മദ്രസാധ്യാപകനോടുള്ള പക, കാറിന് തീയിട്ടു: പ്രതി റിമാൻഡിൽ

ബദിയടുക്ക: (KasargodVartha) പൈക്ക ജുമാ മസ്ജിദിന് സമീപം പാർക്ക് ചെയ്തിരുന്ന കാറിന് തീയിട്ട കേസിൽ മുഖ്യപ്രതിയായ അബൂബക്കർ (51) എന്നയാൾ അറസ്റ്റിലായി. ഇയാളെ റിമാൻഡ് ചെയ്തു. ജോലിയിൽ നിന്ന് പിരിച്ചുവിട്ടതിനെത്തുടർന്ന് മദ്രസാധ്യാപകനോടുണ്ടായ കടുത്ത വ്യക്തിവിരോധമാണ് തീവെപ്പിന് കാരണമെന്ന് പൊലീസ് അറിയിച്ചു.

കഴിഞ്ഞ വ്യാഴാഴ്ച പുലർച്ചെ 2.30 ഓടെയാണ് പൈക്ക ജുമാ മസ്ജിദിന് സമീപം നിർത്തിയിട്ടിരുന്ന കാറിന് തീയിട്ടത്. മദ്രസാധ്യാപകൻ ഉസ്മാൻ റാസി ബാഖവി ഹൈതമിയാണ് ഈ കാർ ഉപയോഗിച്ചിരുന്നത്. സംഭവസ്ഥലത്തെ ദൃശ്യങ്ങളും മറ്റ് തെളിവുകളും പരിശോധിച്ചാണ് പൊലീസ് പ്രതിയെ തിരിച്ചറിഞ്ഞത്.

സംഭവത്തിന് ശേഷം പ്രതി ബദിയടുക്കയിൽ നിന്ന് ബൈക്കിൽ ഒളിവിൽ പോവുകയായിരുന്നു. ആദ്യം കാഞ്ഞങ്ങാട്ടെത്തിയ ഇയാൾ അവിടെ നിന്ന് മലപ്പുറത്തേക്ക് പോകാൻ ശ്രമിച്ചു. എന്നാൽ, യാത്രയ്ക്കിടെ ബൈക്ക് നിയന്ത്രണം വിട്ട് മറിഞ്ഞ് കൈക്ക് പരിക്കേറ്റതിനെ തുടർന്ന് കാഞ്ഞങ്ങാട്ടെ സ്വകാര്യ ആശുപത്രിയിൽ രണ്ട് ദിവസം ചികിത്സയിൽ കഴിയേണ്ടി വന്നു. പിന്നീട് ട്രെയിനിലാണ് ഇയാൾ മലപ്പുറത്തേക്ക് പോയത്.

പ്രതിയുടെ മൊബൈൽ ഫോൺ സ്വിച്ച് ഓഫ് ചെയ്തതിനാൽ സൈബർ സെല്ലിന്റെ സഹായം തേടിയെങ്കിലും ഫോൺ ലൊക്കേഷൻ കണ്ടെത്താൻ കഴിഞ്ഞിരുന്നില്ല. എന്നാൽ, ട്രെയിനിൽ യാത്ര ചെയ്യുമ്പോൾ ഫോൺ ഓൺ ചെയ്തതോടെ ലൊക്കേഷൻ ട്രാക്ക് ചെയ്ത് പൊലീസ് ഇയാളുടെ നീക്കം മനസിലാക്കുകയായിരുന്നു.

മലപ്പുറത്തെ വീട്ടിൽ നിന്നാണ് പ്രതിയെ പൊലീസ് പിടികൂടിയത്. എസ്.ഐ. ഉമേഷ് കെ.ആർ., എ.എ.എസ്.ഐ. പ്രസാദ്, സി.പി.ഒ. മാരായ ആരിഫ്, ശ്രീനേഷ്, കാസർകോട് സ്റ്റേഷനിലെ സീനിയർ സിവിൽ പൊലീസ് ഓഫീസർ ഷൈജു എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തതെന്ന് പൊലീസ് അറിയിച്ചു.

പ്രതി നേരത്തെ ജുമാ മസ്ജിദിൽ ജോലി ചെയ്തിരുന്നയാളാണ്. സ്ഥാപനത്തിൽ നിന്ന് പുറത്താക്കിയതോടെയാണ് ഇയാൾക്ക് മദ്രസാധ്യാപകനോട് വിരോധം തോന്നിയത്. ഇതിന്റെ തുടർച്ചയായാണ് കാർ കത്തിക്കാൻ തീരുമാനിച്ചതെന്നും അന്വേഷണത്തിൽ വ്യക്തമായി. കോടതിയിൽ ഹാജരാക്കിയ പ്രതിയെ രണ്ടാഴ്ചത്തേക്ക് റിമാൻഡ് ചെയ്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കൂ. നിങ്ങളുടെ സുഹൃത്തുക്കളുമായി ഇത് ഷെയർ ചെയ്യൂ.

Article Summary: Madrasa teacher's car set ablaze, accused remanded.

#CarArson #KeralaCrime #KasargodNews #MadrasaTeacher #PersonalVendetta #AccusedArrested