പണം ആവശ്യപ്പെട്ട് നാലംഗ സംഘം മരവ്യാപാരിയെ വീട്ടില്‍ നിന്ന് വിളിച്ചിറക്കിക്കൊണ്ടുപോയി വായില്‍ തുണി തിരുകി മര്‍ദിച്ചതായി പരാതി

കുമ്പള: (www.kasargodvartha.com 30.01.2019) പണം ആവശ്യപ്പെട്ട് നാലംഗ സംഘം മരവ്യാപാരിയെ വീട്ടില്‍ നിന്ന് വിളിച്ചിറക്കിക്കൊണ്ടുപോയി വായില്‍ തുണി തിരുകി മര്‍ദിച്ചതായി പരാതി. പേരാല്‍ നീരോളിയിലെ മുഹമ്മദിനാണ് (48) മര്‍ദനമേറ്റത്. പരിക്കേറ്റ മുഹമ്മദിനെ കുമ്പള സഹകരണാശുപത്രിയില്‍ പ്രവേശിപ്പിച്ചു. ചൊവ്വാഴ്ച രാത്രി 10 മണിയോടെയാണ് സംഭവം.

മരം ആവശ്യപ്പെട്ട് വീട്ടിലെത്തിയ സംഘം കൂട്ടിക്കൊണ്ടുപോവുകയും അതിനിടെ സംഘത്തിലെ ഒരാള്‍ മരക്കഷ്ണം കൊണ്ട് അടിച്ചു വീഴ്ത്തുകയായിരുന്നുവെന്നും ആശുപത്രിയില്‍ കഴിയുന്ന മുഹമ്മദ് പരാതിപ്പെട്ടു. ബഹളം വെച്ചപ്പോള്‍ വായില്‍ തുണി തിരുകി മര്‍ദിക്കുകയും ഒരു ലക്ഷം രൂപ തന്നില്ലെങ്കില്‍ കൊന്നു കളയുമെന്ന് ഭീഷണിപ്പെടുത്തിയതായും പരാതിയില്‍ പറയുന്നു. സംഭവവുമായി ബന്ധപ്പെട്ട് ഒരാളെ കുമ്പള പോലീസ് കസ്റ്റഡിയിലെടുത്തതായാണ് വിവരം.