മുഖംമൂടി മോഷ്ടാക്കൾ വിറപ്പിച്ചു! തളങ്കരയിൽ വീട് കുത്തിത്തുറന്നു, മറ്റൊരു വീട്ടിൽ കവർച്ചാശ്രമം

കാസർകോട്: (KasargodVartha) ഓണാഘോഷത്തിനിടെ കാസർകോട് തളങ്കരയിലും പരിസര പ്രദേശങ്ങളിലും വ്യാപകമായ മോഷണം. മുഖംമൂടി ധരിച്ചെത്തിയ സംഘമാണ് കവർച്ച നടത്തിയത്. തളങ്കര ദീനാർ നഗറിലെ ഗസ്സാലി നഗറിൽ താമസിക്കുന്ന ഖൈറുന്നിസയുടെ വീട്ടിലാണ് പ്രധാനമായും കവർച്ച നടന്നത്.

വീട്ടിൽ നിന്ന് എന്തെല്ലാം സാധനങ്ങളാണ് നഷ്ടപ്പെട്ടതെന്ന് വ്യക്തമല്ല. ഖൈറുന്നിസയുടെ മക്കളും കുടുംബവും വിദേശത്താണ്. അവർ ഒറ്റക്കായതുകൊണ്ട് ഒരു മാസത്തോളമായി വീട് പൂട്ടി ബന്ധുവീട്ടിലാണ് താമസിച്ച് വരുന്നത്. വ്യാഴാഴ്ച രാവിലെ അയൽക്കാരാണ് വീട് തുറന്ന് കിടക്കുന്നത് കണ്ട് വിവരമറിയിച്ചത്. തുടർന്ന് പോലീസും വിരലടയാള വിദഗ്ദ്ധരും സ്ഥലത്തെത്തി പരിശോധന നടത്തി.

ഇതേ സംഘം തായലങ്ങാടി പള്ളം കോപ്പാളത്തെ ബൈത്തുൽ മനാൽ വീട്ടിൽ റഫീഖിന്റെ വീട്ടിലും കവർച്ചാശ്രമം നടത്തി. രാത്രിയിൽ ശബ്ദം കേട്ട് റഫീഖിന്റെ മാതാവ് ഉണർന്ന് മകനെ വിളിച്ചുണർത്തുകയായിരുന്നു. 

ഇരുവരും ജനലിലൂടെ നോക്കിയപ്പോൾ വാളും മറ്റ് ആയുധങ്ങളുമായി മോഷ്ടാക്കളെ കണ്ടു. അവർ അയൽക്കാരെ വിളിച്ചറിയിച്ചതോടെ മൂന്നംഗ സംഘം ഇടറോഡിലൂടെ ഓടി രക്ഷപ്പെട്ടു.

സിസിടിവി ദൃശ്യങ്ങൾ പരിശോധിച്ചതിൽ തൊപ്പിയും മുഖംമൂടിയും ധരിച്ച മൂന്ന് യുവാക്കളാണ് കവർച്ചക്കെത്തിയതെന്ന് വ്യക്തമായിട്ടുണ്ട്. പോലീസ് ഉടൻ തന്നെ സ്ഥലത്തെത്തി പരിശോധന നടത്തി. 

മോഷ്ടാക്കൾക്ക് വേണ്ടി അന്വേഷണം ഊർജിതമാക്കിയതായി പോലീസ് അറിയിച്ചു. വീട്ടിൽ ചെരുപ്പിടാതെ വന്ന മോഷ്ടാക്കൾ വീട്ടിൽ നിന്ന് ചെരുപ്പുകളും മോഷ്ടിച്ചാണ് കടന്നുകളഞ്ഞത്.

ഈ മോഷണത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Masked burglars attempt theft at two houses in Thalangara.

#Kasaragod #Thalangara #Theft #Burglary #Crime #Kerala