കാർ വഴിയാത്രക്കാരനെയും ബൈക്കിനെയും ഇടിച്ചു; വയോധികൻ്റെ നില ഗുരുതരം

മേൽപറമ്പ്: (KasargodVartha) കാർ വഴിയാത്രക്കാരനെയും റോഡരികിൽ നിർത്തിയിട്ടിരുന്ന ബൈക്കിനെയും ഇടിച്ചിട്ടു. അപകടത്തിൽ ഗുരുതരമായി പരിക്കേറ്റ വയോധികൻ ആശുപത്രിയിൽ ചികിത്സയിലാണ്. തിങ്കളാഴ്ച (22.06.2026) രാവിലെ 9.30 ഓടെ സംസ്ഥാന പാതയിൽ കളനാട് വില്ലേജ് ഓഫീസിന് മുന്നിലായിരുന്നു അപകടം.

തലയ്ക്ക് പരിക്കേറ്റു

കട്ടക്കാലിൽ താമസിക്കുന്ന മുഹമ്മദ് കുഞ്ഞി ചെർക്കളയ്ക്കാണ് (65) പരിക്കേറ്റത്. റോഡരികിലൂടെ നടന്നുപോകുന്നതിനിടെയാണ് മാരുതി സ്വിഫ്റ്റ് കാർ ഇടിച്ചത്. ഇടിയുടെ ആഘാതത്തിൽ മുഹമ്മദ് കുഞ്ഞി റോഡിലേക്ക് വീണ് തലയ്ക്ക് പരിക്കേൽക്കുകയായിരുന്നു. തുടർന്ന് നിയന്ത്രണം വിട്ട കാർ സമീപത്ത് നിർത്തിയിട്ടിരുന്ന ബൈക്കിലും ഇടിച്ചു. കീഴൂർ സ്വദേശിയുടെ ബൈക്കിലാണ് കാർ ഇടിച്ചത്. ഇതിൽ ആർക്കും പരിക്കില്ല.

കാർ നിർത്താതെ പോയി

അപകടത്തിനുശേഷം കാർ നിർത്താതെ ഓടിച്ചുപോകുകയായിരുന്നു. അപകടം കണ്ട നാട്ടുകാരാണ് രക്ഷാപ്രവർത്തനം നടത്തി പരിക്കേറ്റ മുഹമ്മദ് കുഞ്ഞിയെ ആശുപത്രിയിലെത്തിച്ചത്. നിലവില്‍ കാസര്‍കോട്ടെ ആശുപത്രിയിൽ ചികിത്സയിലാണ് മുഹമ്മദ് കുഞ്ഞി.

സംഭവത്തെ തുടർന്ന് മേൽപറമ്പ് പൊലീസ് സ്ഥലത്തെത്തി അന്വേഷണം ആരംഭിച്ചു. അപകടമുണ്ടാക്കിയ ശേഷം നിർത്താതെ കടന്നുകളഞ്ഞ കാറിനെയും ഡ്രൈവറെയും കണ്ടെത്തുന്നതിനുള്ള ശ്രമങ്ങൾ പൊലീസ് തുടരുകയാണ്. സമീപ പ്രദേശങ്ങളിലെ സിസിടിവി ദൃശ്യങ്ങൾ ഉൾപ്പെടെ പരിശോധിച്ചുവരികയാണെന്ന് പൊലീസ് അറിയിച്ചു.

ഈ വാഹനാപകട വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകള്‍ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: A 65-year-old pedestrian was injured after being hit by a car that also struck a parked bike and fled the scene in Melparamba.

#MelparambaNews #KasaragodNews #RoadAccident #HitAndRun #KeralaPolice #LocalNews #RenuNews