രാഹുലിനെ കാണാൻ സമയം ചോദിച്ചത് ശാരീരിക ബന്ധത്തിനല്ലെന്ന് അതിജീവിത; തലയും വാലുമില്ലാത്ത ചാറ്റുകൾ പുറത്തുവിട്ട് ഫെന്നി നൈനാൻ അപമാനിക്കാൻ ശ്രമിക്കുകയാണെന്നും യുവതി

പത്തനംതിട്ട: (KasargodVartha) രാഹുൽ മാങ്കൂട്ടത്തിലിന്റെ സുഹൃത്ത് ഫെന്നി നൈനാൻ പുറത്തുവിട്ട വാട്സാപ്പ് ചാറ്റുകൾക്ക് മറുപടിയുമായി മൂന്നാമത്തെ കേസിലെ പരാതിക്കാരിയായ അതിജീവിത രംഗത്ത്. തലയും വാലുമില്ലാത്ത ചാറ്റുകൾ പുറത്തുവിട്ട് ഫെന്നി നൈനാൻ തന്നെ അപമാനിക്കാൻ ശ്രമിക്കുകയാണെന്ന് യുവതി ആരോപിച്ചു. മനോരമ ന്യൂസിനോടാണ് അതിജീവിത ഇക്കാര്യങ്ങൾ വെളിപ്പെടുത്തിയത്.

ചാറ്റുകൾക്ക് പിന്നിലെ സത്യാവസ്ഥ

രാഹുലിനെ കാണാൻ താൻ പലവട്ടം അവസരം ചോദിച്ചതായി ഫെന്നി നൈനാൻ പുറത്തുവിട്ട സ്ക്രീൻഷോട്ടുകളിൽ ഉണ്ടായിരുന്നു. എന്നാൽ, രാഹുലിനെ ഒറ്റയ്ക്കു കാണാനല്ല താൻ അവസരം ചോദിച്ചതെന്ന് അതിജീവിത വ്യക്തമാക്കി. ശാരീരിക ബന്ധത്തിനല്ല സമയം ചോദിച്ചത്. രാഹുലിനെതിരെ നിരവധി പരാതികൾ ഉയർന്ന സാഹചര്യത്തിൽ സത്യാവസ്‌ഥ എന്താണെന്ന് അറിയാനും വിശദമായി സംസാരിക്കാനുമാണ് നേരിൽ കാണാൻ ഫെന്നിയോട് സമയം ചോദിച്ചത്. തൻ്റെ ഒപ്പം ഒരു സുഹൃത്ത് ഉണ്ടാകുമെന്ന് ഫെന്നിയെ അറിയിച്ചിരുന്നു. അവരുടെ ഒപ്പവും ആളുകളുണ്ടാകുമെന്ന് ഫെന്നി മറുപടി നൽകിയതായും ചർച്ചയിലൂടെ പ്രശ്ന‌പരിഹാരത്തിനാണ് ശ്രമിച്ചതെന്നും യുവതി പറഞ്ഞു.

പാലക്കാട്ടെ കൂടിക്കാഴ്ചയും വഞ്ചനയും

താൻ പാലക്കാട് പോയത് രാഹുൽ നിർദേശിച്ച പ്രകാരമാണ്. എന്നാൽ അവിടെ എത്തിയ ശേഷം പലതവണ വിളിച്ചിട്ടും രാഹുൽ ഫോൺ എടുത്തില്ല. കൂടെയുള്ളവരാണ് ഫോൺ എടുത്തത്. പാലക്കാട് എത്തിയപ്പോൾ പല സ്‌ഥലങ്ങളിലും കാത്തുനിൽക്കാൻ ആവശ്യപ്പെട്ടെങ്കിലും രാഹുൽ എത്തിയില്ല. തന്നെ വട്ടം കറക്കുകയാണെന്ന് മനസ്സിലായപ്പോഴാണ് എല്ലാം തുറന്നു പറയാൻ തീരുമാനിച്ചതെന്ന് അതിജീവിത പറഞ്ഞു. ചാറ്റിൻ്റെ ചില ഭാഗങ്ങൾ മാത്രം ഫെന്നി പുറത്തുവിട്ടത് തന്നെ അപമാനിക്കാനാണെന്നും യുവതി കൂട്ടിച്ചേർത്തു.

ഫെന്നി നൈനാനെതിരെയും പരാതി

അതിജീവിത അന്വേഷണസംഘത്തിന് നൽകിയ പരാതിയിൽ ഫെന്നി നൈനാന്റെ പേരും ഉൾപ്പെടുത്തിയിട്ടുണ്ട്. ചൂരൽമല മുണ്ടക്കൈ ഫണ്ട് സമാഹരണത്തിനുള്ള ലക്കി ഡ്രോയിലേക്ക് ഫെന്നിയുടെ അക്കൗണ്ടിലേക്കാണ് പണം കൈമാറിയത്. കൂടാതെ, ഫെന്നിയുമായുള്ള സംഭാഷണങ്ങളിൽ പലതവണ ഇയാൾ രാഹുലിനെ പുകഴ്ത്തി സംസാരിച്ചിട്ടുണ്ടെന്നും പരാതിയിൽ പറയുന്നു. പീഡനമുണ്ടായതിനു ശേഷവും രാഹുൽ സന്ദേശങ്ങൾ അയയ്ക്കാറുണ്ടെന്നും നാട്ടിലെത്തിയ ശേഷം പലതവണ നേരിൽ കണ്ട് സംസാരിക്കാൻ ശ്രമിച്ചതായും യുവതിയുടെ പരാതിയിലുണ്ട്.

ഫെന്നിയുടെ പ്രതികരണം

യുവതിയെ അറിയാമെന്നും രാഹുൽ അവരെ പീഡിപ്പിച്ചെന്ന വിവരം അതിശയമായി തോന്നിയെന്നും ഫെന്നി ബുധനാഴ്ച‌ രാത്രി സമൂഹ മാധ്യമങ്ങളിൽ പോസ്‌റ്റ് ചെയ്തിരുന്നു. ഇതിനുപിന്നാലെയാണ് വ്യാഴാഴ്ച രാവിലെ ചാറ്റുകളുടെ സ്ക്രീൻഷോട്ടുകൾ ഫെന്നി പോസ്‌റ്റ് ചെയ്ത‌ത്. പാലക്കാട് എംഎൽഎ ഓഫിസിൽ കാണാമെന്ന് പറഞ്ഞെങ്കിലും വ്യക്‌തിപരമായി സംസാരിക്കാനുണ്ടെന്ന് യുവതി ആവശ്യപ്പെട്ടതായും സ്ക്രീൻഷോട്ടുകളിൽ ഉണ്ടായിരുന്നു. എന്നാൽ ഇതിലൊന്നും താൻ പേടിക്കില്ലെന്നും ആദ്യം തന്നെ തുറന്നു പറഞ്ഞിരുന്നെങ്കിൽ പല പെൺകുട്ടികളും രക്ഷപ്പെട്ടേനെയെന്നും അതിജീവിത വ്യക്തമാക്കി.

സ്വകാര്യ സംഭാഷണങ്ങൾ വളച്ചൊടിച്ച് പ്രചരിപ്പിക്കുന്നത് ജനാധിപത്യ മര്യാദയാണോ? അതിജീവിതയുടെ വെളിപ്പെടുത്തലിൽ നിങ്ങൾ ആരെ വിശ്വസിക്കുന്നു? നിങ്ങളുടെ അഭിപ്രായം കമന്‍റ് ചെയ്യൂ.

Article Summary: Survivor responds to leaked chats by Fenni Ninan regarding Rahul Mamkootathil. She claims she requested a meeting to discuss complaints, not for personal reasons, and alleges she was misled in Palakkad.

#RahulMamkootathil #FenniNinan #KeralaPolitics #SexualHarassmentAllegation #SurvivorStatement #KeralaNews