ഹോട്ടലിൽ നിന്നുള്ള ചാട്ടം വിനയായി; ഷൈൻ ടോം ചാക്കോ ലഹരി കേസിൽ അറസ്റ്റിൽ; മയക്കുമരുന്ന് ഇടപാടുകാരുമായി ബന്ധം?

കൊച്ചി: (KasargodVartha) ലഹരി ഉപയോഗവുമായി ബന്ധപ്പെട്ട് നടൻ ഷൈൻ ടോം ചാക്കോയെ പോലീസ് അറസ്റ്റ് ചെയ്തു. മണിക്കൂറുകളോളം നീണ്ട ചോദ്യം ചെയ്യലിന് ശേഷം നോർത്ത് പോലീസ് സ്റ്റേഷനിൽ വെച്ചായിരുന്നു അറസ്റ്റ് രേഖപ്പെടുത്തിയത്. ഷൈനിനെതിരെ എൻ.ഡി.പി.എസ്. നിയമത്തിലെ 27, 29 വകുപ്പുകൾ പ്രകാരമാണ് കേസ് എടുത്തിരിക്കുന്നത്. ഇത് ലഹരി ഉപയോഗത്തിനും ഗൂഢാലോചനയ്ക്കും ഉള്ള കേസാണ്. കുറ്റം തെളിഞ്ഞാൽ ആറ് മാസം മുതൽ ഒരു വർഷം വരെ തടവ് ശിക്ഷ ലഭിക്കാൻ സാധ്യതയുണ്ട്.

ലഹരിമരുന്ന് ഇടപാടുകാരനായ സജീറിനെ അറിയാമെന്ന് ഷൈൻ ചോദ്യം ചെയ്യലിൽ സമ്മതിച്ചതായാണ് വിവരം. നടൻ്റെ ഫോണിൽ നിന്ന് ലഹരിമരുന്ന് ഇടപാടുകാരുമായുള്ള ബന്ധത്തെക്കുറിച്ച് സൂചന ലഭിച്ചതായും പോലീസ് അറിയിച്ചു. ഷൈനിൻ്റെ മൊഴികളിൽ വൈരുദ്ധ്യങ്ങളുണ്ടെന്നും പോലീസ് വൃത്തങ്ങൾ സൂചിപ്പിച്ചു. 

ഡാൻസാഫ് സംഘം അന്വേഷിച്ചെത്തിയ ഇടനിലക്കാരൻ സജീറിനെ അറിയാമെന്ന ഷൈനിൻ്റെ മൊഴി ഇതിന് ഉദാഹരണമാണ്. നടൻ്റെ ഗൂഗിൾ പേ രേഖകളും വാട്‌സാപ്പ് ചാറ്റുകളും പോലീസ് പരിശോധിച്ചിട്ടുണ്ട്. ഫോൺ രേഖകൾ പരിശോധിച്ചതും കേസിൽ നിർണായകമായി. ലഹരി ഇടപാടുകാരനെ ഫോൺ വിളിച്ചത് എന്തിനെന്ന് വിശദീകരിക്കാൻ ഷൈനിന് സാധിച്ചില്ലെന്നും പോലീസ് വ്യക്തമാക്കി.

അറസ്റ്റിന് ശേഷം ഷൈനിനെ എറണാകുളം ജില്ലാ ആശുപത്രിയിൽ വൈദ്യപരിശോധനയ്ക്ക് വിധേയനാക്കും. രക്തം, മുടി, നഖം എന്നിവയുടെ സാമ്പിളുകൾ ശേഖരിച്ച് ലഹരി ഉപയോഗം സ്ഥിരീകരിക്കും. ലഹരി ഉപയോഗിച്ചിട്ടുണ്ടെങ്കിൽ നാല് ദിവസം വരെ സാമ്പിളിൽ നിന്ന് കണ്ടെത്താൻ സാധിക്കുമെന്നാണ് പോലീസ് പറയുന്നത്.

ശനിയാഴ്ച രാവിലെ പത്തോടെയാണ് ചോദ്യം ചെയ്യലിനായി ഷൈൻ എറണാകുളം നോർത്ത് പോലീസ് സ്റ്റേഷനിൽ ഹാജരായത്. സിറ്റി പോലീസ് ഡാൻസാഫ് സംഘം ഹോട്ടലിൽ പരിശോധനയ്ക്ക് എത്തിയതറിഞ്ഞ് ഷൈൻ ടോം ചാക്കോ കൊച്ചിയിലെ സ്വകാര്യ ഹോട്ടലിൻ്റെ മൂന്നാം നിലയിൽ നിന്ന് സാഹസികമായി രക്ഷപ്പെടാൻ ശ്രമിച്ചത് വലിയ വിവാദമായിരുന്നു. തന്നെ അപായപ്പെടുത്താൻ വരുന്നവരാണെന്ന് സംശയിച്ചതിനാലാണ് ഓടി രക്ഷപ്പെട്ടതെന്നായിരുന്നു ഷൈനിൻ്റെ വിശദീകരണം. അതേസമയം, നടനെ സ്റ്റേഷൻ ജാമ്യത്തിൽ വിട്ടയച്ചേക്കും എന്ന് സൂചനകളുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Actor Shine Tom Chacko has been arrested for involvement in a drug-related case, with evidence linking him to drug dealers.

#ShineTomChacko, #DrugCase, #KochiNews, #ActorArrested, #KeralaNews, #BreakingNews