Two arrested | ഫ്‌ലാറ്റ് കേന്ദ്രീകരിച്ച് വന്‍ മയക്കുമരുന്ന് വില്‍പന; മുംബൈ യുവതിയും കാസര്‍കോട്ടെ യുവാവും പിടിയില്‍

മഞ്ചേശ്വരം: (www.kasargodvartha.com) ഫ്‌ലാറ്റ് കേന്ദ്രീകരിച്ച് വന്‍ മയക്കു മരുന്ന് വില്‍പന മുംബൈ യുവതിയും കാസര്‍കോട്ടെ യുവാവും പൊലീസ് പിടിയില്‍. ജില്ല പൊലീസ് മേധാവി ഡോ. വൈഭവ് സക്‌സേനയുടെ നേതൃത്വത്തില്‍ നടത്തിവരുന്ന ഓപറേഷന്‍ ക്ലീന്‍ കാസര്‍കോടിന്റെ ഭാഗമായി നടത്തിയ റെയിഡിലാണ് മയക്കുമരുന്ന് പിടികൂടിയത്.

  


ജില്ലാ പൊലീസ് മേധാവിക്ക് ലഭിച്ച രഹസ്യവിവരത്തെ തുടര്‍ന്ന് കാസര്‍കോട് ഡിവൈഎസ്പി വി വി മനോജിന്റെ നേതൃത്വത്തില്‍ ഡിവൈഎസ്പി സി എ അബ്ദുര്‍ റാഹീം, മഞ്ചേശ്വരം ഇന്‍സ്‌പെക്ടര്‍ സന്തോഷ് കുമാര്‍, എസ്‌ഐ അന്‍സാര്‍ എന്നിവര്‍ ചേര്‍ന്ന് മഞ്ചേശ്വരം ഹൊസങ്കടിയില്‍ ഹൈ ലാന്‍ഡ് സിറ്റി ടവര്‍ ഫ്‌ലാറ്റ് നമ്പര്‍ 304 ല്‍ നടത്തിയ പരിശോധനയില്‍ 21 ഗ്രാം എംഡിഎംഎയും, 10,850 രൂപയും പിടിച്ചെടുത്തു.
  
ഫ്‌ലാറ്റില്‍ മയക്കുമരുന്നു വില്‍പന നടത്തിയ മഞ്ചേശ്വരം പൊലീസ് സ്റ്റേഷന്‍ പരിധിയിലെ സൂരജ് റായി (26), മുംബൈ താന സിറ്റിയിലെ സെന ഡിസൂസ (23) എന്നിവരെ അറസ്റ്റ് ചെയ്തു.

എസ്‌ഐ തോമസ്, എസ് സി പി ഒ മാരായ ശിവകുമാര്‍, ഓസ്റ്റിന്‍ തമ്പി, സജീഷ്, ഹരീഷ്, വനിതാ സിപിഒ ലിജോ എന്നിവരും പൊലീസ് സംഘത്തില്‍ ഉണ്ടായിരുന്നു.

പിടിയിലായ മുംബൈ യുവതിയും യുവാവും ഭാര്യാ ഭര്‍ത്താക്കന്മാരായി കഴിഞ്ഞുവരികയായിരുന്നുവെന്ന് പൊലീസ് പറഞ്ഞു.