Murder Case | 'ഇൻസ്റ്റാഗ്രാം റീൽസിലൂടെയുള്ള ബന്ധം പ്രണയമായി, ഭർത്താവിനെ കൊല്ലാൻ കാമുകൻ വിഷം വാങ്ങി നൽകി, ഒടുവിൽ ശ്വാസം മുട്ടിച്ച് കൊല'; യുവാവിന്റെ മരണത്തിൽ ഞെട്ടിക്കുന്ന കണ്ടെത്തലുകൾ
● ഭാര്യയും കാമുകനും ചേർന്ന് ഭർത്താവിനെ കൊലപ്പെടുത്തിയതായി കണ്ടെത്തി.
● ഭർത്താവ് ദിവസങ്ങളോളം ചികിത്സയിൽ ആയിരുന്നു.
● 20-ാം തീയതി പുലർച്ചെയായിരുന്നു കൊലപാതകം.
മംഗ്ളുറു: (KasargodVartha) കാർക്കള താലൂക്കിലെ അജേക്കറിൽ നടന്ന കൊലപാതകത്തിൽ ഞെട്ടിക്കുന്ന പുതിയ വെളിപ്പെടുത്തലുകൾ പുറത്തുവന്നു. ബാലകൃഷ്ണ (44) എന്നയാളെ കൊലപ്പെടുത്തിയ കേസിൽ ഭാര്യ പ്രതിമയും കാമുകൻ ദിലീപ് ഹെഗ്ഡെയുമാണ് പൊലീസ് പിടിയിലായത്. ദിവസങ്ങളോളം പനിയും ഛർദിയും അനുഭവപ്പെട്ടതിനെ തുടർന്ന് വിവിധ ആശുപത്രികളിൽ ചികിത്സയിലായിരുന്നു ബാലകൃഷ്ണ.
സുഖം പ്രാപിച്ചതിന് ശേഷം ഒക്ടോബർ 19ന് വീട്ടിലേക്ക് മാറ്റിയിരുന്നു. എന്നാൽ, അടുത്ത ദിവസം പുലർച്ചെ 3.30 ഓടെ ശബ്ദം കേട്ട് പിതാവ് സഞ്ജീവ എത്തിയപ്പോൾ ബാലകൃഷ്ണയെ അബോധാവസ്ഥയിൽ കണ്ടെത്തി. ആശുപത്രിയിലെത്തിച്ചെങ്കിലും ഡോക്ടർ മരണം സ്ഥിരീകരിച്ചു. ബാലകൃഷ്ണയുടെ മരണത്തിൽ ദുരൂഹതയുണ്ടെന്ന് ആരോപിച്ച് സഹോദരൻ രാമകൃഷ്ണ (42) നൽകിയ പരാതിയിൽ അജേക്കർ പൊലീസ് നടത്തിയ അന്വേഷണത്തിലാണ് കൂടുതൽ വിവരങ്ങൾ പുറത്തുവന്നത്.
പൊലീസ് പറയുന്നത്:
'ഇൻസ്റ്റാഗ്രാമിൽ സജീവമായിരുന്ന ബ്യൂട്ടി പാർലർ ഉടമയായ പ്രതിമ, പലപ്പോഴും ഭർത്താവിനൊപ്പം റീൽസ് വീഡിയോകൾ ചെയ്തിരുന്നു. ഈ സമയത്താണ് കാർക്കളയിൽ നിന്നുള്ള ദിലീപ് ഹെഗ്ഡെയുമായി ഇൻസ്റ്റാഗ്രാമിൽ അടുത്ത ബന്ധത്തിലായത്. സൗഹൃദം ഉടൻ തന്നെ പ്രണയമായി മാറി, ബാലകൃഷ്ണ അവരുടെ ബന്ധത്തിന് ഒരു തടസമായി മാറി. ഇതോടെ ഇരുവരും ചേർന്ന് കൊലപാതകം ആസൂത്രണം ചെയ്തു.
ദിലീപ്, പ്രതിമയ്ക്ക് വിഷം നൽകി അത് ക്രമേണ ബാലകൃഷ്ണയ്ക്ക് നൽകാൻ നിർദേശിച്ചു. ഇത് അദ്ദേഹത്തിൻ്റെ ആരോഗ്യം മോശമാകാൻ കാരണമായി. ഒടുവിൽ, ഒക്ടോബർ 20ന് പ്രതിമ ദിലീപിനെ വീട്ടിലേക്ക് ക്ഷണിച്ചു, അവിടെ ഇരുവരും ചേർന്ന് ബാലകൃഷ്ണയെ ബെഡ്ഷീറ്റ് ഉപയോഗിച്ച് ശ്വാസം മുട്ടിച്ച് കൊലപ്പെടുത്തി. പ്രതിമയും ദിലീപും ഇപ്പോൾ പൊലീസ് കസ്റ്റഡിയിലാണ്
#MurderCase#LoveAffair#InstagramCrime#KarnatakaNews#TrueCrime
