വിശ്വസിച്ചവർക്ക് തിരിച്ചടി: റെയിൽവേ സ്റ്റേഷനിൽ മോഷണം നടത്തിയ റെയിൽവേ ജീവനക്കാരൻ അറസ്റ്റിൽ!

കാസർകോട്: (KasargodVartha) റെയിൽവേ സ്റ്റേഷനിൽ യാത്രക്കാരന്റെ പണവും രേഖകളും ബാഗുകളുമടക്കം മോഷ്ടിച്ച റെയിൽവേ ജീവനക്കാരൻ പിടിയിലായി. റെയിൽവേ ട്രാക്ക് മാനായ സുബോധ് കുമാറാണ് റെയിൽവേ പോലീസിന്റെ വലയിലായത്. നെല്ലിക്കുന്ന് സ്വദേശി അശോക് ഷെട്ടി (48) യുടെ പണവും സാധനങ്ങളുമാണ് ഇയാൾ കവർന്നത്.

ഈ മാസം 18-ന് കാസർകോട് റെയിൽവേ സ്റ്റേഷനിൽ വെച്ചാണ് സംഭവം. ചണ്ഡീഗഡിൽ നിന്ന് കൊച്ചുവേളിയിലേക്ക് പോവുകയായിരുന്ന ട്രെയിനിലെ യാത്രക്കാരനായിരുന്നു അശോക്. വെള്ളിയാഴ്ച പുലർച്ചെ രണ്ട് മണിയോടെ കാസർകോട് സ്റ്റേഷനിൽ ഇറങ്ങിയതിന് തൊട്ടുപിന്നാലെയാണ് മോഷണം നടന്നത്. 

5900 രൂപയും ആധാർ കാർഡും ഡ്രൈവിങ് ലൈസൻസും അടങ്ങിയ പേഴ്സും, 2500 രൂപ വിലമതിക്കുന്ന പലവ്യഞ്ജന സാധനങ്ങളടങ്ങിയ ബാഗും, ഒരു ഷോൾഡർ ബാഗും പ്ലാറ്റ്‌ഫോമിൽ വെച്ച ഉടൻ ട്രാക്ക് മാൻ മോഷ്ടിക്കുകയായിരുന്നു.

മോഷണം നടന്നയുടൻ അശോക് കാസർകോട് റെയിൽവേ പോലീസിൽ പരാതി നൽകി. പ്ലാറ്റ്‌ഫോമിലെ സിസിടിവി ദൃശ്യങ്ങൾ പരിശോധിച്ചാണ് പ്രതിയെ തിരിച്ചറിഞ്ഞത്. കാസർകോട് റെയിൽവേ പോലീസ് സ്റ്റേഷൻ എസ്.എച്ച്.ഒ രജികുമാറിന്റെ നേതൃത്വത്തിൽ എസ്.ഐ എം.വി. പ്രകാശൻ, ഇന്റലിജൻസ് ഉദ്യോഗസ്ഥൻ ജ്യോതിഷ്, സി.പി.ഒ അശ്വിൻ ഭാസ്കർ എന്നിവരടങ്ങിയ സംഘമാണ് തിങ്കളാഴ്ച പ്രതിയെ പിടികൂടിയത്. പ്രതിയെ ഹൊസ്ദുർഗ് കോടതിയിൽ ഹാജരാക്കി റിമാൻഡ് ചെയ്തു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Railway employee arrested for theft at Kasaragod railway station.

#Kasaragod #RailwayTheft #KeralaNews #Arrest #RailwayPolice #CrimeNews