പെൺകുട്ടികളുടെ ചിത്രങ്ങൾ മോർഫ് ചെയ്ത് ടെലഗ്രാമിലൂടെ അശ്ലീല പ്രചാരണം നടത്തിയ കേസ്; മലപ്പുറം സ്വദേശി സൈബർ പിടിയിൽ; കൂടുതൽ അറസ്റ്റിന് സാധ്യതയുണ്ടെന്ന് പൊലീസ്

കാസർകോട്: (KasargodVartha) പെൺകുട്ടികളുടെ ചിത്രങ്ങൾ അവരുടെ അറിവോ സമ്മതമോ ഇല്ലാതെ ശേഖരിച്ച് മോർഫ് ചെയ്തു അശ്ലീല ദൃശ്യങ്ങളാക്കി മാറ്റിയ കേസിലെ രണ്ടാം പ്രതി കാസർകോട് സൈബർ ക്രൈം പൊലീസിൻ്റെ പിടിയിലായി. മോർഫ് ചെയ്ത ചിത്രങ്ങൾ ടെലഗ്രാം ഗ്രൂപ്പുകൾ വഴി പ്രചരിപ്പിച്ച കേസിൽ മലപ്പുറം സ്വദേശിയായ നികേത് (24) ആണ് അറസ്റ്റിലായത്. കാസർകോട് സൈബർ ക്രൈം പൊലീസ് സ്റ്റേഷൻ ക്രൈം നമ്പർ 12/2026 ആയി രജിസ്റ്റർ ചെയ്ത കേസിലാണ് നടപടി.

ചിത്രങ്ങൾ മോർഫ് ചെയ്തത് നികേത്

കേസിലെ ഒന്നാം പ്രതിയായ കാസർകോട് മുളിയാര്‍ ഗ്രാമ പഞ്ചായത് പരിധിയിലെ പി അനൂപിനെ നേരത്തെ തന്നെ പൊലീസ് അറസ്റ്റ് ചെയ്തിരുന്നു. ഒന്നാം പ്രതിയുടെ പക്കൽ നിന്ന് ലഭിച്ച പെൺകുട്ടികളുടെ ചിത്രങ്ങൾ എഡിറ്റ് ചെയ്ത് അശ്ലീല ചിത്രങ്ങളാക്കി മാറ്റിയത് നികേതാണെന്ന് അന്വേഷണത്തിൽ കണ്ടെത്തിയതായി പൊലീസ് പറഞ്ഞു. ഇത്തരം അശ്ലീല ചിത്രങ്ങൾ ടെലഗ്രാം ഗ്രൂപ്പുകൾ വഴി പ്രചരിപ്പിച്ചതായും അന്വേഷണത്തിൽ കണ്ടെത്തിയിട്ടുണ്ട്.

ഒന്നാം പ്രതിയെ കസ്റ്റഡിയിൽ വാങ്ങി ചോദ്യം ചെയ്തതിനെ തുടർന്നാണ് രണ്ടാം പ്രതിയെക്കുറിച്ചുള്ള വിവരങ്ങൾ അന്വേഷണ സംഘത്തിന് ലഭിച്ചത്. തുടർന്ന് ഡിജിറ്റൽ തെളിവുകളും മറ്റ് വിവരങ്ങളും പരിശോധിച്ച് നടത്തിയ അന്വേഷണത്തിലാണ് നികേതിലേക്ക് സൈബർ പൊലീസ് എത്തിയത്.

കൂടുതൽ അറസ്റ്റുകൾക്ക് സാധ്യത

2026 സെപ്റ്റംബർ 25 വെള്ളിയാഴ്ച പുഴക്കാട്ടിരിയിൽ വെച്ചാണ് അന്വേഷണ സംഘം പ്രതിയെ കസ്റ്റഡിയിലെടുത്തത്. തുടർന്ന് കാസർകോട് സൈബർ ക്രൈം പൊലീസ് സ്റ്റേഷനിലെത്തിച്ച് ചോദ്യം ചെയ്തശേഷം ഇയാളുടെ അറസ്റ്റ് രേഖപ്പെടുത്തി.

സൈബർ ക്രൈം പൊലീസ് സ്റ്റേഷൻ ഇൻസ്പെക്ടർ കെ രാജീവൻറെ നിർദേശപ്രകാരം സബ് ഇൻസ്പെക്ടർ ടി ടിനൗഷാദ്, സീനിയർ സിവിൽ പൊലീസ് ഓഫീസർമാരായ പി വി സുധീഷ്, സവാദ് അഷറഫ്, സിവിൽ പൊലീസ് ഓഫീസർ വിപിൻ എന്നിവരടങ്ങിയ അന്വേഷണ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ ഒക്ടോബർ ഒൻപത് വരെ റിമാൻഡ് ചെയ്തു.

കേസുമായി ബന്ധപ്പെട്ട ഡിജിറ്റൽ ഉപകരണങ്ങൾ, ഇലക്ട്രോണിക് രേഖകൾ, ടെലഗ്രാം ഗ്രൂപ്പുകളുമായി ബന്ധപ്പെട്ട വിവരങ്ങൾ എന്നിവ പൊലീസ് ശേഖരിച്ചുവരികയാണ്. പ്രതികൾ ഉപയോഗിച്ചിരുന്ന ഉപകരണങ്ങളിൽ നിന്നുള്ള വിവരങ്ങളും ഫോറൻസിക് പരിശോധനയ്ക്ക് വിധേയമാക്കുന്നുണ്ട്. ചിത്രങ്ങൾ കൈമാറിയവർ, മോർഫ് ചെയ്തവർ, പ്രചരിപ്പിച്ചവർ എന്നിവരുടെ പങ്ക് പരിശോധിക്കുന്നതായും അന്വേഷണ സംഘം അറിയിച്ചു.

പല ഗ്രൂപ്പുകളിലായി കൂടുതൽ അംഗങ്ങൾ ഇത്തരം ചിത്രങ്ങൾ വാങ്ങാനും വിൽക്കാനുമായി പ്രവർത്തിക്കുന്നുണ്ടെന്ന വിവരവും പൊലീസിന് ലഭിച്ചിട്ടുണ്ട്. ടെലഗ്രാം ഗ്രൂപ്പുകളിലെ പ്രവർത്തനങ്ങളും പൊലീസ് നിരീക്ഷിച്ചുവരികയാണ്. വരും ദിവസങ്ങളിൽ കൂടുതൽ അറസ്റ്റുകൾ ഉണ്ടായേക്കുമെന്നും പൊലീസ് സൂചന നൽകി.

കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Malappuram youth arrested for morphing girls' photos on Telegram in Kasaragod.

#KasargodVartha #CyberCrimeKerala #KasaragodPolice #TelegramScam #MorphingCase #MalayalamCrimeNews #RenuNews