പയ്യന്നൂരിൽ സ്വത്ത് തർക്കം: മകൻ പിതാവിൻ്റെ കാൽ തല്ലിയൊടിച്ചു

പയ്യന്നൂർ: (KasargodVartha) കുടുംബസ്വത്ത് ഭാഗം വെക്കുന്നതിനെ ചൊല്ലിയുള്ള തർക്കത്തിനിടെ വയോധികനായ പിതാവിൻ്റെ കാൽ മരവടി കൊണ്ട് അടിച്ചു തകർത്ത യുവാവ് അറസ്റ്റിലായി. കെ.വി.അനൂപ് (30) ആണ് അറസ്റ്റിലായത്. പയ്യന്നൂർ എസ്.ഐ പി.യദുകൃഷ്ണനാണ് പ്രതിയെ അറസ്റ്റ് ചെയ്തത്.

സംഭവം നടന്നത് മെയ് മാസം 18-ാം തീയതി ഞായറാഴ്ച വൈകുന്നേരം 5.30-ഓടെ കല്ലേറ്റുംകടവിലെ വീടിനോട് ചേർന്ന കടവരാന്തയിൽ വെച്ചായിരുന്നു. സ്വത്ത് ഭാഗം വെക്കാൻ വിസമ്മതിച്ചതിലുള്ള വിരോധം മൂലം അനൂപ് പിതാവായ കെ.അമ്പുവിൻ്റെ (76) ഇടത് കാൽമുട്ട് മരവടി കൊണ്ട് അടിച്ചു തകർക്കുകയായിരുന്നു. ഗുരുതരമായി പരിക്കേറ്റ അമ്പു പയ്യന്നൂർ സഹകരണ ആശുപത്രിയിൽ ചികിത്സയിലാണ്.

ആശുപത്രിയിലെത്തിയ പോലീസ് അമ്പുവിൻ്റെ മൊഴി രേഖപ്പെടുത്തി അനൂപിനെതിരെ കേസെടുക്കുകയും അറസ്റ്റ് ചെയ്യുകയുമായിരുന്നു. അറസ്റ്റിലായ പ്രതിയെ പയ്യന്നൂർ കോടതിയിൽ ഹാജരാക്കിയ ശേഷം റിമാൻഡ് ചെയ്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: A man in Payyanur, Kerala, was arrested for brutally assaulting his elderly father with a wooden stick, breaking his leg, during a property dispute.

#KeralaCrime, #Payyanur, #PropertyDispute, #Arrested, #ElderlyAbuse, #BreakingNews