പയ്യന്നൂർ കോറോത്ത് അര ലക്ഷം രൂപയുടെ തേങ്ങയും അടക്കയും മോഷ്ടിച്ച പ്രതി അറസ്റ്റിൽ

പയ്യന്നൂർ: (KasargodVartha) നഗരസഭയിലെ കോറോത്ത് ആളൊഴിഞ്ഞ വീട്ടുപറമ്പിൽനിന്ന് അര ലക്ഷം രൂപയുടെ തേങ്ങയും അടക്കയും മോഷ്ടിച്ച കേസിലെ പ്രതിയെ പോലീസ് അറസ്റ്റ് ചെയ്തു. തമ്പാൻ എന്നയാളെയാണ് പയ്യന്നൂർ പോലീസ് പിടികൂടിയത്.

തേങ്ങയും അടക്കയും മോഷ്ടിക്കുന്നത് പതിവാക്കിയ പ്രതിയെയാണ് പോലീസ് പിടികൂടിയത്. കഴിഞ്ഞ മാസം 5-ന് ഉച്ചയ്ക്കാണ് കേസിനാസ്പദമായ സംഭവം നടന്നത്. കോറോം കാനായി നോർത്തിലെ കായിപ്രത്ത് മീത്തലെ വീട്ടിൽ ഗോവിന്ദന്റെ പറമ്പിൽനിന്ന് തേങ്ങയും അടക്കയും മോഷണം പോകുന്നത് പതിവായിരുന്നു. കള്ളനെ പിടികൂടാൻ പലതവണ ശ്രമിച്ചിട്ടും വീട്ടുടമയ്ക്ക് സാധിച്ചില്ല. ഒടുവിൽ പറമ്പിന് ചുറ്റും സിസിടിവി സ്ഥാപിക്കാൻ തീരുമാനിക്കുകയായിരുന്നു.

സിസിടിവി ദൃശ്യങ്ങളിൽ പതിഞ്ഞ മുഖം വീട്ടുടമയുടെ നാട്ടുകാരൻ തമ്പാന്റേതായിരുന്നു. തുടർന്ന് പയ്യന്നൂർ പോലീസിൽ പരാതി നൽകി. സിസിടിവി ദൃശ്യങ്ങളും ഹാജരാക്കി. സംഭവത്തിനുശേഷം നാട്ടിൽനിന്ന് മുങ്ങിയ പ്രതിക്കായുള്ള തിരച്ചിലിനിടെയാണ് ഇയാൾ പോലീസ് പിടിയിലായത്. 

രാത്രിസമയങ്ങൾക്ക് പുറമെ പകൽ സമയങ്ങളിലും പ്രതി മോഷണം നടത്താറുണ്ടെന്ന് പോലീസ് അറിയിച്ചു. കസ്റ്റഡിയിലെടുത്ത് ചോദ്യം ചെയ്തപ്പോഴാണ് പ്രതി കുറ്റം സമ്മതിച്ചത്. നാല് മാസം മുൻപ് സമാനമായ മറ്റൊരു കേസിൽ ജയിലിൽനിന്നും ഇറങ്ങിയ പ്രതിയാണ് ഇയാളെന്ന് പോലീസ് വ്യക്തമാക്കി.

കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. നേരത്തെ നിരവധി മോഷണക്കേസുകളിൽ പ്രതിയായ തമ്പാൻ ജയിലിൽനിന്ന് പുറത്തിറങ്ങിയതിനുശേഷം വീണ്ടും മോഷണത്തിൽ സജീവമാവുകയായിരുന്നു.

ഈ വാർത്തയെക്കുറിച്ച് നിങ്ങളുടെ അഭിപ്രായം കമന്റ് ചെയ്യുക. നിങ്ങളുടെ സുഹൃത്തുക്കൾക്കും ഇത് ഷെയർ ചെയ്യൂ.

Article Summary: Man arrested in Payyanur for theft of coconuts and areca nuts.

#Payyanur #Theft #KeralaCrime #Arrest #Thampan #CCTV