മാജിക് സ്വർണ്ണ തട്ടിപ്പ്: കാസർകോട്ട് അന്തർസംസ്ഥാന സംഘത്തിലെ നാലുപേർ പിടിയിൽ; ബസിറങ്ങി ഓടിയവരെ സാഹസികമായി കീഴടക്കി

കാസർകോട്: (KasargodVartha) സ്വർണ്ണാഭരണങ്ങളെന്ന വ്യാജേന മുക്കുപണ്ടം വിൽപ്പന നടത്തി പണം തട്ടിയെടുക്കുന്ന വൻ അന്തർസംസ്ഥാന തട്ടിപ്പ് സംഘം കാസർകോട് പോലീസിന്റെ പിടിയിലായി. 

കർണാടക മാണ്ഡ്യ ജില്ലയിൽ നിന്നുള്ള നാലംഗ സംഘത്തെയാണ് ജില്ലാ പോലീസ് മേധാവി വിജയഭാരത് റെഡി, എ.എസ്.പി അച്യൂത് അശോക്, സ്പെഷ്യൽ സ്ക്വാഡ്, കാസർകോട് ടൗൺ പോലീസ് എന്നിവർ ചേർന്ന് അറസ്റ്റ് ചെയ്തത്.

പിടിയിലായവർ

അർജുൻ സോളങ്കി (30), ഗണേഷ് സോളങ്കി (53), ജീവൻലാൽ (62), ഹരിലാൽ (37) എന്നിവരാണ് പിടിയിലായത്. രഹസ്യ വിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിനൊടുവിലാണ് സംഘം കുടുങ്ങിയത്. 

കാസർകോട് പ്രസ് ക്ലബ് ജംഗ്‌ഷൻ പരിസരത്ത് നിന്നാണ് പ്രതികളെ പിടികൂടിയത്. പോലീസ് പരിശോധനയ്ക്കിടെ ബസിറങ്ങി രണ്ട് പേർ ഓടി രക്ഷപ്പെടാൻ ശ്രമിച്ചെങ്കിലും സാഹസികമായി പിന്തുടർന്ന് പോലീസ് ഇവരെ കീഴടക്കുകയായിരുന്നു.

തട്ടിപ്പ് രീതി ഇങ്ങനെ

സ്വർണ്ണാഭരണങ്ങൾ വിൽക്കാനുണ്ടെന്ന് പറഞ്ഞ് ആവശ്യക്കാരെ കണ്ടെത്തി, കുറഞ്ഞ വിലക്ക് സ്വർണ്ണം നൽകാമെന്ന് വിശ്വസിപ്പിച്ച് മുക്കുപണ്ടം നൽകി പണം തട്ടിയെടുക്കുന്നതാണ് സംഘത്തിന്റെ രീതി. 

സാധാരണ പരിശോധനയിൽ സ്വർണ്ണമല്ലെന്ന് തിരിച്ചറിയാൻ കഴിയാത്ത വിധത്തിൽ കോപ്പറും കാഡ്മിയവും ഉപയോഗിച്ചാണ് ആഭരണങ്ങൾ നിർമിച്ചിരുന്നത്.

സംഘത്തിന്റെ കൈയ്യിൽ നിന്നും ആറേമുക്കാൽ കിലോഗ്രാം തൂക്കം വരുന്ന വ്യാജ ആഭരണങ്ങളും, പരിശോധനയ്ക്കായി ഉപയോഗിക്കുന്ന ഏഴ് ഗ്രാം യഥാർത്ഥ സ്വർണ്ണവും പോലീസ് പിടിച്ചെടുത്തു. ഏകദേശം 250-ഓളം മാലകളാണ് കണ്ടെത്തിയത്. 

ആഭരണത്തിൽ നിന്ന് ചെറിയൊരു ഭാഗം യഥാർത്ഥ സ്വർണ്ണമാണെന്ന് വിശ്വസിപ്പിച്ച് പരിശോധനയ്ക്കായി നൽകുകയും, കച്ചവടം ഉറപ്പായതോടെ വ്യാജ സ്വർണ്ണാഭരണങ്ങൾ കൈമാറുകയുമായിരുന്നു ഇവരുടെ രീതി.

സിനിമാ സ്റ്റൈൽ ഓപ്പറേഷൻ

രണ്ട് പേർ രക്ഷപ്പെട്ടു. ഇവരെ കണ്ടെത്താനായി പോലീസ് വലവീശിയിട്ടുണ്ട്. പള്ളിക്കരയിലെ പ്രതികളുടെ താമസസ്ഥലത്ത് മഫ്ടിയിലെത്തിയ പോലീസ് സംഘം പ്രതികളിൽ രണ്ട് പേരുടെ ഫോട്ടോ എടുത്ത് ഇൻഫർമേഷൻ നൽകിയവർക്ക് തിരിച്ചറിയാനായി അയച്ചുകൊടുത്തു. 

ഇതിനിടയിൽ ഇവർ കെ.എസ്.ആർ.ടി.സി ബസിൽ കയറി കാസർകോട് ഭാഗത്തേക്ക് നീങ്ങുകയായിരുന്നു. പ്രസ് ക്ലബ് ജംഗ്‌ഷനിൽ ബസിറങ്ങുന്നതിനിടെ പോലീസ് സാന്നിധ്യം മനസ്സിലാക്കി സംഘം ചിതറിയോടി. ഓട്ടോ ഡ്രൈവർമാർ ഉൾപ്പെടെയുള്ളവരുടെ സഹായത്തോടെയാണ് ഓടി രക്ഷപ്പെടാൻ ശ്രമിച്ച നാലു പേരെയും കീഴടക്കിയത്.

പൂക്കച്ചവടത്തിന്റെ മറവിൽ

ഒരാഴ്ച മുൻപാണ് സംഘം കാസർകോട് എത്തി ബേക്കൽ പള്ളിക്കരയിലെ വാടക ക്വാർട്ടേഴ്സിൽ താമസം ആരംഭിച്ചത്. കർണാടകയിൽ പൂ വിൽപ്പന നടത്തുന്നവരെന്ന മറവിലാണ് തട്ടിപ്പ് നടത്തിയിരുന്നതെന്ന് പോലീസ് പറഞ്ഞു.  ആഭരണങ്ങൾ വിൽപ്പന നടത്താനുണ്ടെന്ന പേരിൽ കാസർകോട്ടെ ചില ജ്വല്ലറികളിലും ഇവർ എത്തിയിരുന്നതായി വിവരമുണ്ട്. 

തെലങ്കാന, ആന്ധ്രപ്രദേശ്, തമിഴ്നാട് തുടങ്ങിയ സംസ്ഥാനങ്ങളിൽ തട്ടിപ്പ് നടത്തിയ ശേഷമാണ് സംഘം കേരളത്തിലെത്തിയതെന്നും പോലീസ് വ്യക്തമാക്കി. നിലവിൽ കാസർകോട് ജില്ലയിൽ ആരെങ്കിലും തട്ടിപ്പിനിരയായതായി പരാതി ലഭിച്ചിട്ടില്ല. പ്രതികളെ വിശദമായി ചോദ്യം ചെയ്ത് വരികയാണ്.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kasaragod police busted an inter-state gang involved in a 'magic gold' scam. Four individuals from Mandya, Karnataka, were arrested after a dramatic chase in the city. The police seized 6.75 kg of counterfeit gold jewelry and 7 grams of real gold used to dupe victims.

 #KasaragodNews #GoldScam #PoliceAction #KeralaPolice #FakeGold #MandyaGang #CrimeNews #InterstateScammers #Alert