മഞ്ചേശ്വരം എംഡിഎംഎ കേസ്: തായ്‌ലൻഡ് കേന്ദ്രീകരിച്ചുള്ള മയക്കുമരുന്ന് കടത്ത് സംഘത്തിന്റെ മുഖ്യ സൂത്രധാരനെ ഡൽഹിയിൽ നിന്നും കാസർകോട്ടെത്തിച്ചു; റിമാൻഡ് ചെയ്തു

കാസർകോട്: (KasargodVartha) മഞ്ചേശ്വരം പൊലീസ് സ്റ്റേഷൻ പരിധിയിൽ കോടികൾ വിലമതിക്കുന്ന മയക്കുമരുന്ന് പിടികൂടിയ കേസിൽ തായ്‌ലൻഡ് കേന്ദ്രീകരിച്ച് ഇന്ത്യയിലേക്ക് മയക്കുമരുന്ന് കടത്തിയതായി അന്വേഷണ സംഘം കണ്ടെത്തിയ മുഖ്യ സൂത്രധാരനെ നാട്ടിലെത്തിച്ചു. മുഹമ്മദ് സുഹൈലിനെയാണ് (30) ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ വച്ച് മഞ്ചേശ്വരം പൊലീസ് സംഘം അറസ്റ്റ് ചെയ്തത്. 

വിദേശത്ത് ഒളിവിൽ കഴിഞ്ഞിരുന്ന സുഹൈൽ തായ്‌ലൻഡിൽ നിന്ന് ഇന്ത്യയിലേക്ക് തിരിച്ചെത്തുന്നുവെന്ന രഹസ്യവിവരം ലഭിച്ചതിനെ തുടർന്നാണ് പൊലീസ് നീക്കം ശക്തമാക്കിയത്. ഡൽഹി പൊലീസിൻ്റെ സഹായത്തോടെ വിമാനത്താവളത്തിൽ വച്ച് പ്രതിയെ പിടികൂടുകയായിരുന്നു. 

തുടർന്ന് പ്രതിയെ കാസർകോട്ടെത്തിച്ച് കോടതിയിൽ ഹാജരാക്കി റിമാൻഡ് ചെയ്തു. വിദേശത്തുനിന്ന് വൻതോതിൽ മയക്കുമരുന്ന് എത്തിച്ച് കേരളത്തിലുൾപ്പെടെ വിതരണം ചെയ്യുന്ന ശൃംഖലയെക്കുറിച്ചുള്ള അന്വേഷണത്തിൽ ഇയാളുടെ പങ്ക് നിർണായകമാണെന്നാണ് പൊലീസ് വ്യക്തമാക്കുന്നത്.

2024-ലെ വൻ ലഹരിവേട്ട

സംസ്ഥാനത്ത് നടന്ന ഏറ്റവും വലിയ മയക്കുമരുന്ന് വേട്ടകളിലൊന്നായി കണക്കാക്കുന്ന കേസിലാണ് ഇപ്പോൾ നിർണായക അറസ്റ്റ് ഉണ്ടായിരിക്കുന്നത്. 2024 സെപ്റ്റംബർ 20 വെള്ളിയാഴ്ച മഞ്ചേശ്വരം പൊലീസിന് ലഭിച്ച രഹസ്യവിവരത്തിൻ്റെ അടിസ്ഥാനത്തിൽ നടത്തിയ പരിശോധനയിലാണ് ഈ കേസിൻ്റെ തുടക്കം. 

അസ്കർ അലിയുടെ (28) വീട്ടിൽ നിന്ന് 3.5 കിലോഗ്രാം എംഡിഎംഎ, 642 ഗ്രാം കഞ്ചാവ്, മെത്താഫിറ്റമിൻ, രാസഗുളികകൾ എന്നിവയാണ് അന്ന് പൊലീസ് പിടികൂടിയത്. വൻതോതിൽ ലഹരി പിടികൂടിയതോടെ വിതരണ ശൃംഖലയെ കണ്ടെത്താനായി പൊലീസ് അന്വേഷണം വിദേശ രാജ്യങ്ങളിലേക്കും വ്യാപിപ്പിച്ചു.

നേരത്തെ പിടിയിലായ പ്രതികൾ

അന്നത്തെ കാസർകോട് ഡിവൈഎസ്പി സികെ സുനിൽകുമാറിൻ്റെ നേതൃത്വത്തിൽ നടത്തിയ അന്വേഷണത്തിൽ കേസിലെ മൂന്ന് പ്രതികളെ നേരത്തെ അറസ്റ്റ് ചെയ്തിരുന്നു. ഇതിന് പുറമെ കേസിൽ ഉൾപ്പെട്ട മറ്റൊരു പ്രധാന പ്രതിയായ മുഹമ്മദ് ലിസാൻ അലിയെയും (32) പൊലീസ് പിടികൂടി. കർണാടകയിലെ മടിക്കേരി കുശാൽനഗറിൽ ഒളിവിൽ കഴിയുകയായിരുന്ന ഇയാളെ കാസർകോട് സൈബർ സെല്ലിൻ്റെയും കർണാടക പൊലീസിൻ്റെയും സഹായത്തോടെയാണ് വലയിലാക്കിയത്.

പൊലീസ് അന്വേഷണ സംഘം

കാസർകോട് ജില്ലാ പൊലീസ് മേധാവി പി നിധിൻ രാജിൻ്റെ മേൽനോട്ടത്തിൽ കാസർകോട് എഎസ്പി അച്യുത് അശോകിൻ്റെ നേതൃത്വത്തിലാണ് കേസിൻ്റെ അന്വേഷണം പുരോഗമിക്കുന്നത്. ഡൽഹിയിൽ നിന്ന് സുഹൈലിനെ പിടികൂടിയ പൊലീസ് സംഘത്തിൽ മഞ്ചേശ്വരം പൊലീസ് ഇൻസ്പെക്ടർ ജിജീഷ് പികെ, എഎസ്ഐ സുധീർ ബാബു, സിപിഒ ഷജീഷ് എന്നിവരുണ്ടായിരുന്നു. 

കർണാടകയിൽ മുഹമ്മദ് ലിസാൻ അലിയെ പിടികൂടിയ സംഘത്തിൽ എസ്ഐ പ്രസാദ്, എഎസ്ഐ സുധീർ ബാബു, എസ്‌സിപിഒ ദീപക്, സിപിഒമാരായ ഷജീഷ്, ഹരിപ്രസാദ് എന്നിവരും പങ്കെടുത്തു. വിദേശത്ത് നിന്ന് മയക്കുമരുന്ന് എത്തിക്കുന്നതുമായി ബന്ധപ്പെട്ട കൂടുതൽ കണ്ണികളെ കണ്ടെത്തുന്നതിനും സാമ്പത്തിക ഇടപാടുകൾ പരിശോധിക്കുന്നതിനുമുള്ള നടപടികൾ അന്വേഷണ സംഘം തുടരുകയാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: Manjeshwar police arrested the mastermind of a Thailand-based drug smuggling ring from Delhi airport.

#KasargodVartha #KasaragodNews #Manjeshwar #MDMASmuggling #KeralaPolice #CrimeNews #MalayalamNews #Uppala #DrugBust #AparnaNews