നായ 'ലാര' മണം പിടിച്ച് ഒരു കിലോമീറ്റർ ഓടി; സിഗ്നൽ കേബിൾ മുറിച്ച മോഷ്ടാവ് കാഞ്ഞങ്ങാട് പിടിയിൽ

കാസർകോട്: (KasargodVartha) കാഞ്ഞങ്ങാട്–നീലേശ്വരം റെയിൽവേ സെക്ഷനിൽ സിഗ്നൽ കേബിൾ മുറിച്ച സംഭവത്തിൽ റെയിൽവേ പ്രൊട്ടക്ഷൻ ഫോഴ്സ് ഒരു യുവാവിനെ അറസ്റ്റ് ചെയ്തു. ശനിയാഴ്ച രാത്രി 11.40-ഓടെ സിഗ്നലിംഗിൽ തകരാറുണ്ടെന്ന് റെയിൽവേ അധികൃതരുടെ ശ്രദ്ധയിൽപ്പെട്ടതിനെ തുടർന്ന് നടത്തിയ അന്വേഷണത്തിലാണ് പ്രതിയെ പിടികൂടിയതെന്ന് അധികൃതർ അറിയിച്ചു.

അന്വേഷണത്തിന്റെ ഭാഗമായി ആർപിഎഫ് സ്വാഡിലെ ട്രാക്കർ നായയായ ‘ലാര’യെ കോഴിക്കോട് നിന്ന് സ്ഥലത്ത് എത്തിച്ചിരുന്നു. സ്ഥലത്ത് പരിശോധന നടത്തിയപ്പോൾ ലാര മണം പിടിച്ച് ഒരു കിലോമീറ്റർ അകലെയുള്ള പ്രതിയുടെ താമസസ്ഥലത്തേക്ക് ആർപിഎഫ് സംഘത്തെ നയിച്ചു. തുടർന്ന് നടത്തിയ അന്വേഷണത്തിലാണ് സ്റ്റീഫൻ കുട്ടിയെ (22) പിടികൂടിയത്. ചോദ്യം ചെയ്യലിൽ ഇയാൾ കുറ്റം സമ്മതിച്ചു.

സിഗ്നൽ കേബിളിലെ ചെമ്പ് വയർ മോഷ്ടിക്കാനായിരുന്നു ശ്രമമെന്ന് ഇയാൾ മൊഴി നൽകി. കേബിൾ മുറിച്ചെങ്കിലും വയർ പൂർണ്ണമായി പിരിച്ചെടുക്കാൻ കഴിയാഞ്ഞതിനെ തുടർന്ന് ശ്രമം ഉപേക്ഷിച്ച് സ്ഥലം വിട്ടെന്ന് റെയിൽവേ അധികൃതർ പറഞ്ഞു.

ട്രെയിൻ സർവീസിനെ ബാധിക്കുന്ന അതീവ ഗുരുതരമായ കുറ്റകൃത്യമാണിത്. സിഗ്നൽ ഉപകരണങ്ങളിൽ തകരാർ വരുത്തിയതിനും അനധികൃതമായി പാളങ്ങളിലേക്കു കടന്നതിനും പ്രതിക്കെതിരെ റെയിൽവേ ആക്ട് സെക്ഷൻ 174 (സി), 147 എന്നീ വകുപ്പുകൾ പ്രകാരം കേസ് എടുത്തിട്ടുണ്ട്. കുറ്റം തെളിഞ്ഞാൽ രണ്ടുവർഷം വരെ തടവും പിഴയും ലഭിക്കാം.

പ്രതിയെ കണ്ടെത്തുന്നതിലും ട്രെയിൻ ഗതാഗതത്തിന്റെ സുരക്ഷ ഉറപ്പാക്കുന്നതിലും ആർപിഎഫ് സംഘത്തിന്റെയും ട്രാക്കർ നായ ലാരയുടെയും ഇടപെടൽ നിർണായകമായിരുന്നുവെന്ന് പാലക്കാട് ഡിവിഷൻ റെയിൽവേ അധികൃതർ അറിയിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: RPF tracker dog Lara runs one km to help arrest a man who cut a railway signal cable in Kanhangad for copper wire theft.

#Kanhangad #RPFDog #Lara #SignalCableTheft #KeralaCrime #RailwaySafety