മഞ്ചേശ്വരത്ത് യുവാവിനെ കൊലപ്പെടുത്തിയതാണെന്ന് സ്ഥിരീകരിച്ച് പൊലീസ്; നെഞ്ചിൽ ആഴത്തിലുള്ള മുറിവും തലയ്ക്ക് പരിക്കും, രക്ഷപ്പെട്ട പ്രതിക്കായി തെരച്ചിൽ ഊർജിതം

മഞ്ചേശ്വരം: (KasargodVartha) അംഗഡിപ്പദവിൽ പഴയ ഇരുനില വീടിൻ്റെ അടുക്കളയിൽ കർണാടക സ്വദേശിയെ മരിച്ച നിലയിൽ കണ്ടെത്തിയ സംഭവം കൊലപാതകമാണെന്ന് പൊലീസ് സ്ഥിരീകരിച്ചു. നോർത്ത് കർണാടകയിലെ ഹൊസപ്പേട്ട, ലിംഗനായിക്കനഹള്ളി സ്വദേശിയായ പരേതനായ പീര നായികിൻ്റെ മകൻ രമേശ (38) ആണ് കൊല്ലപ്പെട്ടത്.

വെള്ളിയാഴ്ച (സെപ്റ്റംബർ 4) രാത്രിയാണ് അംഗഡിപ്പദവിൽ നരസിംഹമൂർത്തി എന്നയാളുടെ ഉടമസ്ഥതയിലുള്ള പഴയ ഇരുനില വീടിൻ്റെ അടുക്കളയിൽ രമേശയുടെ മൃതദേഹം കണ്ടെത്തിയത്. വീട് വാടകയ്ക്കെടുത്തിരുന്ന കൃഷ്ണപ്പയാണ് മൃതദേഹം കണ്ട വിവരം വീട്ടുടമ നരസിംഹമൂർത്തിയെ അറിയിച്ചത്. 

തുടർന്ന് അദ്ദേഹം സ്ഥലത്തെത്തിയശേഷമാണ് പൊലീസിന് വിവരം കൈമാറിയത്. വിവരമറിഞ്ഞ് എഎസ്പി അശോക് അച്യുത്, മഞ്ചേശ്വരം ഇൻസ്പെക്ടർ എംവി വിഷ്ണുപ്രസാദ് എന്നിവരുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി വിശദമായ പരിശോധന നടത്തി.

ക്രൂരമായ ആക്രമണത്തിൻ്റെ ലക്ഷണങ്ങൾ

നെഞ്ചിൽ ആഴത്തിലുള്ള മുറിവുകളും തലയ്ക്ക് ഗുരുതരമായി പരിക്കേറ്റ നിലയുമാണ് ഇൻക്വസ്റ്റിൽ കണ്ടെത്തിയത്. ശരീരത്തിൻ്റെ മറ്റു ഭാഗങ്ങളിലും മുറിവുകൾ കണ്ടെത്തിയിട്ടുണ്ട്. സംഭവസ്ഥലത്ത് പിടിവലിയും മറ്റും നടന്നതിൻ്റെ ലക്ഷണങ്ങൾ വ്യക്തമാണ്. അടുക്കളയിൽ ഉപയോഗിക്കുന്ന ആട്ടുകല്ലിൽ രക്തക്കറ കണ്ടെത്തിയതിനാൽ ഇതിൽ തലയിടിപ്പിച്ചാണ് കൊലപാതകം നടത്തിയതെന്നാണ് പൊലീസ് സംശയിക്കുന്നത്. രമേശയെ ഈ വീട്ടിലേക്ക് കൂട്ടിക്കൊണ്ടുവന്ന വ്യക്തിയാണ് കൃത്യത്തിന് പിന്നിലെന്നാണ് അന്വേഷണത്തിൽ വ്യക്തമാകുന്നത്. ഇയാളുടെ പേരും രമേശൻ എന്ന് തന്നെയാണ് വിവരം. ഇയാളും കർണാടക സ്വദേശിയാണെന്ന് പൊലീസിന് വിവരം ലഭിച്ചിട്ടുണ്ട്.

പ്രതിക്കായി അന്വേഷണം ഊർജിതം

സംഭവത്തിന് ശേഷം ഒളിവിൽ പോയ പ്രതിക്കായി കർണാടക കേന്ദ്രീകരിച്ച് പൊലീസ് അന്വേഷണം ഊർജിതമാക്കിയിട്ടുണ്ട്. പ്രതിയുടെ മൊബൈൽ ഫോൺ പൊലീസ് കസ്റ്റഡിയിലെടുത്തിട്ടുണ്ട്. ഇവിടെ താമസിക്കുന്ന മറ്റൊരാൾക്ക് ഫോൺ വിളിക്കാൻ നൽകിയതാണെന്നാണ് വിവരം. ഇതിനിടയിലാണ് കൊലപാതകം നടന്നതെന്നാണ് സംശയിക്കുന്നത്. പ്രതി ഫോൺ കൈവശം വെക്കാതെയാണ് രക്ഷപ്പെട്ടിരിക്കുന്നത്. അതിനാൽ ടവർ ലൊക്കേഷൻ കേന്ദ്രീകരിച്ചുള്ള അന്വേഷണത്തിന് ഇത് തടസ്സമായിട്ടുണ്ട്. 

ശനിയാഴ്ച (സെപ്റ്റംബർ 5) രാവിലെ ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്മോർട്ടത്തിനായി കാസർകോട് ജനറൽ ആശുപത്രി മോർച്ചറിയിലേക്ക് മാറ്റി. പോസ്റ്റ്മോർട്ടം റിപ്പോർട്ട് ലഭിക്കുന്നതോടെ മരണകാരണം സംബന്ധിച്ച് കൂടുതൽ വ്യക്തത ലഭിക്കുമെന്ന് പൊലീസ് കരുതുന്നു. മരിച്ച രമേശയുടെ ബന്ധുക്കൾ മഞ്ചേശ്വരത്ത് എത്തിയിട്ടുണ്ട്. പ്രതിയെ പിടികൂടി ചോദ്യം ചെയ്യുന്നതോടെ കൊലപാതകത്തിൻ്റെ ചുരുളഴിയുമെന്നാണ് പൊലീസിൻ്റെ പ്രതീക്ഷ.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Police confirmed the murder of a 38-year-old Karnataka native in Manjeshwaram, with a manhunt underway for the absconding suspect. 

#KasargodVartha #ManjeshwaramNews #KasaragodNews #CrimeNewsKerala #Angadiapadavu #MurderInvestigation #KeralaPolice #MalayalamNews #LocalNews #Kasaragod #AparnaNews