ഏഴ് ഏക്കർ തോട്ടം, ഷീറ്റ് മേഞ്ഞ വീട്; ബദിയടുക്കയിൽ പുഷ്പലതയുടെ മരണം കൊലപാതകമെന്ന് പൊലീസ്

കുഞ്ഞിക്കണ്ണൻ മുട്ടത്ത്

കാസർകോട്/ബദിയടുക്ക: (KasargodVartha) കുമ്പഡാജെ മൗവ്വാർ ഗോസാഡ അജിലയിൽ ഒറ്റയ്ക്ക് താമസിച്ചിരുന്ന വീട്ടമ്മയായ പുഷ്പലത എ.വി. ഷെട്ടി (72) യുടെ മരണം കൊലപാതകമാണെന്ന് പൊലീസ് ഉറപ്പിച്ചു. വെള്ളിയാഴ്ച പരിയാരത്തെ കണ്ണൂർ മെഡിക്കൽ കോളേജിൽ നടക്കുന്ന പോസ്റ്റ്‌മോർട്ടത്തിലൂടെ മരണകാരണം സംബന്ധിച്ച് അന്തിമ വ്യക്തത ലഭിക്കുന്നതോടെ അന്വേഷണം പ്രതിയിലേക്ക് നീങ്ങും.

ബുധനാഴ്ച രാത്രി 9.40-ഓടെയാണ് വീട്ടിനകത്തെ അടുക്കളമുറിയിൽ ദുരൂഹ സാഹചര്യത്തിൽ പുഷ്പലത ഷെട്ടിയെ മരിച്ച നിലയിൽ കണ്ടെത്തിയത്.

ഇവരുടെ മൂത്ത സഹോദരി സുജാതയുടെ ബംഗളൂരിൽ ജോലി ചെയ്യുന്ന മകൾ വംശ ഇടയ്ക്കെല്ലാം ഇവരെ വിളിക്കാറുണ്ട്. ബുധനാഴ്ച വൈകുന്നേരം മുതൽ രാത്രി ഒമ്പത് മണി വരെ തുടർച്ചയായി ഫോണിൽ വിളിച്ചെങ്കിലും ബന്ധപ്പെടാൻ കഴിഞ്ഞിരുന്നില്ല. തുടർന്ന് അയൽവാസികളോടും പഞ്ചായത്ത് അംഗത്തോടും വീട്ടിൽ പോയി അന്വേഷിക്കാൻ ആവശ്യപ്പെട്ടു. 

അവർ വീട്ടിലെത്തിയപ്പോൾ മുൻവശത്തെ വാതിൽ പൂട്ടിയ നിലയിലായിരുന്നു. ഫോൺ വിളിച്ചപ്പോൾ അകത്ത് റിംഗ് ചെയ്തെങ്കിലും കോൾ എടുക്കുന്നുണ്ടായിരുന്നില്ല. തുടർന്ന് അടുക്കള വാതിൽ തുറന്നു കിടക്കുന്നത് ശ്രദ്ധയിൽപ്പെട്ടതോടെ അകത്ത് നോക്കിയപ്പോഴാണ് പുഷ്പലതയെ മരിച്ചു കിടക്കുന്ന നിലയിൽ കണ്ടെത്തിയത്. ഉടൻ തന്നെ വിവരം വംശയെയും പൊലീസിനെയും അറിയിച്ചു.

വംശ നേരത്തെ തന്നെ ബംഗളൂരിൽ നിന്ന് പുറപ്പെട്ട് വ്യാഴാഴ്ച രാവിലെ ബദിയടുക്ക പൊലീസ് സ്റ്റേഷനിൽ എത്തി പരാതി നൽകി. സംഭവവുമായി ബന്ധപ്പെട്ട് ബദിയടുക്ക പൊലീസ് 194-ാം വകുപ്പ് (ഭാരതീയ നാഗരിക സുരക്ഷാ സംഹിത – BNSS 2023) പ്രകാരമാണ് കേസ് രജിസ്റ്റർ ചെയ്തിരിക്കുന്നത്.

സമ്പത്തുണ്ടായിട്ടും ലളിത ജീവിതം

അടുത്തൊന്നും അധികം വീടുകളില്ലാത്ത ഒറ്റപ്പെട്ട പ്രദേശത്താണ് പുഷ്പലത താമസിച്ചിരുന്നത്. ഒരു വർഷം മുൻപാണ് ഭർത്താവ് വെങ്കപ്പ ഷെട്ടി മരിച്ചത്. ഇവർക്ക് മക്കളില്ല. മൂത്ത ഒരു സഹോദരി മാത്രമാണ് ബന്ധുവായി ഉള്ളത്. വീടിനോട് ചേർന്ന് നാല് ഏക്കറിലധികം തോട്ടം പുഷ്പലതയുടെ പേരിലുണ്ടായിരുന്നു. 

അൽപ്പം അകലെയായി മൂന്ന് ഏക്കർ ഭൂമിയും സ്വന്തം പേരിലുണ്ട്. ഈ തോട്ടത്തിൽ നിന്നുള്ള വരുമാനത്തിലാണ് ജീവിതം മുന്നോട്ട് പോയിരുന്നത്. എന്നാൽ, ഇത്രയും ഭൂമിയുടെ ഉടമയായിരുന്നിട്ടും ഷീറ്റ് മേഞ്ഞ ചെറിയ വീട്ടിലായിരുന്നു ഇവരുടെ താമസം.

തെളിവുകൾ കൊലപാതകത്തിലേക്ക്

വീടിനുള്ളിൽ പിടിവലി നടന്നതിന്റെ വ്യക്തമായ ലക്ഷണങ്ങൾ കണ്ടെത്തിയിട്ടുണ്ട്. കഴുത്തിന്റെ ഭാഗത്ത് കരുവാളിച്ച നിലയും മുഖത്ത് നഖംകൊണ്ട് മാന്തിയ പാടുകളും കണ്ടെത്തിയതോടെയാണ് മരണം കൊലപാതകമാണെന്ന നിഗമനത്തിലേക്ക് പൊലീസ് എത്തിയത്. 

ബദിയടുക്ക ഇൻസ്പെക്ടർ എ. സന്തോഷ് കുമാറിന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തി ഇൻക്വസ്റ്റ് നടത്തി മൃതദേഹം പോസ്റ്റ്‌മോർട്ടത്തിനയച്ചു. ജില്ലാ പൊലീസ് മേധാവി വിജയ് ഭാരത് റെഡ്ഡി, ഡിവൈ എസ് പി സി.കെ. സുനിൽ കുമാർ എന്നിവരടക്കമുള്ള ഉന്നത ഉദ്യോഗസ്ഥരും വിരലടയാള വിദഗ്ദ്ധരും പൊലീസ് നായയും സ്ഥലത്തെത്തി വിശദമായ പരിശോധന നടത്തി.

ആസൂത്രിത നീക്കം?

സംഭവം നടന്ന ദിവസത്തിൽ പുഷ്പലതയുടെ വീടിന് സമീപത്ത് താമസിക്കുന്ന കുടുംബം സംക്രാന്തി ആഘോഷത്തിന് പുറത്തുപോയ സമയത്തായിരുന്നു സംഭവം നടന്നത്. ഇത് മനസ്സിലാക്കി തന്നെയാണ് കൊലപാതകി സമയം തിരഞ്ഞെടുത്തതെന്ന സംശയവും അന്വേഷണ സംഘത്തിനുണ്ട്.

നാല് പവനിലധികം തൂക്കം വരുന്ന സ്വർണ്ണ കരിമണിമാലയ്ക്കായി കൊലപാതകം നടത്തിയതാകാമെന്ന നിഗമനവും ശക്തമാണ്. പുഷ്പലതയുടെ കഴുത്തിലുണ്ടായിരുന്ന സ്വർണ്ണ കരിമണിമാല നഷ്ടപ്പെട്ടതായി പൊലീസ് കണ്ടെത്തി. 

മോഷണത്തിനിടെയാണ് കൊലപാതകം നടന്നതെന്ന സാധ്യതയും പൊലീസ് പരിശോധിച്ചുവരികയാണ്. വീടിന്റെ മുൻവശത്തെ വാതിൽ പൂട്ടിയ നിലയിലും അടുക്കള വാതിൽ തുറന്ന നിലയിലുമാണ് മൃതദേഹം കണ്ടെത്തിയത്. ഇത് സംഭവത്തിൽ കൂടുതൽ ദുരൂഹത സൃഷ്ടിക്കുന്നുണ്ട്.

തെളിയാതെ കിടക്കുന്ന പനയാൽ ദേവകി കൊലക്കേസുമായി സാമ്യമുണ്ടെന്ന സംശയവും പൊലീസ് പങ്കുവയ്ക്കുന്നുണ്ട്. മരണവുമായി ബന്ധപ്പെട്ട് ഊർജിത അന്വേഷണം ആരംഭിച്ചതായി ഇൻസ്പെക്ടർ എ. സന്തോഷ് കുമാർ അറിയിച്ചു. പോസ്റ്റ്‌മോർട്ടം റിപ്പോർട്ട് ലഭിക്കുന്നതോടെ അന്വേഷണം കൂടുതൽ വേഗത്തിലാകും.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Police confirm that the death of 72-year-old Pushpalatha in Badiyadukka is a murder. She owned 7 acres of land but lived a simple life. Gold chain is missing.

#Badiyadukka #MurderCase #Pushpalatha #KasaragodNews #Crime #PoliceInvestigation #KeralaNews