കാറിൽ കടത്തുകയായിരുന്ന 72 ലക്ഷത്തിലധികം രൂപയുടെ കുഴൽപ്പണം പിടികൂടി; ദമ്പതികളും ഡ്രൈവറും പിടിയിൽ

മഞ്ചേശ്വരം: (KasargodVartha) കാറിൽ കടത്തുകയായിരുന്ന 72 ലക്ഷത്തിലധികം രൂപയുടെ കുഴൽപ്പണം മഞ്ചേശ്വരം പോലീസ് പിടികൂടി. വ്യാഴാഴ്ച (16.10.2025) രാവിലെ 7.45-ഓടെ ഹൈവേ പട്രോളിംഗിനിടെ സംശയാസ്പദമായി കണ്ട കാറിനെ പോലീസ് തടഞ്ഞ് പരിശോധിച്ചപ്പോഴാണ് വൻതുക കണ്ടെത്തിയത്. മംഗളൂരു ഭാഗത്തുനിന്ന് കാസർകോട്ടേക്ക് വരികയായിരുന്ന കാറിലാണ് പണം കടത്തിയത്.

വാഹനത്തിൽ മംഗളൂരിൽ താമസക്കാരനായ തുക്കാറാം എന്നയാളും അദ്ദേഹത്തിൻ്റെ ഭാര്യയുമാണ് ഉണ്ടായിരുന്നത്. കാറോടിച്ചത് അക്ഷയ് എന്നയാളാണ്. വാഹനം പോലീസിനെ കണ്ട് സംശയാസ്പദമായി നിർത്തിയതിനെ തുടർന്നാണ് പോലീസ് പരിശോധന നടത്തിയത്. പരിശോധനയിലാണ് 72 ലക്ഷത്തിലധികം രൂപയുടെ കുഴൽപ്പണം കണ്ടെത്തിയത്.

കാറിൽ ഉണ്ടായിരുന്ന ദമ്പതികൾക്ക് പണത്തിൻ്റെ ഉറവിടം വ്യക്തമാക്കാനായില്ലെന്ന് കാസർകോട് എ.എസ്.പി. പറഞ്ഞു. പണം സ്വർണ്ണം വിറ്റ് കിട്ടിയതാണെന്ന് അവർ പറഞ്ഞിരുന്നുവെങ്കിലും അതിനുള്ള രേഖ ഹാജരാക്കാൻ അവർക്ക് കഴിഞ്ഞില്ല. പണത്തിൻ്റെ മഹസർ തയ്യാറാക്കി കോടതിയിൽ ഹാജരാക്കുമെന്നും സ്ഥലത്ത് എത്തിയ എ.എസ്.പി. വ്യക്തമാക്കി.

പണം തിരഞ്ഞെടുപ്പ് ചെലവിനായോ കള്ളപ്പണം ഇടപാടിനായോ കടത്തിയതാണോയെന്നതിൽ പോലീസ് വ്യക്തത വരുത്താനാണ് ശ്രമിക്കുന്നത്. പണം പിടിച്ചെടുത്തതിനെ തുടർന്ന് വാഹനവും യാത്രക്കാരെയും പോലീസ് കസ്റ്റഡിയിൽ എടുത്തിട്ടുണ്ട്. പണത്തിൻ്റെ ഉറവിടം കണ്ടെത്തുന്നതിനായി മഞ്ചേശ്വരം പോലീസ് വിശദമായ അന്വേഷണം ആരംഭിച്ചിട്ടുണ്ട്. കൂടുതൽ വിവരങ്ങൾ പോലീസ് പുറത്ത് വിട്ടിട്ടില്ല.

നിങ്ങളുട അഭിപ്രായം പങ്കുവെക്കൂ.

Article Summary: Manjeshwaram Police seized over 72 lakh Hawala money from a car; a couple and the driver were detained.

#Hawala #Kasaragod #Manjeshwaram #PoliceAction #BlackMoney #MoneyLaundering