ചിറ്റാരിക്കൽ സബ് ജില്ലാ കലോത്സവത്തിന് പിന്നാലെ മാലോത്ത് കസബ സ്കൂൾ പ്രിൻസിപ്പൽ നൽകിയ പരാതികളും പിടിഎ പ്രസിഡന്റിനെതിരെയുള്ള പോക്സോ കേസും വിവാദമാകുന്നു

വെള്ളരിക്കുണ്ട്: (KasargodVartha) ചിറ്റാരിക്കൽ സബ് ജില്ലാ സ്കൂൾ കലോത്സവത്തിന് പിന്നാലെ സംഘാടക സമിതി ഭാരവാഹികൾക്കെതിരെ പൊലീസിൽ പരാതി നൽകിയ സംഭവവും, പി.ടി.എ. പ്രസിഡന്റിനെതിരെ പോക്സോ കേസ് രജിസ്റ്റർ ചെയ്തതും വിവാദങ്ങൾക്ക് വഴിവെച്ചിരിക്കുകയാണ്. 

കലോത്സവം ജനറൽ കൺവീനർ കൂടിയായ മാലോത്ത് കസബ ഗവ. ഹയർ സെക്കൻഡറി സ്കൂൾ പ്രിൻസിപ്പൽ മിനി പോളാണ് സംഘാടക സമിതി ചെയർമാനും ബളാൽ പഞ്ചായത്ത് വൈസ് പ്രസിഡന്റുമായ രാജു കട്ടക്കയം, പബ്ലിസിറ്റി ചെയർമാൻ സിബിച്ചൻ പുളിങ്കാല, അക്കമഡേഷൻ കമ്മിറ്റി ചെയർമാൻ മാർട്ടിൻ ജോർജ് എന്നിവർക്കെതിരെ വെള്ളരിക്കുണ്ട് പൊലീസിൽ പരാതി നൽകിയത്. ഒക്ടോബർ 31-ന് നടന്ന സംഘാടക സമിതി യോഗത്തിൽ സ്ത്രീത്വത്തെ അപമാനിക്കുന്ന തരത്തിൽ സംസാരിച്ചു എന്നാണ് പ്രിൻസിപ്പലിൻ്റെ പരാതിയിലുള്ളത്.

ഇതിനിടെ, സംഘാടക സമിതി വർക്കിങ് ചെയർമാനും സ്കൂൾ പി.ടി.എ. പ്രസിഡന്റുമായ എൻ.വി. പ്രമോദിനെതിരെ വിദ്യാർത്ഥികളുടെ പരാതിയിൽ പൊലീസ് പോക്സോ കേസ് രജിസ്റ്റർ ചെയ്തു. സ്കൂൾ മേളകളിൽ വിജയിച്ച കുട്ടികളെ അനുമോദിക്കുന്ന ചടങ്ങിൽ സർട്ടിഫിക്കറ്റ് വിതരണം ചെയ്ത ശേഷം പി.ടി.എ. പ്രസിഡന്റ് കുട്ടികളെ തോളിൽ തട്ടി അഭിനന്ദിച്ചിരുന്നു. പ്രിൻസിപ്പൽ ഉൾപ്പെടെയുള്ള അധ്യാപകരും വിദ്യാർത്ഥികളും ഈ ചടങ്ങിൽ പങ്കെടുത്തിരുന്നു.

എന്നാൽ പ്രിൻസിപ്പൽ കുട്ടികളെ സ്വാധീനിച്ച് ഈ അഭിനന്ദനത്തെ മറ്റൊരു തരത്തിൽ ചിത്രീകരിക്കുകയും, സ്കൂളിലെ സൗഹൃദ കോ-ഓർഡിനേറ്റർ വഴി പരാതി എഴുതിവാങ്ങി പൊലീസിന് നൽകുകയും ചെയ്തുവെന്നാണ് ആരോപണം. തുടർന്ന് കുട്ടികളുടെ മൊഴിയെടുത്ത പൊലീസ് എൻ.വി. പ്രമോദിന്റെ പേരിൽ പോക്സോ കേസ് രജിസ്റ്റർ ചെയ്യുകയായിരുന്നു.

പി.ടി.എ. പ്രസിഡന്റിന്റെ പ്രതികരണം

സ്കൂളിലെ മുൻ പി.ടി.എ. പ്രസിഡന്റും പ്രിൻസിപ്പലും തമ്മിലുള്ള സാമ്പത്തിക ഇടപാടുകൾ ചോദ്യം ചെയ്തതിലുള്ള വിരോധം കാരണം കുട്ടികളെ ഉപയോഗിച്ച് കള്ളക്കേസിൽ കുടുക്കിയതാണെന്നാണ് എൻ.വി. പ്രമോദ് ആരോപിക്കുന്നത്. നിയമനടപടികളുമായി മുന്നോട്ടുപോകുമെന്നും നിരപരാധിത്വം തെളിയിക്കുമെന്നും അദ്ദേഹം പ്രതികരിച്ചു.

അധ്യാപകരുടെ പ്രമേയം

വിഷയത്തിൽ സ്കൂളിലെ അധ്യാപകർ രംഗത്തെത്തിയിട്ടുണ്ട്. സബ് ജില്ലാ കലോത്സവം വിജയിപ്പിച്ച സംഘാടക സമിതി ചെയർമാൻ, പി.ടി.എ. പ്രസിഡന്റ് എന്നിവർക്കെതിരെയുള്ള പരാതികൾ ഗൂഢാലോചനയുടെ ഭാഗമാണെന്ന് അധ്യാപകർ ആരോപിക്കുന്നു. പൊലീസ് നിഷ്പക്ഷമായ അന്വേഷണം നടത്തണമെന്ന് ആവശ്യപ്പെട്ട് സ്കൂളിലെ 39 അധ്യാപകർ ചേർന്ന് പ്രമേയം പാസാക്കുകയും, തുടർനടപടികൾക്കായി ഇത് പൊലീസിന് കൈമാറുകയും ചെയ്തിട്ടുണ്ട്. 

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: A POCSO case against the PTA president and a complaint by the principal following the Chitharickal sub-district school arts festival have sparked controversy at Maloth Kasaba School, with 39 teachers passing a resolution alleging conspiracy.

#KasargodVartha #VellarikunduNews #KasaragodNews #SchoolKalolsavam #POCSOCase #KeralaPolice #MalayalamNews #PTAPresident #TeachersResolution #AparnaNews