അമ്മയെ കൊന്ന് ചുട്ടുകരിച്ച മകൻ കൊല്ലൂരിൽ പിടിയിൽ!

കാസർകോട്: (KasargodVartha) ഉറങ്ങിക്കിടന്ന അമ്മയെ തലയ്ക്കടിച്ച് കൊലപ്പെടുത്തിയ ശേഷം ചുട്ടുകരിച്ച മകൻ കൊല്ലൂരിൽവെച്ച് പോലീസ് പിടിയിലായി. വ്യാഴാഴ്ച ഉച്ചയോടെയാണ് പ്രതിയെ കൊല്ലൂരിൽനിന്ന് പിടികൂടിയത്. ഇയാളെ രാത്രിയോടെ കാസർകോട്ടെത്തിക്കും.

മഞ്ചേശ്വരം വോർക്കാടി സ്വദേശിനി ഹിൽഡ മൊന്തേരോ (59) യെ കൊലപ്പെടുത്തിയ കേസിൽ മകൻ മെൽവിൻ മൊന്തേരോ (26) ആണ് പോലീസ് കസ്റ്റഡിയിലായത്. കൊലപാതകത്തിനുശേഷം ഓട്ടോറിക്ഷയിൽ രക്ഷപ്പെട്ട ഇയാൾ, മുമ്പ് ജോലി ചെയ്തിരുന്ന കൊല്ലൂരിലേക്ക് ഒളിവിൽ പോകുകയായിരുന്നു.

ഈ സംഭവത്തിലെ ദൃക്സാക്ഷിയായ ബന്ധു ലോലിറ്റയെയും (30) മെൽവിൻ കഴുത്ത് ഞെരിച്ച് പെട്രോളൊഴിച്ച് തീ കൊളുത്തി കൊല്ലാൻ ശ്രമിച്ചിരുന്നു. ഗുരുതരമായി പൊള്ളലേറ്റ ലോലിറ്റ മംഗളൂരിലെ ആശുപത്രിയിൽ ചികിത്സയിലാണ്. അമ്മയെ കാണാനില്ലെന്ന് പറഞ്ഞ് ഉറങ്ങിക്കിടന്ന ലോലിറ്റയെ വിളിച്ചുണർത്തി വീട്ടിലേക്ക് കൂട്ടിക്കൊണ്ടുപോയ ശേഷമാണ് ഈ ക്രൂരകൃത്യം ചെയ്തത്.

പുലർച്ചെ ഒരു മണിയോടെയാണ് സംഭവം നടന്നതെന്നാണ് വിവരം. വീട്ടിൽ ഹിൽഡയും മെൽവിനും മാത്രമാണ് താമസിച്ചിരുന്നത്. ഹിൽഡയുടെ മറ്റൊരു മകൻ ആൽവിൻ മൊന്തേരോ ഏതാനും ആഴ്ചകൾക്ക് മുമ്പാണ് ജോലിയുമായി ബന്ധപ്പെട്ട് കുവൈറ്റിലേക്ക് പോയത്.

കഞ്ചാവും മദ്യവും സ്ഥിരമായി ഉപയോഗിക്കുന്ന മെൽവിൻ ലഹരിക്ക് അടിമയാണെന്ന് പോലീസ് പറയുന്നു. മദ്യപാനത്തിന്റെ പേരിൽ അമ്മയും മകനും തമ്മിൽ പതിവായി വഴക്കിട്ടിരുന്നു. കൂടാതെ, സ്വത്ത് ആവശ്യപ്പെട്ടും പ്രതി അമ്മയെ ഉപദ്രവിക്കാറുണ്ടായിരുന്നെന്നും റിപ്പോർട്ടുകളുണ്ട്.

കൊലപാതകത്തിന് പിന്നിൽ മറ്റ് കാരണങ്ങളുണ്ടോയെന്നും പോലീസ് അന്വേഷിക്കുന്നുണ്ട്. പ്രതിയെ കാസർകോട്ടെത്തിച്ച് വിശദമായി ചോദ്യം ചെയ്യുന്നതോടെ യഥാർത്ഥ ചിത്രം വ്യക്തമാകുമെന്നാണ് കരുതുന്നത്.

അമ്മയെ മുറിയിൽ വെച്ച് ഏതോ ആയുധം ഉപയോഗിച്ച് ആക്രമിച്ച ശേഷമാണ് വീടിന്റെ പിന്നിലേക്ക് കൊണ്ടുപോയി തീയിട്ടതെന്ന് ഉന്നത പോലീസ് ഉദ്യോഗസ്ഥർ വെളിപ്പെടുത്തി. കിടപ്പുമുറിയിൽ രക്തക്കറ കണ്ടെത്തിയിട്ടുണ്ട്. ബന്ധുവായ ലോലിറ്റയെ കൊല്ലാൻ ശ്രമിച്ചതിന്റെ കാരണം ഇതുവരെ വ്യക്തമല്ല. നിർമ്മാണ തൊഴിലാളിയാണ് പ്രതി മെൽവിൻ.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Son arrested for mother's murder and arson in Kasaragod.

#KasaragodCrime #KeralaNews #MotherMurder #DrugAbuse #KollurArrest #FamilyTragedy