രാഹുൽ മാങ്കൂട്ടത്തിലിനെതിരായ രണ്ടാമത്തെ ലൈംഗികാതിക്രമ കേസിൽ മുൻകൂർ ജാമ്യം

തിരുവനന്തപുരം: (KasargodVartha) പാലക്കാട് എംഎൽഎ രാഹുൽ മാങ്കൂട്ടത്തിലിനെതിരായ രണ്ടാമത്തെ ലൈംഗികാതിക്രമ കേസിൽ തിരുവനന്തപുരം പ്രിൻസിപ്പൽ സെഷൻസ് കോടതി ഉപാധികളോടെ മുൻകൂർ ജാമ്യം അനുവദിച്ച് ഉത്തരവ് പുറപ്പെടുവിച്ചു. വിശദമായ വാദം കേട്ട് മൂന്ന് ദിവസം കഴിഞ്ഞാണ് കോടതിയുടെ ഈ വിധി വന്നിരിക്കുന്നത്. ജാമ്യത്തിനുള്ള പ്രധാന ഉപാധികൾ പ്രകാരം എല്ലാ തിങ്കളാഴ്ചയും രാവിലെ 10നും 11നും ഇടക്ക് അന്വേഷണ ഉദ്യോഗസ്ഥയ്ക്ക് മുന്നിൽ എത്തി രാഹുൽ മാങ്കൂട്ടത്തിൽ ഒപ്പിടണം. കൂടാതെ, രാഹുലിനെ അറസ്റ്റ് ചെയ്താൽ ജാമ്യത്തിൽ വിടണം എന്നും ഉത്തരവിൽ പറയുന്നു.

അതിനിടെ, രാഹുൽ മാങ്കൂട്ടത്തിനെതിരെ പോലീസ് കൂടുതൽ വകുപ്പുകള്‍ ചുമത്തുകയും ചെയ്തിട്ടുണ്ട്. പിന്തുടർന്ന് ശല്യപ്പെടുത്തുക, തടഞ്ഞുവയ്ക്കുക, അതിക്രമിച്ചു കയറുക എന്നീ വകുപ്പുകളാണ് രാഹുലിനെതിരെ പുതുതായി ചുമത്തിയിരിക്കുന്നത്. 23കാരിയായ യുവതി കെപിസിസി അധ്യക്ഷന് നൽകിയ പരാതിയുടെ അടിസ്ഥാനത്തിലാണ് പോലീസ് കേസ് എടുത്തത്. കെപിസിസി അധ്യക്ഷൻ പരാതി ഡിജിപിക്ക് കൈമാറിയിരുന്നു.

പരാതി അതി​ഗുരുതരം

വിവാഹ അഭ്യർത്ഥന നടത്തി കൂട്ടികൊണ്ടുപോയി ഔട്ട് ഹൗസിൽ വച്ച് ക്രൂരമായി പീഡിപ്പിച്ചുവെന്നാണ് കേസ്. രാഹുലുമായി പരിചയമുണ്ടായിരുന്ന പെൺകുട്ടിക്ക് ആദ്യം പ്രണയാഭ്യർത്ഥനയും പിന്നീട് വിവാഹ അഭ്യർത്ഥനയും ലഭിച്ചിരുന്നു. വീട്ടുകാരുമായി വിവാഹം ചർച്ച ചെയ്തതിന് ശേഷം, വിവാഹം നിശ്ചയിക്കുന്നതിന് മുമ്പ് ചില കാര്യങ്ങള്‍ സംസാരിക്കാനുണ്ടെന്ന് പറഞ്ഞ് ഔട്ട് ഹൗസിലേക്ക് കൂട്ടിക്കൊണ്ടുപോയി എന്നാണ് മൊഴി. രാഹുലിന്റെ സുഹൃത്ത് ഫെനിയാണ് കാർ ഓടിച്ചിരുന്നത്.

ഔട്ട്ഹൗസിൽ എത്തിയപ്പോള്‍ ‘എനിക്ക് നിന്നെ ബലാത്സംഗം ചെയ്യണ’മെന്ന് രാഹുൽ പറഞ്ഞതായി പെൺകുട്ടി മൊഴി നൽകിയിട്ടുണ്ട്. ഉപദ്രവം തുടങ്ങിയപ്പോള്‍ കാലു പിടിച്ച് വെറുതെ വിടണമെന്നാവശ്യപ്പെട്ടിട്ടും രാഹുൽ അതിക്രൂരമായി ലൈംഗിക അതിക്രമം നടത്തിയെന്നും മാനസികമായും ശാരീരികമായും തളർന്നെന്നും ശരീരത്തിൽ മുറിവുകളുണ്ടായെന്നും പെൺകുട്ടിയുടെ മൊഴിയിൽ പറയുന്നു. രാഹുലിനെ പേടിച്ച് പരാതിപ്പെട്ടില്ലെന്നും പെൺകുട്ടി പോലീസിനോട് വ്യക്തമാക്കി.

അന്വേഷണത്തിൽ വഴിത്തിരിവ്

എന്നാൽ, വീണ്ടും രാഹുൽ കാണണമെന്നാവശ്യപ്പെട്ട് വിളിക്കുകയും സന്ദേശങ്ങള്‍ അയക്കുകയും ചെയ്തതോടെയാണ് യുവതി പരാതി നൽകാൻ തയ്യാറായത്. രാഹുൽ മാങ്കൂട്ടത്തിലിന്റെ ശബ്ദരേഖയും ചാറ്റുകളും പെൺകുട്ടി പോലീസിന് തെളിവായി കൈമാറി. മൊഴി രേഖപ്പെടുത്തുന്നതിന് മുമ്പേ കേസെടുത്ത് എസ്പി ജി. പൂങ്കുഴലിയുടെ നേതൃത്വത്തിൽ പ്രത്യേക സംഘത്തെ പോലീസ് നിയോഗിച്ചിരുന്നു. പൂങ്കുഴലി പെണ്‍കുട്ടിയിൽ നിന്നും മൊഴിയെടുക്കുകയും ചെയ്തിരുന്നു. പ്രോസിക്യൂഷൻ്റെ ആവശ്യപ്രകാരം അടച്ചിട്ട കോടതിയിലായിരുന്നു വാദം പൂർത്തിയാക്കിയത്.

പുതിയ ക്രൈംബ്രാഞ്ച് സംഘം

അതേസമയം, ലൈംഗികാതിക്രമ കേസിൽ 12ാം ദിവസവും ഒളിവിലുള്ള രാഹുൽ മാങ്കൂട്ടത്തിലിനെ കണ്ടെത്താൻ ക്രൈംബ്രാഞ്ചിന്റെ പുതിയ സംഘത്തെ നിയോഗിച്ചിരിക്കുകയാണ്. ആദ്യസംഘത്തിൽ നിന്ന് അന്വേഷണ വിവരങ്ങൾ രാഹുലിന് ചോരുന്നു എന്ന നിഗമനത്തിന്റെ കൂടി അടിസ്ഥാനത്തിലാണ് മറ്റൊരു സംഘത്തെ നിയോഗിച്ചത്. ഒളിവിൽ തുടരുന്ന രാഹുൽ മാങ്കൂട്ടത്തിൽ ബംഗളൂറിലുണ്ട് എന്നാണ് പോലീസിന് ലഭിച്ച വിവരം. രാഹുലിനെതിരെയുള്ള ആദ്യ പരാതിയിൽ ജാമ്യാപേക്ഷയിൽ 15ന് വിധി പറയുന്നത് വരെ ഹൈകോടതി അറസ്റ്റ് തടഞ്ഞിട്ടുണ്ട്. എന്നാൽ, രണ്ടാം കേസിലാണ് ഇപ്പോൾ ഉപാധികളോടെ മുൻകൂർ ജാമ്യം ലഭിച്ചിരിക്കുന്നത്.

അന്വേഷണം ചോരുന്നത് തടയാൻ ക്രൈംബ്രാഞ്ച് എടുത്ത നടപടി ശരിയാണോ? കോടതി വിധിയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കുക.

Article Summary: Conditional anticipatory bail for Rahul Mankootathil in 2nd case.

#RahulMankootathil #AnticipatoryBail #SexualAssaultCase #MLA #KeralaPolitics #CrimeBranch