തച്ചങ്ങാട് മോഷണക്കേസ് പ്രതി സ്റ്റേഷനിൽ നിന്ന് ചാടിപ്പോയി; മണിക്കൂറുകൾക്കകം പിടിയിൽ

ബേക്കൽ: (KasargodVartha) പള്ളിക്കര കുടുംബശ്രീ സി.ഡി.എസ്. യൂണിറ്റിന്റെ 'മാ കെയർ' കുത്തിത്തുറന്ന് കവർച്ച നടത്തിയ കേസിൽ അറസ്റ്റിലായ, നിരവധി കേസുകളിലെ പ്രതി സ്റ്റേഷനിൽനിന്ന് ചാടിപ്പോയെങ്കിലും മണിക്കൂറുകൾക്കകം പോലീസ് പിടികൂടി.

തച്ചങ്ങാട് ഗവ. ഹൈസ്‌കൂൾ കോമ്പൗണ്ടിനുള്ളിലെ പള്ളിക്കര ഗ്രാമപ്പഞ്ചായത്ത് സി.ഡി.എസ്. യൂണിറ്റ് നടത്തുന്ന മാ കെയറിലാണ് കവർച്ച നടന്നത്. ഈ കേസിൽ ബേക്കൽ പോലീസ് സ്റ്റേഷൻ പരിധിയിലെ പി.കെ. മുഹമ്മദ് സഫ്‌വാനെ (19) വെള്ളിയാഴ്ച രാത്രി എട്ടുമണിയോടെ അറസ്റ്റ് ചെയ്തിരുന്നു. 

കടയുടെ മുൻവശത്തെ ഗ്ലാസ് കാബിൻ കുത്തിത്തുറന്നാണ് മോഷണം നടത്തിയത്. ബോക്‌സിൽ സൂക്ഷിച്ചിരുന്ന 1000 രൂപയും, വിൽപ്പനയ്ക്ക് വെച്ചിരുന്ന ഗ്രോസറി സാധനങ്ങളുമുൾപ്പെടെ ഏകദേശം കാൽ ലക്ഷം രൂപയുടെ നഷ്ടമുണ്ടായെന്ന് സി.ഡി.എസ്. ചെയർപേഴ്സൺ ട്രസീന ധനഞ്ജയൻ നൽകിയ പരാതിയിൽ പറയുന്നു.

തൃക്കണ്ണാട് മലാംകുന്നിൽവെച്ച് എസ്.ഐ. ബാബു പടാച്ചേരിയുടെ നേതൃത്വത്തിലുള്ള സംഘമാണ് സഫ്‌വാനെ അറസ്റ്റ് ചെയ്തത്. സ്‌കൂളിന് സമീപത്തെ സി.സി.ടി.വി. ദൃശ്യങ്ങൾ പരിശോധിച്ചാണ് പ്രതിയെ തിരിച്ചറിഞ്ഞത്. പ്രായപൂർത്തിയാകാത്ത ഒരാളോടൊപ്പം ചേർന്നാണ് പ്രതി കവർച്ച നടത്തിയത്.

സ്റ്റേഷനിൽ എത്തിച്ച് മൊഴിയെടുത്തശേഷം സ്റ്റേഷനകത്ത് ഇരുന്ന സഫ്‌വാൻ, പാറാവുകാരന്റെ കണ്ണുവെട്ടിച്ച് പോലീസ് സ്റ്റേഷനിൽനിന്ന് ഓടി രക്ഷപ്പെടുകയായിരുന്നു. പോലീസുകാർ പിറകെ ഓടിയെങ്കിലും പിടികൂടാനായില്ല. 

പോലീസ് കസ്റ്റഡിയിൽനിന്ന് രക്ഷപ്പെട്ടതിന് മറ്റൊരു കേസ് കൂടി രജിസ്റ്റർ ചെയ്ത പോലീസ്, ഒരു മണിക്കൂർ നീണ്ട തിരച്ചിലിനൊടുവിൽ മലാംകുന്ന് റെയിൽവേ ട്രാക്കിന് സമീപത്തുവെച്ച് സഫ്‌വാനെ വീണ്ടും പിടികൂടുകയായിരുന്നു.

കാസർകോട്ട് എ.ടി.എം. കൗണ്ടർ തകർത്ത് കവർച്ച നടത്താൻ ശ്രമിച്ചതടക്കം ഏഴ് കേസുകളിൽ പ്രതിയാണ് സഫ്‌വാനെന്ന് പോലീസ് അറിയിച്ചു.

പോലീസ് കസ്റ്റഡിയിൽനിന്ന് പ്രതികൾ രക്ഷപ്പെടുന്നത് തടയാൻ എന്തു നടപടികളാണ് സ്വീകരിക്കേണ്ടത്? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Robbery suspect escapes police station, re-arrested within hours in Bekal.

#BekalCrime, #PoliceEscape, #KasaragodNews, #RobberyCase, #KeralaPolice, #CrimeUpdate