അമ്മയെ കൊന്ന് കത്തിച്ച സംഭവം: മകൻ 'സൈക്കോ' എന്ന് നാട്ടുകാർ; 'ഉപയോഗിച്ചത് ടർപ്പന്റൈൻ'; മെൽവിൻ്റെ മൊഴി പുറത്ത്

മഞ്ചേശ്വരം: (KasargodVartha) അമ്മയെ കൊലപ്പെടുത്തിയ ശേഷം കത്തിച്ച സംഭവത്തിൽ മകൻ മെൽവിൻ ഒരു അന്തർമുഖനായ സൈക്കോ ആണെന്ന് നാട്ടുകാർ വെളിപ്പെടുത്തുന്നു. നാട്ടുകാരുമായി ഇയാൾക്ക് അധികം അടുപ്പമുണ്ടായിരുന്നില്ലെന്നും, പെരുമാറ്റത്തിൽ അസ്വാഭാവികതകൾ പ്രകടിപ്പിച്ചിരുന്നുവെന്നും അവർ പറയുന്നു. മെൽവിന് അധികം സുഹൃത്തുക്കളും ഉണ്ടായിരുന്നില്ല. അതേസമയം, കേസിൽ പ്രതിയുടെ മൊഴി പുറത്തുവന്നിട്ടുണ്ട്.

വീടും സ്ഥലവും തന്റെ പേരിൽ എഴുതി നൽകണമെന്നും, കല്യാണം കഴിക്കാൻ വേണ്ടിയും സ്ഥലം പണയം വെച്ച് വിദേശത്ത് പോകാൻ വേണ്ടിയുമായിരുന്നു മെൽവിൻ മാതാവിനോട് ആവശ്യപ്പെട്ടിരുന്നത്. അമ്മയെയും ബന്ധുവായ യുവതിയെയും തീ കൊളുത്താൻ പെട്രോളല്ല, മറിച്ച് ടർപ്പന്റൈൻ ആണ് ഉപയോഗിച്ചതെന്ന സൂചനയും ഇപ്പോൾ പുറത്തുവരുന്നുണ്ട്.

മാതാവ് ഫിൽഡയെ അടിച്ചു കൊന്ന ശേഷമാണ് കത്തിച്ചതെന്ന് മെൽവിൻ പോലീസിന് മൊഴി നൽകി. പ്രതിയുമായി നടത്തിയ തെളിവെടുപ്പിൽ കൊലപാതകത്തിന് ഉപയോഗിച്ച ആയുധങ്ങൾ പോലീസ് കണ്ടെടുത്തു. കൊല്ലൂരിൽ വെച്ച് പിടിയിലായ പ്രതിയെ ചോദ്യം ചെയ്തപ്പോഴാണ് കൊലപാതകത്തെക്കുറിച്ചുള്ള കൂടുതൽ വിവരങ്ങൾ പുറത്തുവന്നത്. 

അമ്മ ഫിൽഡയുടെ പേരിലുള്ള വീടും സ്ഥലവും തന്റെ പേരിൽ എഴുതി നൽകണമെന്ന് മെൽവിൻ നിരന്തരമായി സമ്മർദ്ദം ചെലുത്തിയിരുന്നു. ദിവസവും വൈകുന്നേരം മദ്യപിച്ച് വീട്ടിലെത്തുന്ന മെൽവിൻ സ്വത്തിനെച്ചൊല്ലി അമ്മയുമായി വഴക്കിടാറുണ്ടായിരുന്നെന്നും പോലീസ് പറയുന്നു. 

സംഭവം നടന്ന ദിവസം മദ്യപിച്ച് വീട്ടിലെത്തിയ മെൽവിൻ അമ്മയെ മർദ്ദിക്കുകയായിരുന്നുവെന്ന് പോലീസിന് നൽകിയ മൊഴിയിൽ പറയുന്നു. വടി കൊണ്ടുള്ള അടിയേറ്റ ഫിൽഡ ബോധരഹിതയായി. മരിച്ചെന്ന് ഉറപ്പിച്ചതോടെ കത്തിച്ചുവെന്നും മെൽവിൻ പോലീസിനോട് സമ്മതിച്ചു. 

വിവാഹം കഴിക്കാൻ താൽപ്പര്യമുണ്ടായിരുന്നെന്നും, അതിനുശേഷം ഗൾഫിലേക്ക് പോകാനായിരുന്നു പദ്ധതിയെന്നും പ്രതിയുടെ മൊഴിയിൽ വ്യക്തമാകുന്നുണ്ട്. ഇതിനായി സ്വത്ത് കൈക്കലാക്കി ബാങ്കിൽ നിന്ന് വായ്പയെടുക്കാനായിരുന്നു മെൽവിന്റെ നീക്കം. ഫിൽഡ സ്വത്ത് എഴുതി നൽകാൻ വിസമ്മതിച്ചതാണ് കൊലപാതകത്തിലേക്ക് നയിച്ചത്.

സ്വത്ത് മെൽവിന്റെ പേരിൽ എഴുതി നൽകാതിരിക്കാൻ ഫിൽഡയ്ക്ക് പിന്തുണ നൽകിയതാണ് ബന്ധുവായ ലൊലിറ്റയ്ക്ക് നേരെയുള്ള ആക്രമണത്തിന് കാരണമെന്നാണ് കരുതുന്നത്. എന്നാൽ ലൊലിറ്റയുടെ മൊഴി ഇതുവരെ പുറത്തുവന്നിട്ടില്ല. തെളിവെടുപ്പിന് ശേഷം കോടതിയിൽ ഹാജരാക്കിയ പ്രതിയെ രണ്ടാഴ്ചത്തേക്ക് റിമാൻഡ് ചെയ്തു. 

ബുധനാഴ്ച പുലർച്ചെയാണ് മെൽവിൻ ഫിൽഡയെ കൊലപ്പെടുത്തിയത്. പിന്നാലെ കർണാടകയിലേക്ക് കടന്ന പ്രതിയെ മഞ്ചേശ്വരം പോലീസ് പിന്തുടർന്ന് മണിക്കൂറുകൾക്കകം പിടികൂടുകയായിരുന്നു. കൂടുതൽ അന്വേഷണങ്ങൾക്കും തെളിവെടുപ്പിനുമായി പ്രതിയെ വീണ്ടും കസ്റ്റഡിയിൽ വാങ്ങാനുള്ള ശ്രമത്തിലാണ് പോലീസ്.

ഈ സംഭവത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: Son murdered and incinerated mother over property dispute in Manjeshwaram.

#Manjeshwaram #Murder #CrimeNews #PropertyDispute #KeralaCrime #LocalNews