കാസര്‍കോട്ടും എ ടി എം കവര്‍ച്ചാ ശ്രമം; പോലീസ് കേസെടുത്ത് അന്വേഷണം തുടങ്ങി

കാസര്‍കോട്: (www.kasargodvartha.com 28.12.2018) കാസര്‍കോട്ടും എ ടി എം കവര്‍ച്ചാ ശ്രമം. കാസര്‍കോട് റെയില്‍വേ സ്റ്റേഷനോട് ചേര്‍ന്നുള്ള എസ് ബി ഐയുടെ എ ടി എം കൗണ്ടറിലാണ് കവര്‍ച്ചാ ശ്രമം നടന്നത്. മെഷീനിന്റെ പൂട്ട് തകര്‍ത്തിരുന്നു. രാവിലെ 10 മണിയോടെയാണ് സംഭവം പുറത്തറിഞ്ഞത്. വിവരമറിഞ്ഞ് കാസര്‍കോട് ടൗണ്‍ പോലീസ് സ്ഥലത്തെത്തി പ്രഥമിക അന്വേഷണം നടത്തി.

എസ് ബി ഐ ബാങ്ക് മാനേജര്‍ ശ്രീനാഥിന്റെ പരാതിയില്‍ പോലീസ് കേസെടുത്ത് അന്വേഷണം ആരംഭിച്ചു. നേരത്തേ എറണാകുളം, കോട്ടയം, തൃശൂര്‍ തുടങ്ങിയ ജില്ലകളില്‍ തുടര്‍ച്ചയായുണ്ടായ എ ടി എം കവര്‍ച്ചകളും, കവര്‍ച്ചാശ്രമങ്ങളും കേരളത്തെ ഞെട്ടിച്ചിരുന്നു. ഉത്തരേന്ത്യക്കാരായ പ്രതികളെ പോലീസ് സാഹസീകമായി അറസ്റ്റ് ചെയ്തതോടെയാണ് കവര്‍ച്ചയ്ക്ക് ശമനമുണ്ടായത്.

ഇതിനിടയിലാണ് കാസര്‍കോട്ട് എ ടി എം കവര്‍ച്ചാ ശ്രമം നടന്നിരിക്കുന്നത്. വിലടയാള വിദഗ്ദ്ധര്‍ സ്ഥലത്തെത്തി പരിശോധന നടത്തി. ഇതിന് ശേഷം എ ടി എം കൗണ്ടറിലെ സി സി ടി വി പരിശോധിക്കുമെന്ന് എസ് ഐ അജിത്ത് കുമാര്‍ കാസര്‍കോട് വാര്‍ത്തയോട് പറഞ്ഞു.

WATCH VIDEO