ഒമ്പത് മാസം പ്രായമുള്ള കുഞ്ഞിനെ ഒന്നര ലക്ഷം രൂപയ്ക്ക് വിറ്റു; സംഭവം മലപ്പുറം തിരൂരിൽ, അഞ്ചുപേർ പിടിയിൽ

മലപ്പുറം: (KasargodVartha) ഒമ്പത് മാസം മാത്രം പ്രായമുള്ള കുഞ്ഞിനെ ഒന്നര ലക്ഷം രൂപയ്ക്ക് വിറ്റ ഞെട്ടിക്കുന്ന സംഭവം മലപ്പുറം തിരൂരിൽ നടന്നു. കുഞ്ഞിനെ വിറ്റവരും വാങ്ങിയവരും തമിഴ്‌നാട് സ്വദേശികളാണ്. വിവരം ലഭിച്ചതിനെ തുടർന്ന് തിരൂർ പോലീസ് കുഞ്ഞിനെ രക്ഷപ്പെടുത്തി.

കുഞ്ഞിൻ്റെ അമ്മ കീർത്തന, രണ്ടാനച്ഛൻ ശിവ, കുട്ടിയെ വാങ്ങിയ ആദി ലക്ഷ്മി, ഇടനിലക്കാരായ ശെന്തിൽ കുമാർ, പ്രേമലത എന്നിവരെ അറസ്റ്റ് ചെയ്തതായി തിരൂർ പോലീസ് അറിയിച്ചു. കുഞ്ഞിനെ വാങ്ങിയത് വളർത്തുക എന്ന ഉദ്ദേശത്തോടെയാണെന്ന് ആദി ലക്ഷ്മി പോലീസിനോട് വെളിപ്പെടുത്തി. കുഞ്ഞിൻ്റെ അമ്മയായ കീർത്തനക്ക് ആദ്യ ഭർത്താവിലുണ്ടായ കുട്ടിയാണിത്.

അമ്മയും രണ്ടാനച്ഛനും ചേർന്നാണ് ഒമ്പത് മാസം പ്രായമുള്ള പെൺകുഞ്ഞിനെ വിറ്റത്. കോഴിക്കോട് താമസിക്കുന്ന തമിഴ്‌നാട് സ്വദേശിയായ യുവതിക്കാണ് ഇവർ കുഞ്ഞിനെ കൈമാറിയതെന്നാണ് ലഭിക്കുന്ന വിവരം. മൂന്ന് ലക്ഷം രൂപയാണ് കുഞ്ഞിനെ വിൽക്കാൻ ഇവർ ആദ്യം ആവശ്യപ്പെട്ടത്. പിന്നീട് ഒന്നര ലക്ഷം രൂപയ്ക്ക് കരാറുറപ്പിച്ച് കുഞ്ഞിനെ കൈമാറുകയായിരുന്നു. തമിഴ്‌നാട് സേലം സ്വദേശികളായ ഇവർ തിരൂരിലുള്ള വാടക ക്വാർട്ടേഴ്‌സിലാണ് താമസിച്ചിരുന്നത്.

അയൽക്കാരാണ് കുഞ്ഞിനെ കാണുന്നില്ലെന്ന വിവരം ആദ്യം തിരക്കിയത്. മാതാപിതാക്കളോട് ചോദിച്ചപ്പോൾ വ്യക്തമായ ഉത്തരം നൽകാത്തതോടെ അയൽക്കാരാണ് പോലീസിൽ പരാതി നൽകിയത്. പോലീസ് എത്തി അന്വേഷിച്ചപ്പോഴും ഇവർ വ്യക്തമായ മറുപടി നൽകിയില്ല. തുടർന്നുള്ള ചോദ്യം ചെയ്യലിലാണ് കുഞ്ഞിനെ മറ്റൊരാൾക്ക് കൈമാറിയെന്ന വിവരം ഇവർ പറയുന്നത്. അങ്ങനെയാണ് കോഴിക്കോട് താമസിക്കുന്ന യുവതിയിലേക്ക് അന്വേഷണം എത്തുന്നത്. സ്വന്തം മകളായി വളർത്താനാണ് കുഞ്ഞിനെ വാങ്ങിയതെന്നാണ് ഈ യുവതി പോലീസിനോട് പറഞ്ഞത്. കുഞ്ഞിനെ ഇപ്പോൾ സുരക്ഷിത കേന്ദ്രത്തിലേക്ക് മാറ്റിയിട്ടുണ്ട്.

കുഞ്ഞുകടത്ത് പോലുള്ള കുറ്റകൃത്യങ്ങൾക്കെതിരെ സമൂഹം എങ്ങനെ പ്രതികരിക്കണം? ഈ ഞെട്ടിക്കുന്ന സംഭവത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: Baby sold for Rs 1.5 lakh in Malappuram; five arrested.

#ChildTrafficking #KeralaCrime #Malappuram #Tirur #ChildSafety #PoliceAction