പൂച്ചക്കാട്ടെ പ്രവാസി വ്യാപാരിയുടെ വീട് കുത്തിത്തുറന്ന് സ്വർണവും പണവും കവർന്ന കേസിൽ തമിഴ്‌നാട് സ്വദേശി ഷൊർണൂരിൽ പിടിയിലായതായി സൂചന

ബേക്കൽ: (KasargodVartha) പൂച്ചക്കാട്ടെ പ്രവാസി വ്യാപാരി അബ്ദുൽ മജീദിൻ്റെ പൂട്ടിയിട്ട വീട് കുത്തിത്തുറന്ന് അരക്കോടിയിലേറെ രൂപയുടെ സ്വർണവും പണവും കവർന്ന കേസിൽ അന്വേഷണം ഊർജിതമായിരിക്കെ കുറ്റാരോപിതൻ ഷൊർണൂരിൽ പിടിയിലായതായി സൂചന.

സ്വർണം വിൽക്കാൻ ശ്രമം

ഷൊർണൂർ പോലീസ് സംശയാസ്പദമായ സാഹചര്യത്തിൽ പിടികൂടിയപ്പോഴാണ് കവർച്ച ചെയ്ത സ്വർണമടക്കം കണ്ടെത്തിയതെന്നാണ് വിവരം. സ്വർണം വിൽക്കാനുള്ള ശ്രമവും നടത്തിയിരുന്നതായി വിവരമുണ്ട്. ചോദ്യം ചെയ്യലിലാണ് ബേക്കലിൽ നിന്ന് കവർന്ന സ്വർണമാണെന്ന് ഇയാൾ പോലീസിന് മൊഴി നൽകിയത്. ഷൊർണൂർ പോലീസ് വിവരം നൽകിയതിൻ്റെ അടിസ്ഥാനത്തിൽ ബേക്കൽ പോലീസ് ഷൊർണൂരിലേക്ക് പോയിട്ടുണ്ട്.

അതിഥി തൊഴിലാളികളെ കേന്ദ്രീകരിച്ച് അന്വേഷണം

അതിഥി തൊഴിലാളികളെ കേന്ദ്രീകരിച്ചായിരുന്നു പോലീസിൻ്റെ അന്വേഷണം. പ്രദേശത്ത് നിലവിൽ ജോലി ചെയ്യുന്നവർക്കൊപ്പം മുൻപ് ഇവിടെ ജോലി ചെയ്തിരുന്ന അതിഥി തൊഴിലാളികളുടെയും വിവരങ്ങൾ അന്വേഷണ സംഘം പരിശോധിച്ചിരുന്നു. നിരവധി പേരുടെ വിവരങ്ങൾ പോലീസ് ശേഖരിക്കുകയും ചെയ്തിരുന്നു.

സിസിടിവി ദൃശ്യങ്ങൾ നിർണായകം

കവർച്ച നടന്ന വീടിൻ്റെ സമീപ പ്രദേശങ്ങളിലെ സിസിടിവി ദൃശ്യങ്ങളുടെ പരിശോധനയും നടത്തിയിരുന്നു. കവർച്ച നടന്ന വീട്ടിൽ സിസിടിവി സംവിധാനം ഇല്ലാത്തത് അന്വേഷണത്തിന് തിരിച്ചടിയായിരുന്നു. സമീപവീടുകളിലെ ദൃശ്യങ്ങളിൽ നിന്ന് നിർണായക വിവരങ്ങൾ ലഭിച്ചിരുന്നുവെങ്കിലും ആരാണ് പിന്നിലെന്ന് തിരിച്ചറിയാനായിരുന്നില്ല.

ആസൂത്രിത കവർച്ച

കവർച്ച ആസൂത്രിതമായിരുന്നുവെന്ന നിഗമനത്തിലാണ് അന്വേഷണ സംഘം. ജില്ലാ പോലീസ് മേധാവിയുടെ മേൽനോട്ടത്തിൽ പ്രത്യേക സ്ക്വാഡാണ് കേസ് അന്വേഷിച്ചിരുന്നത്. കവർച്ച കേസുകളിൽ ശിക്ഷ കഴിഞ്ഞിറങ്ങിയവരെയും മറ്റ് കവർച്ചാസംഘങ്ങളെയും കുറിച്ചും അന്വേഷണം നടത്തിയിരുന്നു.

പൂട്ടിയിട്ട വീടിൻ്റെ മുൻവാതിൽ പിക്കാസ് ഉപയോഗിച്ച് കുത്തിപ്പൊളിച്ചാണ് കവർച്ച നടത്തിയതെന്ന് പോലീസ് കണ്ടെത്തിയത്. രണ്ട് കിടപ്പുമുറികളിലെ അലമാരകളിൽ സൂക്ഷിച്ചിരുന്ന പണവും സ്വർണവുമാണ് നഷ്ടമായത്.

ഇതിനിടെയാണ് കേസുമായി ബന്ധപ്പെട്ട് തമിഴ്‌നാട് സ്വദേശിയായ ഒരാൾ ഷൊർണൂരിൽ പിടിയിലായതായി സൂചന ലഭിച്ചത്.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: A Tamil Nadu native was reportedly detained in Shoranur while attempting to sell gold, which is suspected to be part of the loot from a major burglary at an NRI's locked house in Poochakkad, Kasaragod. Bekal police have proceeded to Shoranur following the lead.

#PoochakkadRobbery #KasaragodNews #BekalPolice #CrimeNewsKerala #Shoranur #KeralaPolice