ഭാസ്കര കാരണവർ വധക്കേസ്: ഷെറിൻ ഉടൻ ജയിൽ മോചിതയാകും; ഉത്തരവ് കണ്ണൂർ വനിതാ ജയിലിലെത്തി

കണ്ണൂർ: (KasargodVartha) ഏറെ കോളിളക്കം സൃഷ്ടിച്ച ഭാസ്കര കാരണവർ വധക്കേസിലെ പ്രതിയായ ഷെറിൻ ഉടൻ ജയിൽ മോചിതയാകും. ഇവരുടെ ജയിൽ മോചനത്തിനുള്ള ഉത്തരവ് കണ്ണൂർ വനിതാ ജയിലിലെത്തി. നിലവിൽ പരോളിൽ കഴിയുന്ന ഷെറിൻ, ജൂലൈ 24-നകം ജയിലിൽ ഹാജരായാൽ മോചിതയാകുമെന്നാണ് വിവരം. ആഭ്യന്തര വകുപ്പ് അതിവേഗമാണ് നടപടികൾ പൂർത്തിയാക്കിയത്.

ഷെറിൻ അടക്കമുള്ള പതിനൊന്ന് തടവുകാരുടെ ശിക്ഷാ ഇളവിനായുള്ള സർക്കാർ ശുപാർശ ഗവർണർ അംഗീകരിച്ചതോടെയാണ് ഷെറിന്റെ മോചനത്തിന് വഴി തെളിഞ്ഞത്. നേരത്തെ ഷെറിന് തുടർച്ചയായി പരോൾ ലഭിച്ചത് വിവാദമായിരുന്നു. 
 

ഇതിനിടെ, ജയിലിൽ വെച്ച് നൈജീരിയക്കാരിയായ സഹതടവുകാരിയെ മർദ്ദിച്ചതിന് ഷെറിനെതിരെ കേസെടുക്കുകയും ചെയ്തു. ഇതോടെ രാജ്ഭവൻ ഇടപെടുകയും ഷെറിന്റെ മോചനം സംബന്ധിച്ച തീരുമാനം സർക്കാർ താൽക്കാലികമായി മരവിപ്പിക്കുകയും ചെയ്തിരുന്നു.

തുടർന്ന്, ഗവർണർ ഓരോ തടവുകാരുടേയും കുറ്റകൃത്യം, ശിക്ഷാകാലാവധി, പരോൾ വിവരങ്ങൾ, ജയിലിലെ പെരുമാറ്റം തുടങ്ങിയ വിശദാംശങ്ങൾ അടങ്ങിയ ഫോറം സർക്കാരിന് സമർപ്പിക്കാൻ ആവശ്യപ്പെട്ടു. ഈ ഫോറം പൂരിപ്പിച്ച് സർക്കാർ വീണ്ടും ശുപാർശ സമർപ്പിച്ചതിനെ തുടർന്നാണ് ഗവർണർ മോചനത്തിന് അംഗീകാരം നൽകിയത്.
 

പതിനാല് വർഷത്തെ ശിക്ഷാകാലയളവിനുള്ളിൽ അഞ്ഞൂറ് ദിവസത്തോളം ഷെറിന് പരോൾ ലഭിച്ചിട്ടുണ്ട്. തിരഞ്ഞെടുപ്പ് പെരുമാറ്റച്ചട്ടം നിലനിന്നപ്പോഴും ഷെറിന് രണ്ട് തവണയായി 60 ദിവസത്തെ പരോൾ ലഭിച്ചത് ഏറെ ചർച്ചയായിരുന്നു. ജയിലിലെ നല്ല നടപ്പ് പരിഗണിച്ചാണ് ഷെറിന് ശിക്ഷാ ഇളവ് നൽകാൻ ജയിൽ ഉപദേശക സമിതി ശുപാർശ ചെയ്തത്.

2009 നവംബർ ഏഴിനാണ് ഭാസ്‌കര കാരണവരെ ഷെറിൻ കൊലപ്പെടുത്തിയത്. സാമ്പത്തിക ബുദ്ധിമുട്ടുകളും ഭർത്തൃപിതാവുമായുള്ള പ്രശ്നങ്ങളുമാണ് കൊലപാതകത്തിലേക്ക് നയിച്ചത്. 2010 ജൂൺ 11-ന് മാവേലിക്കര അതിവേഗ കോടതി ഷെറിനെ ശിക്ഷിച്ചു. 
 

പൂജപ്പുര, നെയ്യാറ്റിൻകര, വിയ്യൂർ ജയിലുകളിലായി ഷെറിൻ ശിക്ഷ അനുഭവിച്ചു. ജയിലിൽ മൊബൈൽ ഫോൺ ഉപയോഗിച്ചത്, ഉദ്യോഗസ്ഥരെ ഭീഷണിപ്പെടുത്തിയത്, സഹതടവുകാരിയെ മർദ്ദിച്ചത് തുടങ്ങിയ നിരവധി വിവാദങ്ങളും ഷെറിന്റെ പേരിൽ ഉയർന്നിട്ടുണ്ട്. ഭരണതലത്തിലെ ചില സ്വാധീനങ്ങളാണ് ഷെറിന്റെ ജയിൽ മോചനത്തിന് വഴിയൊരുക്കിയതെന്ന ആരോപണവും നിലവിലുണ്ട്.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കൂ.
 

Article Summary: Sherin, accused in Bhaskara Karanavar murder case, to be released soon.
 

#SherinRelease #KaranavarMurderCase #KeralaCrime #PrisonRelease #KannurJail #KeralaNews