പോക്സോ കേസ് പിൻവലിക്കാൻ അതിജീവിതയെ തട്ടിക്കൊണ്ടുപോയ സംഭവം; യുവതി 7 വർഷമായി നേരിട്ടത് കൊടിയ പീഡനമെന്ന് വെളിപ്പെടുത്തൽ

കാസർകോട്: (KasargodVartha) 16-ാം വയസ്സിൽ നടന്ന പീഡനത്തിന് നൽകിയ പോക്സോ പരാതി പിൻവലിക്കാൻ വേണ്ടി ജ്യൂസ് കടയിൽ നിന്നും അതിജീവിതയെ തട്ടിക്കൊണ്ടുപോയ സംഭവത്തിൻ്റെ വിവരങ്ങൾ പുറത്ത് വന്നു. യുവതി ഏഴ് വർഷമായി നേരിട്ടത് പീഡനമാണെന്നാണ് പൊലീസിന് നൽകിയ മൊഴിയിലുള്ളത്. പതിനാറാം വയസ്സിൽ തുടങ്ങിയ ബന്ധത്തിൽ ഏഴ് വർഷത്തിനിടെ പീഡനത്തിൻ്റെയും ഭീഷണിയുടെയും ദുരിതജീവിതമായി മാറിയെന്ന പരാതിയുമായാണ് യുവതി രംഗത്ത് വന്നിരിക്കുന്നത്.

17-ാം  വയസ്സിൽ അമ്മയായി

തട്ടിക്കൊണ്ടുപോയ കേസിലെ പ്രതിയുമായുള്ള ബന്ധത്തിനിടെ 17-ാം വയസ്സിൽ കുഞ്ഞിന് ജന്മം നൽകിയ യുവതി, മർദനത്തിനിരയായെന്നും പരിക്കേറ്റെന്നും ഒരു ചെവിയുടെ കേൾവിശക്തി നഷ്ടപ്പെട്ടതായും പൊലീസിന് മൊഴി നൽകിയിട്ടുണ്ട്. ഒരുഘട്ടത്തിൽ ജീവനൊടുക്കാൻ ശ്രമിച്ചിരുന്നുവെന്നും യുവതി വെളിപ്പെടുത്തുന്നു. സി എസ് സബിദ് എന്നയാളുമായി 2019-ലാണ് യുവതി പ്രായപൂർത്തിയാകാത്ത സമയത്ത് ബന്ധത്തിലാകുന്നത്. അന്ന് യുവതിക്ക് 16 വയസ്സും സബിദിന് 24 വയസ്സുമായിരുന്നു.

വിദ്യാനഗറിൽ പഠനത്തിനായി പോകുന്നതിനിടെ ബസ് കാത്തുനിൽക്കുന്ന സമയത്താണ് സബിദ് യുവതിയെ ശ്രദ്ധിച്ചതെന്നാണ് മൊഴി. പിന്നീട് പരിചയം വളരുകയും പ്രണയം അറിയിക്കുകയും ചെയ്തു. തനിക്കൊപ്പം വരണമെന്ന് ആവശ്യപ്പെട്ട സബിദ്, വരാത്തപക്ഷം അന്ന് ജീവനൊടുക്കുമെന്ന് ഭീഷണിപ്പെടുത്തിയതായും യുവതി പറയുന്നു. പ്രായപൂർത്തിയാകാത്ത പെൺകുട്ടിയായിരുന്നിട്ടും പിന്നീട് ഇരുവരും ഒരുമിച്ച് താമസിക്കുകയായിരുന്നു. യുവാവുമായുള്ള ബന്ധത്തിനിടെ യുവതി ഗർഭിണിയായി. 2020 ഒക്ടോബറിൽ, 17-ാം വയസ്സിലാണ് ആൺകുഞ്ഞിന് ജന്മം നൽകിയത്. ഗർഭകാലത്തും സബിദിൽനിന്ന് മർദനം നേരിട്ടതായി യുവതി ആരോപിക്കുന്നു. പ്രായപൂർത്തിയായാൽ വിവാഹം കഴിക്കുമെന്നായിരുന്നു പ്രതീക്ഷയെങ്കിലും നടന്നില്ല. ബന്ധത്തിലെ പ്രശ്നങ്ങൾ രൂക്ഷമായതോടെ യുവതി വീട്ടിലും സബിദിൻ്റെ വീട്ടിലുമായി മാറിമാറി താമസിച്ചു. മകളുടെ അവസ്ഥ മനസ്സിലാക്കിയതോടെ കുടുംബവും പിന്നീട് യുവതിയെ സ്വീകരിക്കാൻ തുടങ്ങിയതായി പറയുന്നു.

ജോലിക്കായി ദുബൈയിലെത്തിയിട്ടും ദുരിതം

കുഞ്ഞിനെ അമ്മയെ ഏൽപിച്ച് യുവതി ജോലിക്കായി ദുബൈയിൽ പോവുകയും മാളിൽ ജോലി നോക്കുകയും ചെയ്തിരുന്നു. സബിദും പിന്നീട് ജോലിക്കായി ദുബൈയിൽ എത്തിയെങ്കിലും ഇരുവരും വ്യത്യസ്തമായാണ് കഴിഞ്ഞത്. പിന്നീട് നാട്ടിലെത്തിയ യുവതി കുഞ്ഞിനൊപ്പം കഴിയുകയും കുടുംബത്തെ സഹായിക്കാനായി മോഡലിങ് ജോലികൾ ഏറ്റെടുക്കുകയും ചെയ്തു. എന്നാൽ കഴിഞ്ഞ മെയിൽ സബിദ് വീണ്ടും ദുബൈയിൽ നിന്നും നാട്ടിലെത്തിയതോടെയാണ് പ്രശ്നങ്ങൾ വീണ്ടും ആരംഭിച്ചെന്നാണ് യുവതിയുടെ ആരോപണം.

വീണ്ടും മർദിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്തതോടെയാണ് യുവതി സബിദിൻ്റെ വീട്ടിൽനിന്ന് ഇറങ്ങിപ്പോന്നത്. തുടർന്ന് പൊലീസിനെ സമീപിച്ച് പോക്സോ കേസ് നൽകുകയായിരുന്നു. ലൈംഗിക അതിക്രമം, പ്രായ പൂർത്തി ആകാത്ത പെൺകുട്ടിയെ ഗർഭിണിയാക്കൽ തുടങ്ങിയ കുറ്റങ്ങളാണ് സബിദിനെതിരായ പോക്സോ കേസിൽ ചുമത്തിയത്. പോക്സോ കേസിൽ അറസ്റ്റിലായ സബിദ് ജുഡീഷ്യൽ കസ്റ്റഡിയിൽ റിമാൻഡിലാവുകയും പിന്നീട് ജാമ്യത്തിലിറങ്ങുകയുമായിരുന്നു.

ജാമ്യം ലഭിച്ച് പുറത്തിറങ്ങിയതിന് പിന്നാലെ തട്ടിക്കൊണ്ടുപോകൽ

പോക്സോ കേസിൽ ജാമ്യം ലഭിച്ച് പുറത്തിറങ്ങിയതിന് പിന്നാലെയാണ് യുവതിയെ വീണ്ടും ആക്രമിക്കുകയും തട്ടിക്കൊണ്ടുപോകുകയും ചെയ്തെന്ന പരാതി ഉയർന്നത്. 2026 സെപ്റ്റംബർ നാലിന് രാത്രി കാസർകോട് നഗരത്തിന് സമീപത്തെ കടയിൽനിന്ന് ജ്യൂസ് കഴിച്ചുകൊണ്ടിരിക്കുമ്പോൾ സബിദും സഹോദരൻ താഹിറും മറ്റൊരാളും കാറിലെത്തിയെന്നാണ് യുവതിയുടെ മൊഴി. തുടർന്ന് സബിദ് ഗ്ലാസ് കൊണ്ട് തലയിൽ അടിക്കുകയും വലിച്ചിഴച്ച് കാറിൽ കയറ്റി കൊണ്ടുപോകുകയും ചെയ്തെന്നാണ് പരാതി. വിവരമറിഞ്ഞ് വിദ്യാനഗർ പൊലീസ് നടത്തിയ അന്വേഷണത്തിലാണ് ചെമ്മനാട് പഞ്ചായത്തിലെ ചട്ടഞ്ചാലിലുള്ള സബിദിൻ്റെ വീട്ടിൽനിന്ന് യുവതിയെ കണ്ടെത്തിയത്.

സംഭവത്തിൽ സബിദിനും സഹോദരൻ താഹിറിനുമെതിരെ ആയുധം ഉപയോഗിച്ചുള്ള ആക്രമണം, ഭീഷണിപ്പെടുത്തൽ, തട്ടിക്കൊണ്ടുപോകൽ തുടങ്ങിയ കുറ്റങ്ങൾ ചുമത്തി പൊലീസ് രണ്ടാമത്തെ കേസും രജിസ്റ്റർ ചെയ്തു. പോക്സോ കേസ് പിൻവലിക്കാൻ യുവതി തയ്യാറാകാത്തതാണ് ആക്രമണത്തിന് കാരണമെന്നാണ് പൊലീസ് വ്യക്തമാക്കുന്നത്.

സംവിധാനങ്ങളുടെ വീഴ്ചകൾ

16-കാരിയും 24 വയസ്സുകാരനും തമ്മിലുള്ള ബന്ധം വർഷങ്ങളോളം തുടരുകയും ഇതിനിടെ പ്രായപൂർത്തിയാകാത്ത പെൺകുട്ടി ഗർഭിണിയായി കുഞ്ഞിന് ജന്മം നൽകുകയും ചെയ്തിട്ടും ഇടപെടൽ ഉണ്ടായില്ലെന്നത് ചോദ്യങ്ങളാണ് ഉയർത്തുന്നത്. കുടുംബം, ബന്ധുക്കൾ, അയൽവാസികൾ എന്നിവരുടെ ശ്രദ്ധയിൽപ്പെടാതെയാണോ ഇത്രയും കാലം യുവതി കഴിഞ്ഞതെന്ന ചോദ്യവും ഉയരുന്നു. പോക്സോ കേസിൽ സബിദിന് ലഭിച്ച ജാമ്യം റദ്ദാക്കണമെന്നാവശ്യപ്പെട്ട് പൊലീസിനെ സമീപിച്ചിരിക്കുകയാണ് ഇപ്പോൾ യുവതി.

ഈ ക്രൈം വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: A woman was allegedly kidnapped by the accused to force her to withdraw a POCSO case.

#KasaragodNews #POCSOcase #KeralaPolice #CrimeNews #WomenSafety #RenuNews