Court Verdict | പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചെന്ന പോക്‌സോ കേസില്‍ യുവാവിന് 7 വര്‍ഷം തടവും പിഴയും

കാഞ്ഞങ്ങാട്: (www.kasargodvartha.com) പ്രായപൂര്‍ത്തിയാവാത്ത പെണ്‍കുട്ടിയെ ലൈംഗിക അതിക്രമത്തിന് വിധേയമാക്കിയെന്ന കേസിലെ പ്രതിക്ക് ഏഴുവര്‍ഷം തടവും 20,000 രൂപ പിഴയും ഹൊസ്ദുര്‍ഗ് അതിവേഗ പ്രത്യേക കോടതി ശിക്ഷ വിധിച്ചു. മേല്‍പറമ്പ് പൊലീസ് സ്റ്റേഷന്‍ പരിധിയിലെ എംഎച് അബ്ദുല്‍ അമീനിനെ (43)യാണ് ജഡ്ജ് സുരേഷ് കുമാര്‍ ശിക്ഷിച്ചത്. പിഴയടച്ചില്ലെങ്കില്‍ രണ്ടുമാസം അധിക തടവും അനുഭവിക്കണം.
       
ഇന്‍ഡ്യന്‍ ശിക്ഷാ നിയമം 354 (എ) (1) പ്രകാരം രണ്ട് വര്‍ഷം കഠിനതടവും പോക്‌സോ നിയമം 10 ആര്‍ ഡബ്ല്യു 9 (എം) പ്രകാരം അഞ്ച് വര്‍ഷം സാധാരണ തടവും അനുഭവിക്കാനാണ് കോടതി വിധിച്ചത്. 2020 മെയ് മാസത്തില്‍ 12 വയസുള്ള പെണ്‍കുട്ടിയെ പ്രതി ലൈംഗീക പീഡനത്തിന് ഇരയാക്കിയെന്നാണ് കേസ്.
       
മേല്‍പറമ്പ് പൊലീസ് രജിസ്റ്റര്‍ ചെയ്ത കേസില്‍ അന്നത്തെ എസ്‌ഐയായിരുന്ന എംപി പത്മനാഭനാണ് കേസന്വേഷണം നടത്തി പ്രതിയെ അറസ്റ്റുചെയ്യുകയും കോടതിയില്‍ കുറ്റപത്രം സമര്‍പിക്കുകയും ചെയ്തത്. കേസില്‍ പ്രോസിക്യൂഷന് വേണ്ടി ഹൊസ്ദുര്‍ഗ് സ്‌പെഷ്യല്‍ പ്രോസിക്യൂടര്‍ എ ഗംഗാധരന്‍ ഹാജരായി.