മൊഗ്രാൽ കോട്ട റോഡിലും മാലിന്യം റോഡിലേക്ക് വലിച്ചെറിയുന്നതായി പരാതി

മൊഗ്രാൽ: (KasargodVartha) കോട്ട റോഡിൽ വീണ്ടും മാലിന്യം വലിച്ചെറിഞ്ഞു, സിസിടിവി സംവിധാനങ്ങളില്ലാത്ത ഇടങ്ങൾ നോക്കി പ്ലാസ്റ്റിക് സഞ്ചികളിലാക്കി മാലിന്യം ഉപേക്ഷിക്കുന്നത് മൊഗ്രാലിൽ പതിവായി മാറുകയാണ്. 

കഴിഞ്ഞാഴ്ച മൊഗ്രാൽ ലീഗ് ഓഫീസിനടുത്തുള്ള ഓവുചാലിലും ദേശീയപാത സർവീസ് റോഡിലുമാണ് ഭക്ഷണാവശിഷ്ടങ്ങൾ നിറഞ്ഞ മാലിന്യം തള്ളിയിരുന്നതെങ്കിൽ, കഴിഞ്ഞ ദിവസം കോട്ട റോഡിലും സമാനമായ രീതിയിൽ മാലിന്യം വലിച്ചെറിഞ്ഞ നിലയിൽ കണ്ടെത്തി.

രാത്രിയുടെ മറവിൽ, ഇരുചക്രവാഹനങ്ങളിൽ വരുന്നവരാണ് മാലിന്യം പൊതുവിടങ്ങളിൽ തള്ളുന്നതെന്ന് പ്രദേശവാസികൾ പറയുന്നു. പൊതുസ്ഥലങ്ങളിൽ മാലിന്യം വലിച്ചെറിയുന്നവർക്കെതിരെ പോലീസ്, ആരോഗ്യവകുപ്പ്, പഞ്ചായത്ത് എൻഫോഴ്സ്മെന്റ് സ്ക്വാഡ് എന്നിവർ പിഴ ഉൾപ്പെടെയുള്ള ശക്തമായ നടപടികളാണ് സ്വീകരിക്കുന്നത്. 

പലയിടങ്ങളിലും നാട്ടുകാർ മാലിന്യം തള്ളുന്നവരെ പിടികൂടി അധികൃതർക്ക് കൈമാറിയതിനെത്തുടർന്ന് നടപടികൾ എടുത്തിട്ടുണ്ട്. മാലിന്യം വലിച്ചെറിയുന്നത് ശ്രദ്ധയിൽപ്പെട്ടാൽ തെളിവ് സഹിതം പഞ്ചായത്ത് അധികൃതരെ അറിയിക്കുന്ന പൊതുജനങ്ങൾക്ക് സർക്കാർ പാരിതോഷികവും പ്രഖ്യാപിച്ചിട്ടുണ്ട്.

ജലാശയങ്ങളിലും പൊതുവിടങ്ങളിലും മാലിന്യം തള്ളുന്നത് പ്രദേശവാസികൾക്കിടയിൽ ജലജന്യ രോഗങ്ങളുടെയും പകർച്ചവ്യാധികളുടെയും ഭീഷണി ഉയർത്തുന്നുണ്ട്. എലിപ്പനി, മഞ്ഞപ്പിത്തം, ഡെങ്കിപ്പനി, മലേറിയ തുടങ്ങിയ രോഗങ്ങൾ ഈ പ്രദേശങ്ങളിൽ മുൻപും റിപ്പോർട്ട് ചെയ്യപ്പെട്ടിട്ടുള്ളതാണ്. 

അതിനാൽ, മാലിന്യം വലിച്ചെറിയുന്നവർക്കെതിരെ ആരോഗ്യവകുപ്പും തദ്ദേശസ്വയംഭരണ സ്ഥാപനങ്ങളും കൂടുതൽ ശക്തമായ നടപടികൾ സ്വീകരിക്കണമെന്നാണ് നാട്ടുകാരുടെ പ്രധാന ആവശ്യം.

മൊഗ്രാലിലെ മാലിന്യം വലിച്ചെറിയൽ തടയാൻ എന്തു ചെയ്യാൻ കഴിയും? നിങ്ങളുടെ അഭിപ്രായം പങ്കുവെക്കുക!

Article Summary: Mogral Kotta Road faces ongoing garbage dumping, posing health risks.

#Mogral #GarbageDumping #Kasaragod #PublicHealth #WasteManagement #LocalNews