ഒഴിഞ്ഞ കെട്ടിടത്തിൽ ഒളിച്ച് താമസിച്ച് ക്ഷേത്ര കവർച്ച; കുപ്രസിദ്ധ കള്ളൻ പിടിയിൽ!

ചന്തേര: (KasargodVartha) പിലിക്കോട് മേൽമട്ടലായി മഹാശിവക്ഷേത്രത്തിൽ നടന്ന കവർച്ചാ കേസിൽ കുപ്രസിദ്ധ മോഷ്ടാവ് അറസ്റ്റിൽ. പയ്യന്നൂർ പോലീസ് സ്റ്റേഷൻ പരിധിയിലെ വിറകൻ രാധാകൃഷ്ണനാണ് (50) ചന്തേര പോലീസിന്റെ പിടിയിലായത്. ബുധനാഴ്ച രാത്രി ഉള്ളാൾ റെയിൽവേ സ്റ്റേഷൻ പരിസരത്ത് വെച്ചാണ് ഇയാളെ പിടികൂടിയത്.

പ്രതിയെ വിശദമായി ചോദ്യം ചെയ്തുവരികയാണ്. ജൂൺ മൂന്നിന് രാത്രിയിലാണ് മേൽമട്ടലായി മഹാശിവക്ഷേത്രത്തിൽ മോഷണം നടന്നത്. ഓഫീസ് മുറിയിൽ സൂക്ഷിച്ചിരുന്ന മൂന്ന് പവൻ തൂക്കമുള്ള വിവിധ രൂപങ്ങൾ, 100 ഗ്രാം വെള്ളി, 40,000 രൂപ, കൂടാതെ ഭണ്ഡാരത്തിൽ നിന്ന് പതിനായിരത്തോളം രൂപ എന്നിവയാണ് കവർച്ച ചെയ്തത്. കവർച്ച നടത്താനായി പ്രതി ക്ഷേത്രത്തിന് തൊട്ടടുത്തുള്ള ഒഴിഞ്ഞ കെട്ടിടത്തിലാണ് തങ്ങിയത്.

കവർച്ച നടന്നതിന്റെ പിറ്റേദിവസം രാവിലെ ശാന്തിക്കാരൻ ക്ഷേത്രത്തിലെത്തിയപ്പോഴാണ് മോഷണ വിവരം അറിഞ്ഞത്. തുടർന്ന് ക്ഷേത്ര ഭാരവാഹികളും ചന്തേര പോലീസും സ്ഥലത്തെത്തി സിസിടിവി ദൃശ്യങ്ങൾ പരിശോധിച്ചു. ഈ ദൃശ്യങ്ങളിൽ നിന്നാണ് കവർച്ചയ്ക്ക് പിന്നിൽ രാധാകൃഷ്ണനാണെന്ന് പോലീസ് തിരിച്ചറിഞ്ഞത്.

ഈ ക്ഷേത്ര കവർച്ചയ്ക്ക് ഏതാനും ആഴ്ചകൾക്ക് മുൻപാണ് രാധാകൃഷ്ണൻ മറ്റൊരു കവർച്ചാ കേസിൽ ജാമ്യത്തിൽ ഇറങ്ങിയത്. ഈ വിവരം അറിഞ്ഞ പോലീസ് ഇയാളെ നിരീക്ഷിച്ച് ജാഗ്രതാ നിർദ്ദേശം നൽകിയിരുന്നു. ഇതിനിടയിലാണ് മേൽമട്ടലായി ക്ഷേത്രത്തിൽ മോഷണം നടന്നത്. 

ചെറുവത്തൂർ ജെ.ടി.എസിന് സമീപമുള്ള ഒരു നിർമ്മാണത്തിലിരിക്കുന്ന കെട്ടിടത്തിൽ ഒരു മാസത്തോളം ഒളിച്ച് താമസിച്ചാണ് ഇയാൾ കവർച്ചയ്ക്ക് പദ്ധതി തയ്യാറാക്കിയതെന്ന് പോലീസ് അന്വേഷണത്തിൽ വ്യക്തമായിട്ടുണ്ട്. ഈ കെട്ടിടത്തിൽ പ്രതിയെ എത്തിച്ച് തെളിവെടുപ്പ് പൂർത്തിയാക്കി.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Notorious thief arrested for robbing Pilicode Melmattalai Mahashiva Temple after hiding in an abandoned building.
 

#TempleRobbery #ThiefArrested #KeralaCrime #ChanderaPolice #Kasargod #Pilicode