യൂണിഫോമിന് വേണ്ടി കുട്ടികളെ വിവസ്ത്രരാക്കി: സ്വകാര്യ സ്കൂളിനെതിരെ രക്ഷിതാക്കൾ

പടന്നക്കാട്: (KasargodVartha) തിരിച്ചറിയൽ കാർഡിന് ഫോട്ടോ എടുക്കുന്നതിനായി യൂണിഫോം ധരിച്ചെത്തിയ മൂന്ന് വിദ്യാർത്ഥിനികളെ ശുചിമുറിയിൽ വിവസ്ത്രരാക്കി നിർത്തിയതായി ആരോപണം. ഹൊസ്ദുർഗ് പൊലീസ് സ്റ്റേഷൻ പരിധിയിലെ ഒരു സ്വകാര്യ ഇംഗ്ലീഷ് മീഡിയം സ്കൂളിനെതിരെയാണ് രക്ഷിതാക്കൾ ഈ ഗുരുതര ആരോപണവുമായി രംഗത്തെത്തിയത്. വിവരമറിഞ്ഞ രക്ഷിതാക്കൾ സ്കൂളിലെത്തി ശക്തമായി പ്രതിഷേധിച്ചു.

രക്ഷിതാക്കൾ വെളിപ്പെടുത്തിയ സംഭവം ഇങ്ങനെയാണ്: 

തിരിച്ചറിയൽ കാർഡിനായുള്ള ഫോട്ടോ എടുക്കുന്നതിന് ഫോട്ടോഗ്രാഫർ എത്തുമെന്ന് തലേദിവസം സ്കൂളിൽ നിന്ന് അറിയിച്ചിരുന്നു. എല്ലാ കുട്ടികളും യൂണിഫോമിൽ എത്തിയിരുന്നെങ്കിലും, ഏതാനും ചിലർ കളർ ഡ്രസ്സിലാണ് വന്നത്. യൂണിഫോമിൽ ഫോട്ടോ എടുക്കുന്നതിന് വേണ്ടി, കളർ ഡ്രസ്സ് ധരിച്ചെത്തിയ കുട്ടികൾക്ക് ധരിക്കാൻ, യൂണിഫോമിലെത്തിയ മൂന്ന് ചെറിയ പെൺകുട്ടികളെ ശുചിമുറിയിലേക്ക് കൊണ്ടുപോയി വസ്ത്രങ്ങൾ അഴിപ്പിച്ച് നിർത്തുകയായിരുന്നു. ഈ യൂണിഫോം കളർ ഡ്രസ്സ് ധരിച്ച കുട്ടികളെ ധരിപ്പിച്ച് ഫോട്ടോ എടുപ്പ് പൂർത്തിയാക്കി. അതുവരെ യൂണിഫോം ധരിച്ചെത്തിയ കുട്ടികൾ ശുചിമുറിയിൽ നഗ്നരായി നിൽക്കേണ്ടി വന്നുവെന്ന് രക്ഷിതാക്കൾ പറയുന്നു.

വീട്ടിലെത്തിയ കുട്ടികൾ സങ്കടത്തോടെ കാര്യങ്ങൾ പറഞ്ഞപ്പോഴാണ് രക്ഷിതാക്കൾ സംഭവം അന്വേഷിക്കാനായി സ്കൂളിലെത്തിയത്. സ്കൂൾ അധികൃതർ തട്ടിക്കയറി സംസാരിച്ചതോടെ വാക്കുതർക്കമുണ്ടായി. വിവരമറിഞ്ഞെത്തിയ പൊലീസ്, പരാതിയുണ്ടെങ്കിൽ എഴുതി നൽകിയാൽ നടപടിയെടുക്കാമെന്ന് അറിയിച്ചതോടെയാണ് താൽക്കാലികമായി പ്രശ്നം ശാന്തമായത്. 

തുടർന്ന് സ്കൂൾ അധികൃതരെ പൊലീസ് സ്റ്റേഷനിലേക്ക് വിളിപ്പിക്കുകയും രക്ഷിതാക്കളും അവിടെയെത്തുകയും ചെയ്തു. കുട്ടികൾക്ക് വിഷമമാകുമെന്ന് കരുതിയില്ലെന്നും, ചെറിയ സമയത്തേക്ക് മാത്രമാണ് യൂണിഫോം മാറ്റിയിട്ടതെന്നും, ഈ നടപടിയിൽ ക്ഷമ ചോദിക്കുന്നുവെന്നും സ്കൂൾ അധികൃതർ പറഞ്ഞതോടെ രക്ഷിതാക്കൾ അയഞ്ഞു.

സംഭവത്തെക്കുറിച്ച് പരാതിയൊന്നും ലഭിച്ചിട്ടില്ലെന്ന് ഹൊസ്ദുർഗ് പൊലീസ് കാസർകോട് വാർത്തയോട് പ്രതികരിച്ചു.

ഈ സംഭവം എത്രത്തോളം ഞെട്ടിക്കുന്നതാണ്? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Private school accused of stripping girls for ID photos; parents protest.

#KeralaNews, #ChildRights, #SchoolControversy, #Padannakkad, #StudentSafety, #ParentsProtest