണ് പ്രതിയെ അറസ്റ്റ് ചെയ്തിരിക്കുന്നത്. ബേഡകം ഇൻസ്പെക്ടർ രാജീവൻ വലിയവളപ്പിലിനാണ് കേസിന്റെ തുടർ അന്വേഷണ ചുമതല.

തെയ്യം കലാകാരൻ ബിജുവിന്റെ ദാരുണമായ മരണം കൊലപാതകമെന്ന് സ്ഥിരീകരിച്ചു! ഈ സംഭവത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: Theyyam artist T. Satheesan (Biju) was murdered by his friend Chithanandan over a liquor dispute in Kasaragod; arrest made after autopsy.

#KasaragodCrime #MurderInvestigation #TheyyamArtist #KeralaCrime #Homicide #Arrested