നിതിൻ രാജിൻ്റെ മരണം; ഡോ എം കെ റാമിനെ വീണ്ടും അറസ്റ്റ് ചെയ്തേക്കും, അപേക്ഷ കോടതിയിൽ

കണ്ണൂർ: (KasargodVartha) അഞ്ചരക്കണ്ടി ദന്തൽ കോളജ് ഒന്നാം വർഷ വിദ്യാർഥി നിതിൻ രാജിൻ്റെ മരണത്തിൽ ഡോക്ടർ എം കെ റാമിൻ്റെ അറസ്റ്റിന് അനുമതി തേടിക്കൊണ്ടുള്ള അപേക്ഷ കോടതി പരിഗണിക്കും. തലശേരി എസ് സി, എസ് ടി പ്രത്യേക കോടതിയാണ് അപേക്ഷ പരിഗണിക്കുന്നത്. അനുമതി ലഭിച്ചാൽ അന്വേഷണ സംഘം റാമിനെ വീണ്ടും അറസ്റ്റ് ചെയ്തേക്കും.

അറസ്റ്റിലെ വീഴ്ചയും കോടതിയുടെ വിമർശനവും

അറസ്റ്റ് ചെയ്ത നടപടിക്രമങ്ങളിലുണ്ടായ വീഴ്ച മൂലം റാമിനെ കോടതി വിട്ടയച്ച സാഹചര്യത്തിലാണ് അന്വേഷണ സംഘം വീണ്ടും അറസ്റ്റ് ചെയ്യാനുള്ള അനുമതിക്കായി കോടതിയെ സമീപിച്ചത്. പ്രതി എം കെ റാമിനെ അറസ്റ്റ് ചെയ്ത നടപടിയിലെ നിയമപരമായ വീഴ്ചകളിൽ പൊലീസിനെയും സർക്കാരിനെയും കഴിഞ്ഞ ദിവസം ഹൈകോടതി രൂക്ഷമായി വിമർശിച്ചിരുന്നു.

കേസ് ഏൽപ്പിക്കപ്പെട്ടിട്ടുള്ള പ്രത്യേക ജഡ്ജി അന്വേഷണ ഉദ്യോഗസ്ഥൻ്റെ ഭാഗത്തുനിന്നുള്ള നടപടികൾ പാലിക്കപ്പെട്ടിട്ടുണ്ടെന്ന് ഉറപ്പുവരുത്തേണ്ടതുണ്ടെന്നും, ഇത്തരം ഔപചാരികതകൾ പാലിച്ചുവെന്ന് ഉറപ്പുവരുത്തിയതിനു ശേഷം മാത്രമേ റിമാൻഡ് പരിഗണിക്കാൻ പാടുള്ളൂ എന്നും വ്യക്തമാക്കിക്കൊണ്ടാണ് തലശേരി പ്രിൻസിപ്പൽ സെഷൻസ് കോടതി നേരത്തെ റാമിനെ വിട്ടയച്ചത്.

അന്വേഷണം ക്രൈംബ്രാഞ്ചിന്; സംഘം കണ്ണൂരിൽ

പൊലീസിൻ്റെ നടപടിക്രമങ്ങളിലുണ്ടായ ഈ വീഴ്ചയിൽ സർക്കാരിന് കടുത്ത അതൃപ്തിയുണ്ടായിരുന്നു. ഇതോടെയാണ് കേസ് അന്വേഷണം പുതിയ ക്രൈംബ്രാഞ്ച് സംഘത്തിന് കൈമാറിയത്. മലപ്പുറം ക്രൈംബ്രാഞ്ച് എസ് പി മോഹനചന്ദ്രൻ്റെ നേതൃത്വത്തിലുള്ള പുതിയ അന്വേഷണ സംഘം നിലവിൽ കണ്ണൂരിൽ എത്തിയിട്ടുണ്ട്. 

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Police likely to re-arrest Dr MK Ram in Nithin Raj death case soon.

#NithinRajDeath #DrMKRam #AnjarakandyDentalCollege #CrimeBranch #ThalasseryCourt #KannurNews #MalayalamNews #AnjuNews