സ്കൂളിൽ പാചകത്തിനിടെ സാരിയിൽ തീ പടർന്ന് പൊള്ളലേറ്റ തൊഴിലാളി മരിച്ചു

മഞ്ചേശ്വരം: (KasargodVartha) സ്കൂളിൽ ഉച്ചഭക്ഷണം പാചകം ചെയ്യുന്നതിനിടയിൽ ഗ്യാസ് സ്റ്റൗവിൽ നിന്ന് തീ പടർന്ന് ഗുരുതരമായി പൊള്ളലേറ്റ പാചക തൊഴിലാളി മരിച്ചു. മഞ്ചേശ്വരം ഗവൺമെന്റ് സ്കൂളിലെ പാചക തൊഴിലാളിയായ ഉദ്യാവർ മാട സ്വദേശിനി ജയ (56) ആണ് മരിച്ചത്.

ഡിസംബർ 16-നായിരുന്നു അപകടം സംഭവിച്ചത്. സ്കൂളിലെ പാചകപ്പുരയിൽ ഉച്ചഭക്ഷണം തയ്യാറാക്കുന്നതിനിടെ ഗ്യാസ് സ്റ്റൗവിൽ നിന്നുള്ള തീ ജയ ധരിച്ചിരുന്ന സാരിയിലേക്ക് പടർന്നു പിടിക്കുകയായിരുന്നു. ജയയുടെ നിലവിളി കേട്ട് അധ്യാപകരും ജീവനക്കാരും ഓടിയെത്തി ഉടൻ തന്നെ ആശുപത്രിയിൽ എത്തിച്ചു. 

ഗുരുതരമായി പൊള്ളലേറ്റതിനെത്തുടർന്ന് വിദഗ്ധ ചികിത്സയ്ക്കായി മംഗളൂരിലെ ആശുപത്രിയിലേക്ക് മാറ്റിയിരുന്നു. ചികിത്സയിലിരിക്കെ ഞായറാഴ്ച രാത്രി മംഗളൂരിലെ ആശുപത്രിയിൽ വച്ചാണ് മരണം സംഭവിച്ചത്.

കഴിഞ്ഞ 20 വർഷത്തോളമായി മഞ്ചേശ്വരം സ്കൂളിൽ പാചക തൊഴിലാളിയായി ജയ സേവനമനുഷ്ഠിച്ചു വരികയായിരുന്നു. ഹരിണാക്ഷയാണ് ഭർത്താവ്. അമ്മ: യമുന. മക്കൾ: ഹിതേഷ്, പ്രസന്ന ഗണേഷ്, ദീപ. മരുമകൻ: സുരേഷ്. സഹോദരങ്ങൾ: കുസുമ, പുഷ്പ, ശോഭ, യോഗീഷ്, ദിവാകര.

ഈ വാർത്ത ഷെയർ ചെയ്യൂ.

Article Summary: Mid-day meal worker Jaya passes away after a fire accident at Manjeshwar Government School kitchen.

#ManjeshwarNews #SchoolAccident #KeralaNews #KasargodVartha #TragicDemise #SafetyFirst