Court Intervention | ടാക്‌സി ഡ്രൈവറുടെയും 15 വയസുകാരിയുടെയും മരണം: കൊലപാതക സാധ്യത അന്വേഷിച്ചോ എന്ന് ഹൈകോടതി; കാണാതായ പെൺകുട്ടികളുടെ കേസന്വേഷണത്തിന് മാർഗനിർദേശങ്ങൾ പുറപ്പെടുവിക്കാൻ ആലോചന

കൊച്ചി: (KasargodVartha) കാസർകോട് പൈവളിഗെയിൽ ടാക്‌സി ഡ്രൈവറുടെയും 15 വയസുകാരിയുടെയും മരണത്തിൽ നിർണായക ഇടപെടലുമായി ഹൈകോടതി. കേസിൽ ദുരൂഹതയുണ്ടെന്നും കൊലപാതക സാധ്യത അന്വേഷിച്ചിട്ടുണ്ടോ എന്നും ഹൈകോടതി ആരാഞ്ഞു. പെൺകുട്ടിയെ കാണാതായതുമായി ബന്ധപ്പെട്ട് പൊലീസ് നടപടി സ്വീകരിക്കുന്നില്ലെന്ന് ആരോപിച്ച് അമ്മ നൽകിയ ഹേബിയസ് കോർപ്പസ് ഹർജി പരിഗണിക്കവെ ജസ്റ്റിസ് ദേവൻ രാമചന്ദ്രൻ, ജസ്റ്റിസ് എം ബി സ്നേഹലത എന്നിവരടങ്ങിയ ഡിവിഷൻ ബെഞ്ചാണ് ഈ ചോദ്യം ഉന്നയിച്ചത്. 

മരണകാരണം കൊലപാതകമാണോ ആത്മഹത്യയാണോയെന്ന് പൊലീസ് ഉറപ്പിക്കണമെന്നും ബെഞ്ച് ആവശ്യപ്പെട്ടു. സർക്കാർ കേസിന്റെ അന്വേഷണ പുരോഗതി റിപ്പോർട്ട് കോടതിക്ക് കൈമാറി. റിപ്പോർട്ട് പരിശോധിച്ച ശേഷം, മറുപടി നൽകാൻ ഹർജിക്കാരുടെ അഭിഭാഷകന് കോടതി ഒരാഴ്ച സമയം അനുവദിച്ചു. പോസ്റ്റ്‌മോർട്ടം റിപ്പോർട്ടും കെമിക്കൽ അനാലിസിസ് റിപ്പോർട്ടുകളും ഇതുവരെ ലഭിച്ചിട്ടില്ലെന്നും അടുത്ത തവണ കേസ് പരിഗണിക്കുമ്പോൾ കോടതിക്ക് കൈമാറുമെന്നും ഗവൺമെന്റ് പ്ലീഡർ അറിയിച്ചു. 

പെൺകുട്ടിയെ ഫെബ്രുവരി 11 മുതലാണ് കാണാതായത്. അതേ ദിവസം തന്നെ കുട്ടിയുടെ കുടുംബവുമായി അടുപ്പമുണ്ടായിരുന്ന 41 വയസുകാരനായ ടാക്സി ഡ്രൈവർ പ്രദീപിനെയും കാണാതായിരുന്നു. ഒരു മാസത്തിലധികം കഴിഞ്ഞപ്പോൾ, വീടിന് സമീപം ഇരുവരെയും തൂങ്ങിമരിച്ച നിലയിൽ കണ്ടെത്തുകയായിരുന്നു.

അതേസമയം, കാണാതായ വ്യക്തികളെക്കുറിച്ചുള്ള കേസുകളിൽ, പ്രത്യേകിച്ച് പ്രായപൂർത്തിയാകാത്ത പെൺകുട്ടികൾ ഉൾപ്പെടുന്ന കേസുകളിൽ അന്വേഷണം നടത്തുന്നതിനുള്ള നടപടിക്രമങ്ങൾ വ്യക്തമാക്കുന്ന ഒരു കൂട്ടം മാർഗനിർദേശങ്ങൾ നിലവിലുള്ള സർക്കുലറുകളെ അടിസ്ഥാനമാക്കി പുറപ്പെടുവിക്കാൻ ഉദ്ദേശിക്കുന്നുണ്ടെന്നും കോടതി വാക്കാൽ വ്യക്തമാക്കി. കേസ് അടുത്ത വ്യാഴാഴ്ച (മാർച്ച് 27) വീണ്ടും പരിഗണിക്കും.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

The High Court intervened in the suspicious deaths of a taxi driver and a 15-year-old girl, questioning the possibility of murder and directing further investigation.

#HighCourt #Investigation #MurderPossibility #Kochi #MissingPersons #KeralaNewsNews Categories(separated with coma):