Police Action| 'ഗരുഡ' ഗുണ്ട സംഘാംഗം ഇസ്ഹാഖിന് പൊലീസ് വെടിവെപ്പിൽ പരുക്ക്; രക്ഷപ്പെടാനുള്ള ശ്രമം തടഞ്ഞതെന്ന് പൊലീസ്

മംഗ്ളുറു: (KasargodVartha) ഉഡുപ്പി ഹിരിയടുക്ക പൊലീസ് സ്റ്റേഷൻ പരിധിയിലെ ഗുഡ്ഡെ അങ്ങാടി പ്രദേശം സാക്ഷ്യം വഹിച്ചത്  നാടകീയ സംഭവങ്ങൾക്ക്. കുപ്രസിദ്ധ ഗുണ്ടാ സംഘമായ ഗരുഡയിലെ അംഗവും നിരവധി കേസുകളിൽ പ്രതിയുമായ ഇസ്‌ഹാഖിന് പൊലീസ് നടത്തിയ വെടിവെപ്പിൽ പരുക്കേറ്റു. ബെംഗളൂരു പൊലീസ് കസ്റ്റഡിയിൽ നിന്ന് നേരത്തെ രക്ഷപ്പെട്ട പ്രതിയെ കവർച്ച കേസുമായി ബന്ധപ്പെട്ട് പിടികൂടി കൊണ്ടുവരുന്നതിനിടെ രക്ഷപ്പെടാൻ ശ്രമിച്ചപ്പോഴാണ് വെടിവെച്ചതെന്ന്  പൊലീസ് പറഞ്ഞു.

നിരവധി കവർച്ചാ കേസുകളിൽ പ്രതിയായ ഇസ്ഹാഖിനെ ചൊവ്വാഴ്ചയാണ് മണിപ്പാൽ പൊലീസ് പ്രത്യേക സംഘം ഹാസൻ ജില്ലയിലെ ചന്നരായപട്ടണയിൽ നിന്ന് പിടികൂടിയത്. തുടർന്ന് ഇസ്ഹാഖിനെയും കൂട്ടുപ്രതികളെയും മണിപ്പാലിലേക്ക് കൊണ്ടുവരുന്ന വഴി ഹിരിയടുക്ക പോലീസ് സ്റ്റേഷൻ പരിധിയിലെ ഗുഡ്ഡെ അങ്ങാടിയിൽ വെച്ചാണ് സംഭവം നടന്നത്.

പൊലീസ് പറയുന്നത് ഇങ്ങനെ: 'യാത്രയ്ക്കിടെ മൂത്രമൊഴിക്കാൻ പോകണമെന്ന് ഇസ്ഹാഖ് പൊലീസിനോട് പറഞ്ഞു. ഗുഡ്ഡെ അങ്ങാടിയിൽ വാഹനം നിർത്തിയ ശേഷം പുറത്തിറങ്ങിയ ഇസ്ഹാഖ്, പെട്ടെന്ന് തന്നെ പൊലീസുകാരെ തള്ളിമാറ്റി കൈവിലങ്ങുമായി ഓടി രക്ഷപ്പെടാൻ ശ്രമിച്ചു.  പിടികൂടാൻ ശ്രമിച്ച രണ്ട് സബ് ഇൻസ്‌പെക്ടർമാരെയും  ആക്രമിക്കാൻ ശ്രമിക്കുകയും വിലങ്ങ് വാഹനത്തിന്റെ ചില്ലിലിടിച്ച് ചില്ല് തകരുകയും ചെയ്തു. ഈ സംഘർഷത്തിൽ പൊലീസുകാർക്ക് പരിക്കേറ്റു.

മണിപ്പാൽ ഇൻസ്‌പെക്ടർ ദേവരാജിന്റെ നേതൃത്വത്തിലുള്ള പൊലീസ് സംഘം ഇസ്ഹാഖിന് നിരവധി തവണ മുന്നറിയിപ്പ് നൽകി. എന്നാൽ രക്ഷപ്പെടാനുള്ള ശ്രമം തുടർന്നപ്പോൾ ആദ്യം ആകാശത്തേക്ക് വെടിവെച്ച് താക്കീത് നൽകി. എന്നിട്ടും പിന്മാറാതെ വീണ്ടും ഓടിയടുക്കാൻ ശ്രമിച്ചതോടെ പൊലീസ് ഇസ്ഹാഖിന്റെ കാൽമുട്ടിന് താഴെ വെടിവെക്കുകയായിരുന്നു. വെടിവെപ്പിൽ ഇസ്‌ഹാഖ്‌ സംഭവസ്ഥലത്ത് തന്നെ വീണു.

സംഭവത്തിൽ പരുക്കേറ്റ ഇസ്‌ഹാഖിനെയും മണിപ്പാൽ സബ് ഇൻസ്‌പെക്ടർ ദേവരാജ്, ഹിരിയടുക്ക എസ്ഐ മഞ്ജുനാഥ്, ഉഡുപ്പി ടൗൺ പോലീസ് സ്റ്റേഷനിലെ ഹെമന്ത് എന്നിവരെയും മണിപ്പാലിലെ കസ്തൂർബ ആശുപത്രിയിൽ പ്രവേശിപ്പിച്ചു. ഇസ്ഹാഖിനെതിരെ പൊലീസ് പുതിയ കേസ് രജിസ്റ്റർ ചെയ്ത് കൂടുതൽ അന്വേഷണം ആരംഭിച്ചിട്ടുണ്ട്. നെലമംഗല പൊലീസും ഇസ്ഹാഖിനായി തിരച്ചിൽ നടത്തുകയായിരുന്നു. ഇതിനു മുൻപ് മണിപ്പാലിൽ വെച്ച് ജീപ്പ് ഉപയോഗിച്ച് നിരവധി വാഹനങ്ങൾ ഇടിച്ചു തെറിപ്പിച്ച് ഇയാൾ രക്ഷപ്പെട്ടിരുന്നു. എട്ട് ദിവസത്തെ തിരച്ചിലിന് ഒടുവിലാണ് ഇയാളെ പൊലീസ് പിടികൂടിയത്'.

A member of the 'Garuda' gang, Issac, was injured in a police shooting during an escape attempt in Udupi. He was arrested in a robbery case and tried to escape while being taken into custody.
Hashtags in English for Social Shares:

#Udupi #PoliceShootout #Crime #GarudaGang #Arrest #News