ഉന്നത കുടുംബങ്ങളിലെ യുവത്വവും ലഹരിവലയിൽ: പടന്നയിൽ ആശങ്ക!

പടന്ന: (KasargodVartha) കഞ്ചാവ് ഉൾപ്പെടെയുള്ള മയക്കുമരുന്ന് മാഫിയ പടന്നയിൽ ശക്തമായി പിടിമുറുക്കുകയാണ്. മയക്കുമരുന്ന് വിൽക്കുന്നവരുടെയും അത് ഉപയോഗിക്കുന്ന ചെറുപ്പക്കാരുടെയും എണ്ണം പടന്നയിൽ അനുദിനം വർദ്ധിച്ചുവരുന്നു.

ചന്തേര പോലീസ് സ്റ്റേഷനിൽ മയക്കുമരുന്ന് കേസിൽ പിടികൂടുന്ന പ്രതികളിൽ ഭൂരിഭാഗവും പടന്നയിൽ നിന്നുള്ളവരാണെന്നത് സ്ഥിതിയുടെ ഗൗരവം വർദ്ധിപ്പിക്കുന്നു. കഴിഞ്ഞ രണ്ടു ദിവസത്തിനിടെ ആറ് പേർക്കെതിരെയാണ് പോലീസ് കേസെടുത്തത്. 
 

ഇവരിൽ പലരും ഉന്നത കുടുംബങ്ങളിൽ നിന്നുള്ളവരാണ്. അളവിൽ കുറവുള്ള മയക്കുമരുന്നായതുകൊണ്ട് പിടിയിലാകുന്നവർ മണിക്കൂറുകൾക്കുള്ളിൽ ജാമ്യം നേടി പുറത്തിറങ്ങുകയും വീണ്ടും ഇത്തരം ഇടപാടുകളിൽ ഏർപ്പെടുകയും ചെയ്യുന്നത് പോലീസിന് തലവേദന സൃഷ്ടിക്കുന്നു.

ഹൈസ്കൂൾ പരിസരം, പടന്ന മാട്ടുമ്മൽ, തെക്കെക്കാട് ബണ്ട്, തോട്ടുകരപ്പാലം, പടന്ന മൂസ്സഹാജി മുക്ക്, ഗവൺമെന്റ് യു.പി. സ്കൂൾ പരിസരം എന്നിവിടങ്ങൾ കേന്ദ്രീകരിച്ച് അർദ്ധരാത്രി മുതൽ പുലർച്ചെ വരെ കാറുകളിൽ കറങ്ങിയുള്ള വിൽപ്പന സജീവമാണ്.
 

പടന്നയിൽ പുലരും വരെ പ്രവർത്തിക്കുന്ന ഹോട്ടലുകളും കച്ചവട സ്ഥാപനങ്ങളും ടർഫ് കളികളും കാരണം പുറംനാടുകളിൽ നിന്നുള്ള ഉപഭോക്താക്കൾ പടന്നയിൽ എത്തുന്നുണ്ടെന്ന് പ്രദേശവാസികൾ പറയുന്നു. രാത്രി വൈകിയുള്ള കച്ചവടം അവസാനിപ്പിക്കാൻ അന്നത്തെ ഡിവൈഎസ്പി നാട്ടുകാരുടെ യോഗം വിളിച്ചുചേർത്ത് തീരുമാനമെടുത്തെങ്കിലും അത് ഫലപ്രദമായില്ല.

ദിനംപ്രതി മാന്യമായ കുടുംബങ്ങളിലെ കുട്ടികളാണ് ഇവരുടെ വലയിൽപ്പെടുന്നത്. പലർക്കും തങ്ങളുടെ മക്കൾ മയക്കുമരുന്ന് കേസിൽ പിടിക്കപ്പെടുമ്പോഴാണ് ഇതിന്റെ അപകടം ബോധ്യപ്പെടുന്നത്.
 

മുഹമ്മദ് എം.എം (23), ഫർസാൻ കെ (23), മുഹമ്മദ് റാഫി കെ (24) എന്നിവരെ കഞ്ചാവ് ഉപയോഗിക്കുന്നതിനിടയിലും, എം. അബ്ദുൽ റഹ്‌മാൻ (24), സാദിഖ് മുഹമ്മദ് (23), മുഹമ്മദ് യു.കെ (25) എന്നിവരെ മാരക മയക്കുമരുന്നായ എം.ഡി.എം.എ ഉപയോഗിക്കാനുള്ള ശ്രമത്തിനിടയിലുമാണ് പോലീസ് അറസ്റ്റ് ചെയ്തത്.
 

പടന്നയിലെ ലഹരി പ്രശ്നത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.
 

Article Summary: Drug menace increasing in Padanna, affecting youth from affluent families.
 

#DrugMenace #Padanna #KeralaDrugs #YouthAddiction #LawEnforcement #PublicSafety