മംഗ്ളൂരിൽ വിദ്യാർഥികൾക്ക് നേരെ സദാചാര ഗുണ്ടായിസം; കോൺഗ്രസ്, സംഘപരിവാർ പ്രവർത്തകർക്കെതിരെ പൊലീസ് കേസെടുത്തു

മംഗ്ളൂരു: (KasargodVartha) മൂഡ്ബിദ്രിയിലെ സ്വകാര്യ കോളജിലെ വിദ്യാർഥികളെ സദാചാര ഗുണ്ടായിസത്തിന് ഇരയാക്കിയെന്ന സംഭവത്തിൽ കോൺഗ്രസ് പ്രാദേശിക നേതാവും രണ്ട് സംഘപരിവാർ പ്രവർത്തകരും ഉൾപ്പെടെ മൂന്ന് പേർക്കെതിരെ മൂഡ്ബിദ്രി പൊലീസ് കേസെടുത്തു. 

കെപിസിസി ജനറൽ സെക്രട്ടറി മിഥുൻ റൈയുടെ സോഷ്യൽ മീഡിയ ഇൻചാർജ് റിഥിൻ പൂജാരി, സംഘപരിവാർ പ്രവർത്തകൻ പ്രേം ഭണ്ഡാരി, ബജ്‌റംഗ്ദൾ മുൻ കൺവീനർ സഞ്ജയ് ഹെഗ്‌ഡെ എന്നിവർക്കെതിരെയാണ് പൊലീസ് കേസെടുത്തിരിക്കുന്നത്.

ഭീഷണിയും അസഭ്യവർഷവും

കോളജിലെ രണ്ട് പെൺകുട്ടികൾ ഉൾപ്പെടെ നാല് വിദ്യാർഥികൾ മൂഡ്ബിദ്രി ബസ് സ്റ്റാൻഡിന് സമീപമുള്ള ഭക്ഷണശാലയിൽ എത്തിയതിന് പിന്നാലെയായിരുന്നു സദാചാര ഗുണ്ടായിസം നടന്നത്. പ്രതികൾ കഫേയിൽ ഇരച്ചുകയറി വിദ്യാർഥികളെ അസഭ്യം പറയുകയും ഭീഷണിപ്പെടുത്തുകയും ചെയ്തുവെന്നാണ് പൊലീസ് റിപ്പോർട്ട്. സംഭവത്തിന് ശേഷം വിദ്യാർഥികൾ പൊലീസിൽ പരാതി നൽകാൻ വിസമ്മതിച്ചിരുന്നു.

പൊലീസ് സ്വമേധയാ കേസെടുത്തു

സംഭവം അറിഞ്ഞ മൂഡ്ബിദ്രി പൊലീസ് കഫേ സന്ദർശിച്ച ശേഷം സബ് ഇൻസ്പെക്ടർ പ്രതിഭയുടെ പരാതിയുടെ അടിസ്ഥാനത്തിൽ ഭാരതീയ ന്യായ് സംഹിതയിലെ (ബിഎൻഎസ്) വിവിധ വകുപ്പുകൾ പ്രകാരം സ്വമേധയാ കേസ് രജിസ്റ്റർ ചെയ്യുകയായിരുന്നു. 

പ്രേം ഭണ്ഡാരിക്കും സഞ്ജയ് ഹെഗ്‌ഡെക്കുമെതിരെ മറ്റ് നാല് കേസുകൾ കൂടി ഫയൽ ചെയ്തിട്ടുണ്ടെന്ന് പൊലീസ് അന്വേഷണത്തിൽ കണ്ടെത്തിയിട്ടുണ്ട്. സംഭവത്തിൽ പൊലീസ് കൂടുതൽ അന്വേഷണം നടത്തിവരികയാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Moodbidri police have registered a suo motu case under BNS sections against 3 individuals, including a local Congress leader and 2 Sangh Parivar workers, for allegedly harassing and threatening 4 college students at a cafe in Mangaluru.

#KasargodVartha #MangaluruNews #MoralPolicing #MoodbidriPolice #KarnatakaNews #MalayalamNews #Congress #SanghParivar #BNS #AparnaNews