ഓപ്പറേഷൻ സിവൈ- ഹണ്ടിൽ പുറത്ത് വന്നത് തട്ടിപ്പിന്റെ ശൃംഖല; ബാങ്ക് അക്കൗണ്ടുകൾ വാടകയ്ക്ക് നൽകിയ 26 പേർ കുടുങ്ങി

കാസർകോട്: (KasargodVartha) ഓൺലൈൻ സാമ്പത്തിക തട്ടിപ്പിലൂടെ പണം ജില്ലയിലേക്ക് എത്തിയെന്ന വിവരത്തെ തുടർന്ന് കാസർകോട് ജില്ലയിൽ പൊലീസിൻ്റെ പരിശോധനയില്‍ 26 പേർ കുടുങ്ങി. സംസ്ഥാന പൊലീസ് മേധാവിയുടെ നിർദേശപ്രകാരം സൈബർ പൊലീസിൻ്റെ സഹായത്തോടെ നടത്തിയ 'ഓപ്പറേഷൻ സിവൈ- ഹണ്ട്' പരിശോധനയിലാണ് സാമ്പത്തിക കുറ്റകൃത്യങ്ങളുമായി ബന്ധമുണ്ടെന്ന് കരുതുന്ന 26  പേർ കുടുങ്ങിയത്. ഇവരിൽ ഭൂരിഭാഗവും യുവാക്കളാണ്. കുറ്റാരോപിതരുടെ വീടുകളിലും സ്ഥാപനങ്ങളിലുമെത്തിയ പൊലീസ് ബാങ്ക് രേഖകൾ, പാസ്ബുക്കുകൾ, എടിഎം കാർഡുകൾ, മൊബൈൽ ഫോണുകൾ തുടങ്ങിയവ കസ്റ്റഡിയിലെടുത്തു. അനധികൃതമായി പണം സ്വീകരിക്കുന്നതിനും കൈമാറുന്നതിനും ബാങ്ക് അക്കൗണ്ടുകൾ ഉപയോഗിക്കാൻ ഒത്താശ ചെയ്തവരെയാണ് പരിശോധനയിൽ കണ്ടെത്തിയതെന്ന് പൊലീസ് വ്യക്തമാക്കി.

അക്കൗണ്ടുകൾ വാടകയ്ക്ക്

ഓൺലൈൻ തട്ടിപ്പ് സംഘങ്ങൾക്ക് ബാങ്ക് അക്കൗണ്ടുകൾ ലഭ്യമാക്കുന്ന രീതിയാണ് അന്വേഷണത്തിൽ ശ്രദ്ധയിൽപ്പെട്ടത്. സ്വന്തം പേരിൽ ബാങ്ക് അക്കൗണ്ട് തുറന്ന് അതിൻ്റെ പാസ്ബുക്ക്, ചെക്ക് ബുക്ക്, എടിഎം കാർഡ് തുടങ്ങിയവ കൈമാറുകയും അക്കൗണ്ടിലൂടെ പണം കൈമാറാൻ സൗകര്യം ഒരുക്കുകയും ചെയ്തതായി അന്വേഷണ ഉദ്യോഗസ്ഥർ കണ്ടെത്തിയിട്ടുണ്ട്. ഇതിന് പകരമായി ചിലർക്ക് കമ്മീഷൻ ലഭിച്ചതായും വ്യക്തമായിട്ടുണ്ട്. ഇത്തരം അക്കൗണ്ടുകളിലൂടെ ലക്ഷക്കണക്കിന് രൂപയുടെ ഇടപാടുകൾ നടന്നിട്ടുണ്ടെന്നാണ് പൊലീസിൻ്റെ കണ്ടെത്തൽ. വിദേശരാജ്യങ്ങളിൽ നിന്നുൾപ്പെടെ പണം എത്തിയതായും അതിൻ്റെ ഉറവിടം വ്യക്തമല്ലാത്തതായും കണ്ടെത്തിയതോടെയാണ് പരിശോധന വ്യാപകമാക്കിയത്. മ്യൂൾ അക്കൗണ്ടുകളിലൂടെ നടന്ന മുഴുവൻ ഇടപാടുകളും പരിശോധിച്ചശേഷം മാത്രമേ വ്യാപ്തി വ്യക്തമാകൂ എന്ന് അധികൃതർ അറിയിച്ചു.

നീലേശ്വരത്ത് രണ്ട് ലക്ഷം

നീലേശ്വരം പൊലീസ് നടത്തിയ അന്വേഷണത്തിൽ ബാങ്ക് അക്കൗണ്ട് കൈമാറിയെന്ന കണ്ടെത്തലിനെ തുടർന്ന് അബൂബക്കർ (23) എന്ന യുവാവിനെതിരെ കേസെടുത്തു. 2026 സെപ്റ്റംബർ 7 തിങ്കളാഴ്ച ബിഎൻഎസ് 112-ാം വകുപ്പ് പ്രകാരമാണ് കേസ് രജിസ്റ്റർ ചെയ്തത്. പൊലീസിന് ലഭിച്ച വിവരത്തെ തുടർന്ന് പയ്യന്നൂർ ആക്സിസ് ബാങ്കിൽ നിന്ന് കെവൈസി വിവരങ്ങൾ ശേഖരിച്ചപ്പോഴാണ് വിവരങ്ങൾ ലഭിച്ചത്. ജൂലൈ 20-ന് രണ്ട് ലക്ഷം രൂപയുടെ ഇടപാട് അക്കൗണ്ടിൽ നടന്നതായി കണ്ടെത്തി.

സുഹൃത്തായ ഷഫീറിൻ്റെ ആവശ്യപ്രകാരമാണ് അക്കൗണ്ട് തുറന്നതെന്നും പണം കൈമാറാൻ അക്കൗണ്ട് ഉപയോഗിക്കാൻ സമ്മതിച്ചതായും കിനാൻ പറഞ്ഞതായി എഫ്ഐആറിൽ പറയുന്നു. പാസ്പോർട്ട്, പാൻ കാർഡ് തുടങ്ങിയ രേഖകൾ ഉപയോഗിച്ചാണ് അക്കൗണ്ട് തുറന്നതെന്നും ബാങ്കിൽ നിന്ന് ലഭിച്ച രേഖകൾ ഷഫീർ കൈപ്പറ്റിയെന്നും മൊഴിയിലുണ്ട്. ഇതിന് പകരമായി 5000 രൂപ കമ്മീഷൻ ലഭിച്ചതായും പൊലീസ് രേഖപ്പെടുത്തിയിട്ടുണ്ട്. അക്കൗണ്ട് സൈബർ ക്രൈം റിപ്പോർട്ടിങ് പോർട്ടലിലും രേഖപ്പെടുത്തിയിട്ടുണ്ടെന്ന് പരിശോധനയിൽ കണ്ടെത്തിയിട്ടുണ്ട്.

മഞ്ചേശ്വരം സ്വദേശിയുടെ അക്കൗണ്ടിൽ 9 ലക്ഷം

മഞ്ചേശ്വരത്തും സമാനമായ രീതിയിലുള്ള സാമ്പത്തിക ഇടപാടാണ് പൊലീസ് കണ്ടെത്തിയത്.മഞ്ചേശ്വരം പൊലീസ് സ്റ്റേഷന്‍ പരിധിയിലെ യൂസഫ് മൂസ (48) എന്നയാൾക്കെതിരെയാണ് മഞ്ചേശ്വരം പൊലീസ് കേസ് രജിസ്റ്റർ ചെയ്തത്. എൻസിആർപി വഴി ലഭിച്ച വിവരങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് യൂസഫിൻ്റെ പേരിലുള്ള എസ്ബിഐ അക്കൗണ്ട് സാമ്പത്തിക തട്ടിപ്പുമായി ബന്ധപ്പെട്ടതായി കണ്ടെത്തിയത്. 2026 ഫെബ്രുവരി 24-ന് 6,10,584 രൂപയും മാർച്ച് 11-ന് മൂന്ന് ലക്ഷം രൂപയും ഉൾപ്പെടെ ആകെ 9,10,584 രൂപ അക്കൗണ്ടിലേക്ക് എത്തിയതായി പൊലീസ് കണ്ടെത്തി.

പണം സെക്കൻഡ് ഹാൻഡ് മൊബൈൽ ഫോണുകളുടെ വിൽപനയുമായി ബന്ധപ്പെട്ടതാണെന്നായിരുന്നു യൂസഫിൻ്റെ വിശദീകരണം. എന്നാൽ പണം ആരാണ് അയച്ചതെന്ന കാര്യത്തിൽ മറുപടി നൽകാനായില്ല. വാട്സ്ആപ്പ് ചാറ്റുകളിൽ സ്ക്രീൻഷോട്ടുകളും കണ്ടെത്തിയതായി എഫ്ഐആറിൽ പറയുന്നു. ഫോണിലെ വിവരങ്ങളും സാമ്പത്തിക ഇടപാടുകളും പൊലീസ് പരിശോധിച്ചുവരികയാണ്.

ജില്ലയിൽ കൂടുതൽ കേസുകൾ

ജില്ലയിൽ മേൽപറമ്പ്, കാസർകോട്, വിദ്യാനഗർ, ഹൊസ്ദുർഗ് എന്നിവിടങ്ങളിലാണ് കൂടുതൽ കേസുകൾ രജിസ്റ്റർ ചെയ്തിരിക്കുന്നത്. മഞ്ചേശ്വരം, ബേഡകം, ചന്തേര, നീലേശ്വരം, വെള്ളരിക്കുണ്ട്, ബേക്കൽ തുടങ്ങിയ സ്റ്റേഷനുകളിലും കേസുകളുണ്ട്. സ്വന്തം ബാങ്ക് അക്കൗണ്ട് മറ്റൊരാൾക്ക് ഉപയോഗിക്കാൻ നൽകുന്നത് നിയമക്കുരുക്കിലേക്ക് നയിക്കാവുന്ന നടപടിയാണെന്നും പൊലീസ് മുന്നറിയിപ്പ് നൽകുന്നു. പിടിച്ചെടുത്ത മൊബൈൽ ഫോണുകളും ബാങ്ക് രേഖകളും പരിശോധിക്കുന്നതോടെ കാസർകോട്ടെ തട്ടിപ്പിൻ്റെ കൂടുതൽ വിവരങ്ങൾ പുറത്തുവരുമെന്നാണ് അന്വേഷണ സംഘം പ്രതീക്ഷിക്കുന്നത്.

ഈ സൈബർ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: 26 held in Kasaragod during Operation Cy-Hunt for renting bank accounts to fraudsters.

#KasargodVartha #KasaragodNews #CyberCrime #OperationCyHunt #KeralaPolice #OnlineFraud #RenuNews