കടയുടമയുമായി വാക്കേറ്റം; കല്ല് കൊണ്ട് കുത്തേറ്റ് മുട്ട വാങ്ങാനെത്തിയയാള്‍ ആശുപത്രിയില്‍

കൊന്നക്കാട്: (www.kasargodvartha.com 09.04.2019) സാധനങ്ങള്‍ ആവശ്യപ്പെട്ടതിനെ തുടര്‍ന്നുള്ള വാക്ക് തര്‍ക്കത്തിനിടയില്‍ യുവാവിനെ കടയുടമ കല്ല്കൊണ്ട് തലക്ക് കുത്തി പരിക്കേല്‍പ്പിച്ചു. കൊന്നക്കാട് ചെരുമ്പക്കോട്ട് വട്ടമല വീട്ടില്‍ സുബിന്‍ തോമിനാണ് (ഉണ്ണി- 28) പരിക്കേറ്റത്. ചെരുമ്പക്കോട്ട് പലചരക്കു കട നടത്തുന്ന ടോമി തോമസാണ് കല്ലു കൊണ്ട് തലക്കടിച്ചു പരുക്കേല്‍പ്പിച്ചതെന്ന് ജില്ലാശുപത്രിയില്‍ ചികിത്സയില്‍ കഴിയുന്ന സുബിന്‍ പറയുന്നു.

ടോമിയുടെ കടയില്‍ മുട്ട വാങ്ങാന്‍ പോയപ്പോള്‍ കടയുടെ ഷട്ടര്‍ താഴ്ത്തിയിട്ടിരിക്കുകയായിരുന്നു. വീടിനോടു ചേര്‍ന്നാണ് ടോമി കട നടത്തുന്നത്. ടോമിയെ വിളിച്ചു കട തുറന്നു സാധനം തരാനാവശ്യപ്പെട്ടപ്പോള്‍ വാക്കേറ്റമുണ്ടാവുകയും ഉന്തിനും തള്ളിനുമിടയില്‍ ടോമി കല്ലെടുത്ത് സുബിന്റെ തലയ്ക്ക് കുത്തുകയുമായിരുന്നു. ആഴത്തിലേറ്റ മുറിവിന് മൂന്നോളം സ്റ്റിച്ചുകളുണ്ട്. മുന്‍വശത്തെ പല്ലും പൊട്ടി.