'നഗ്‌നനാക്കി പരിശോധനയ്ക്ക് വിധേയനാക്കി'; കണ്ണൂർ വിമാനത്താവളത്തിൽ കസ്റ്റംസ് ഉദ്യോഗസ്ഥരുടെ മാനസിക പീഡനമെന്ന് ആരോപണം; കാസർകോട് സ്വദേശിയായ പ്രവാസി മുഖ്യമന്ത്രിക്ക് പരാതി നൽകി

കാസർകോട്: (KasargodVartha) കണ്ണൂർ അന്താരാഷ്ട്ര വിമാനത്താവളത്തിൽ വെച്ച് കസ്റ്റംസ് ഉദ്യോഗസ്ഥരിൽ നിന്നും കടുത്ത മാനസിക പീഡനവും അപമാനകരമായ ദേഹപരിശോധനയും നേരിടേണ്ടി വന്നതായി യാത്രക്കാരൻ്റെ പരാതി. ദുബൈയിൽ ഇൻഫർമേഷൻ ടെക്നോളജി (ഐടി) മാനേജർ ആയി ജോലി ചെയ്യുന്ന കാസർകോട് എരിയാൽ സ്വദേശി ഹുസൈനാർ മഹ്ഷാദ് ആണ് കസ്റ്റംസ് ഉദ്യോഗസ്ഥർക്കെതിരെ ഗുരുതര ആരോപണങ്ങളുമായി രംഗത്തെത്തിയിരിക്കുന്നത്. മനുഷ്യാന്തസ്സിന് വിരുദ്ധമായ പെരുമാറ്റമാണ് ഉദ്യോഗസ്ഥരുടെ ഭാഗത്തുനിന്നും ഉണ്ടായതെന്നും വിഷയത്തിൽ അടിയന്തര ഇടപെടലും നിഷ്പക്ഷ അന്വേഷണവും ആവശ്യപ്പെട്ട് അദ്ദേഹം മുഖ്യമന്ത്രി വി ഡി സതീഷന് പരാതി നൽകി.

വിമാനത്താവളം മാറ്റിയതിന് ചോദ്യം ചെയ്യൽ

2026 ജൂലൈ 19 ന് രാവിലെ ഒമ്പത് മണിയോടെ ഫുജൈറയിൽ നിന്നുള്ള ഇൻഡിഗോ വിമാനത്തിലാണ് (PNR: O3HIYR) ഇദ്ദേഹം കണ്ണൂർ വിമാനത്താവളത്തിൽ എത്തിയത്. കാസർകോട്ടെ സ്വന്തം നാട്ടിലേക്ക് ഏറ്റവും അടുത്ത വിമാനത്താവളം ഏകദേശം 50 കിലോമീറ്റർ മാത്രം അകലെയുള്ള മംഗളൂരു ആണെങ്കിലും, കേരളത്തിലെ വിമാനത്താവളത്തെ പിന്തുണയ്ക്കണമെന്ന ആഗ്രഹവും ഒരു മാറ്റവും ആഗ്രഹിച്ചാണ് ആദ്യമായി കണ്ണൂർ വിമാനത്താവളം തെരഞ്ഞെടുത്തതെന്ന് അദ്ദേഹം പരാതിയിൽ പറയുന്നു. ഇതിനായി 350 ദിർഹം (ഏകദേശം 9,000 രൂപ) അധിക ടിക്കറ്റ് നിരക്കായും നാട്ടിലെത്താൻ 5,000 രൂപ ടാക്സി നിരക്കായും അധികമായി ചിലവഴിച്ചിരുന്നു.

ബാഗേജ് ശേഖരിച്ച ശേഷം കസ്റ്റംസ് പരിശോധനാ മേഖലയിൽ എത്തിയപ്പോൾ ഒരു വനിതാ കസ്റ്റംസ് ഉദ്യോഗസ്ഥ പാസ്‌പോർട്ട് വാങ്ങി പരിശോധിക്കുകയും, മംഗളൂരു വിമാനത്താവളം അടുത്തായിരിക്കെ എന്തുകൊണ്ടാണ് കണ്ണൂരിൽ ഇറങ്ങിയതെന്ന് ചോദിക്കുകയും ചെയ്തു. ഞാൻ കാര്യങ്ങൾ വിശദീകരിക്കുകയും ഇന്ത്യയിലെ ഏത് വിമാനത്താവളത്തിലൂടെയും യാത്ര ചെയ്യാൻ പൗരന് അവകാശമുണ്ടെന്ന് സൂചിപ്പിക്കുകയും ചെയ്തു.

വസ്ത്രം അഴിപ്പിച്ച് പരിശോധന

തുടർന്ന് ലഗേജ് പൂർണ്ണമായും സ്കാൻ ചെയ്തുവെങ്കിലും നിയമവിരുദ്ധ വസ്തുവോ പ്രഖ്യാപിക്കാത്ത സ്വർണമോ സംശയാസ്പദമായ സാധനങ്ങളോ കണ്ടെത്താനായില്ല. ഇതൊന്നും കണ്ടെത്താനാകാതിരുന്നിട്ടും ഒരു പ്രത്യേക മുറിയിലേക്ക് കൊണ്ടുപോയി ദേഹപരിശോധനയ്ക്ക് വിധേയനാക്കിയതായി പരാതിയിൽ ആരോപിക്കുന്നു. ഒരു ഘട്ടത്തിലും താൻ എതിർപ്പ് പ്രകടിപ്പിച്ചില്ലെന്നും എല്ലാ നിർദേശങ്ങളോടും പൂർണ്ണമായും സഹകരിച്ചുവെന്നും അദ്ദേഹം വ്യക്തമാക്കി.

പരിശോധനയ്ക്കിടെ ഷർട്ട് ഒഴികെയുള്ള എല്ലാ വസ്ത്രങ്ങളും അഴിച്ചുമാറ്റാൻ ആവശ്യപ്പെടുകയും സ്വകാര്യ ഭാഗങ്ങൾ ഉൾപ്പെടെ പരിശോധിക്കുകയും ചെയ്തു. വസ്ത്രങ്ങൾ വേർതിരിച്ച് സ്കാൻ ചെയ്തുവെങ്കിലും ശരീരത്തിൽ നിന്നോ വസ്ത്രങ്ങളിൽ നിന്നോ യാതൊന്നും കണ്ടെത്താൻ ഉദ്യോഗസ്ഥർക്ക് കഴിഞ്ഞില്ലെന്ന് പരാതിക്കാരൻ ചൂണ്ടിക്കാട്ടുന്നു.

പരിഹാസവും മാനസിക പീഡനവും

പരിശോധന കഴിഞ്ഞ് വസ്ത്രം ധരിച്ച് പുറത്തിറങ്ങിയപ്പോൾ നിരവധി കസ്റ്റംസ് ഉദ്യോഗസ്ഥരും വനിതകൾ ഉൾപ്പെടെ മറ്റ് വിമാനത്താവള ജീവനക്കാരും അവിടെ കൂട്ടം കൂടി നിൽക്കുകയും ഉറക്കെ ചിരിക്കുകയും തമ്മിൽ സംസാരിക്കുകയും ചെയ്യുകയായിരുന്നു. തന്നെ പരിഹസിക്കുകയാണെന്ന തോന്നൽ ഈ സാഹചര്യം ഉണ്ടാക്കിയെന്നും ഇത് അങ്ങേയറ്റം അപമാനകരമായിരുന്നുവെന്നും അദ്ദേഹം പറയുന്നു. വിദേശത്ത് യുദ്ധസാഹചര്യങ്ങളും സുരക്ഷാ ആശങ്കകളും കഠിനമായ ജോലി സമ്മർദ്ദവും മൂലം വലിയ മാനസിക ബുദ്ധിമുട്ടിലായിരുന്ന താൻ നാട്ടിൽ കുടുംബത്തോടൊപ്പം സമാധാനത്തോടെ കഴിയാമെന്ന പ്രതീക്ഷയിലാണ് എത്തിയതെന്നും എന്നാൽ ഈ അനുഭവം മാനസികമായി തകർത്തുവെന്നും പരാതിയിൽ വ്യക്തമാക്കുന്നു.

മുഖ്യമന്ത്രിയോടുള്ള പ്രധാന ആവശ്യങ്ങൾ

രാജ്യസുരക്ഷ ഉറപ്പാക്കുന്നതിനും സ്വർണ്ണക്കടത്ത് തടയുന്നതിനുമുള്ള പരിശോധനകളെ ബഹുമാനിക്കുന്നുണ്ടെങ്കിലും, പരിശോധന നടത്തിയ രീതിയെയും ഒന്നും കണ്ടെത്താനാകാതിരുന്നിട്ടും നേരിടേണ്ടി വന്ന അപമാനകരമായ പെരുമാറ്റത്തെയുമാണ് ചോദ്യം ചെയ്യുന്നതെന്ന് അദ്ദേഹം പറഞ്ഞു. കസ്റ്റംസ് കമ്മീഷണർക്കും ദേശീയ, സംസ്ഥാന മനുഷ്യാവകാശ കമ്മീഷനുകൾക്കും പരാതി നൽകിയിട്ടുണ്ട്. മുഖ്യമന്ത്രിയുടെ അടിയന്തര ഇടപെടൽ ആവശ്യപ്പെട്ട് അഞ്ച് പ്രധാന ആവശ്യങ്ങളാണ് അദ്ദേഹം മുന്നോട്ടുവെച്ചിരിക്കുന്നത്:

1. 2026 ജൂലൈ 19 രാവിലെ 9:30 മുതൽ 10:00 മണി വരെയുള്ള കണ്ണൂർ അന്താരാഷ്ട്ര വിമാനത്താവളത്തിലെ ബാഗേജ് ഏരിയ, കസ്റ്റംസ് പരിശോധനാ മേഖല, പരിശോധനാ മുറിയിലേക്കുള്ള ഇടനാഴി, പ്രവേശന കവാടം, മുറിയുടെ പുറംഭാഗം എന്നിവിടങ്ങളിലെ എല്ലാ സിസിടിവി ദൃശ്യങ്ങളും അന്വേഷണം തീരുംവരെ സംരക്ഷിക്കാൻ നിർദേശം നൽകണം.

2. ഈ സംഭവത്തെക്കുറിച്ച് നിഷ്പക്ഷവും സുതാര്യവുമായ അന്വേഷണം പ്രഖ്യാപിക്കണം.

3. ദേഹപരിശോധന നിയമാനുസൃതമായ നടപടിക്രമങ്ങൾ പാലിച്ചാണോ നടത്തിയതെന്നും, ഉദ്യോഗസ്ഥരുടെ പെരുമാറ്റം സേവനച്ചട്ടങ്ങൾക്കും മനുഷ്യാന്തസ്സിനും അനുസൃതമായിരുന്നോയെന്നും പരിശോധിക്കണം.

4. ഒന്നും കണ്ടെത്താനാകാതിരുന്നിട്ടും നേരിടേണ്ടി വന്ന അപമാനകരമായ പെരുമാറ്റത്തെക്കുറിച്ച് അന്വേഷണം നടത്തി ഉത്തരവാദികളായ ഉദ്യോഗസ്ഥർക്കെതിരെ നടപടി സ്വീകരിക്കണം.

5. ഭാവിയിൽ കേരളത്തിലെ വിമാനത്താവളങ്ങളിൽ എത്തുന്ന സാധാരണ യാത്രക്കാരും പ്രവാസികളും സമാനമായ മാനസിക പീഡനത്തിനോ അപമാനത്തിനോ ഇരയാകാതിരിക്കാനുള്ള വ്യക്തമായ മാർഗ്ഗനിർദേശങ്ങൾ ബന്ധപ്പെട്ട വകുപ്പുകൾക്ക് നൽകണം.

പ്രവാസികളുടെ യാത്രാ പ്രശ്നങ്ങളുമായി ബന്ധപ്പെട്ട ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്.

Article Summary: An NRI IT Manager from Kasaragod has filed a formal complaint with the Kerala Chief Minister alleging severe mental harassment and a humiliating body search by Customs officials at Kannur International Airport on July 19, 2026, despite finding no illegal items.

#KannurAirport #CustomsHarassment #NRIComplaint #Kasaragod #KeralaCM #HumanRights #KeralaNews #RenuNews