ലോറി ഡ്രൈവറുടെ മരണം: യുവജന നേതാവിനെതിരെ ശബ്ദ സന്ദേശങ്ങൾ; കേന്ദ്ര അന്വേഷണം ആവശ്യപ്പെട്ട് കുടുംബം അമിത് ഷായെ കാണും

ഉപ്പള: (KasargodVartha) നിർത്തിയിട്ട ലോറിയിൽ ഡ്രൈവറെ മരിച്ച നിലയിൽ കണ്ടെത്തിയ സംഭവവുമായി ബന്ധപ്പെട്ട് പുതിയ വിവാദം പൊട്ടിപ്പുറപ്പെടുന്നു. തദ്ദേശ തെരഞ്ഞെടുപ്പിൽ മത്സരിക്കുന്ന യുവജന നേതാവിനും സുഹൃത്തുക്കൾക്കുമെതിരെ ശബ്ദ സന്ദേശങ്ങൾ പ്രചരിച്ചതോടെയാണ് സംഭവം വീണ്ടും വലിയ ചർച്ചയായിരിക്കുന്നത്. 

മണൽ മാഫിയയുമായി ബന്ധമുള്ള ഈ യുവ നേതാവിന് മരണത്തിൽ പങ്കുണ്ടെന്ന തരത്തിലാണ് ശബ്ദ സന്ദേശങ്ങൾ പ്രചരിക്കുന്നത്. ബായാർപദവ് സ്വദേശി മുഹമ്മദ് ഹാഷിഫിനെ (29)യാണ് കഴിഞ്ഞ വർഷം ജനുവരി 15-ന് ലോറിക്കകത്ത് മരിച്ച നിലയിൽ കണ്ടെത്തിയത്.

കേന്ദ്ര ഏജൻസിയുടെ അന്വേഷണം ആവശ്യപ്പെട്ട് കുടുംബം അമിത് ഷായെ കാണും

മരണത്തിൽ ദുരൂഹതയുണ്ടെന്ന നിലപാട് ശക്തമാക്കിയ കുടുംബം, കേന്ദ്ര ഏജൻസിയുടെ അന്വേഷണം ആവശ്യപ്പെട്ട് കേന്ദ്ര ആഭ്യന്തര മന്ത്രി അമിത് ഷായെ നേരിൽ കണ്ട് വിഷയം ഉന്നയിക്കുമെന്ന് അറിയിച്ചു. ബിജെപി മൈനോറിറ്റി മോർച്ചയുടെ നേതാക്കൾ വീട്ടിലെത്തി ബന്ധുക്കളുമായി കൂടിയാലോചന നടത്തി.

പൈവളിഗ കായർകട്ടയിൽ റോഡരികിൽ നിർത്തിയിട്ട ലോറിയിലായിരുന്നു മുഹമ്മദ് ഹാഷിഫിനെ മരിച്ച നിലയിൽ കണ്ടെത്തിയത്. ലോറിയുടെ ഉള്ളിലും ഡ്രൈവറുടെ സീറ്റിന് സമീപമുള്ള ഡോറിലും രക്തക്കറ കണ്ടെത്തിയിരുന്നു. 

അക്രമികളെ പ്രതിരോധിക്കാൻ ഉപയോഗിക്കുന്നതുപോലുള്ള ഒടിഞ്ഞ മുളവടിയും ലോറിയിൽ നിന്ന് കണ്ടെത്തിയിരുന്നു. യുവാവിന്റെ ചെരിപ്പുകൾ റോഡരികിൽ ഉപേക്ഷിച്ച നിലയിൽ കണ്ടെത്തിയതും നാട്ടുകാരുടെ സംശയം കൂടുതൽ ശക്തമാക്കി.

ഹാഷിഫ് പുലർച്ചെ രണ്ടു മണിക്ക് വീട്ടിൽ നിന്ന് ടിപ്പർ ലോറിയുമായി പുറത്തേക്കിറങ്ങിയതാണെന്നാണ് ബന്ധുക്കൾ പോലീസിനും പിന്നീട് അന്വേഷണം ഏറ്റെടുത്ത ക്രൈംബ്രാഞ്ചിനും മൊഴി നൽകിയത്. പുറത്തിറങ്ങുന്നതിനുമുമ്പ് വീട്ടിൽ ചെറിയ സംസാരങ്ങൾ നടന്നിരുന്നുവെന്നും കുടുംബം പറഞ്ഞിരുന്നു. 

വീട്ടിൽ നിന്നും മാറി മൂന്ന് കിലോമീറ്റർ അകലെയാണ് ലോറിയും മൃതദേഹവും കണ്ടെത്തിയത്. യുവാവിനെ ആരെങ്കിലും അപായപ്പെടുത്തിയതാണോ, അതോ ഉയർന്ന രക്തസമ്മർദ്ദമാണോ കാരണമെന്നതിൽ വ്യക്തതയില്ല. നാട്ടുകാർ കൊലപാതക സാധ്യത ചൂണ്ടിക്കാട്ടുന്നുണ്ട്.

മഞ്ചേശ്വരം പോലീസ് അസ്വാഭാവിക മരണത്തിന് എടുത്ത കേസ് നിലവിൽ അന്വേഷിക്കുന്നത് ക്രൈംബ്രാഞ്ച് ആണ്. മരണം നടന്ന് ഒരു വർഷം കഴിഞ്ഞിട്ടും കേസിൽ അന്വേഷണം കാര്യക്ഷമമായി മുന്നോട്ട് കൊണ്ടുപോകാനും വ്യക്തമായ ഒരു നിഗമനത്തിലെത്താനും ക്രൈംബ്രാഞ്ചിന് സാധിച്ചിട്ടില്ലെന്നാണ് കുടുംബം പറയുന്നത്. 

മരണം കൊലപാതകമെന്ന് തന്നെയാണ് കുടുംബം ആരോപിക്കുന്നത്. ഇപ്പോൾ പുറത്തുവന്ന ചില ശബ്ദ സന്ദേശങ്ങൾ കൊലപാതകമെന്ന നിഗമനത്തിലേക്കാണ് വിരൽ ചൂണ്ടുന്നതെന്നും മണൽ മാഫിയയ്ക്ക് മരണത്തിൽ വ്യക്തമായ പങ്കുണ്ടെന്നും കുടുംബം സംശയിക്കുന്നു. 

ഇതാണ് കേന്ദ്ര ഏജൻസിയുടെ അന്വേഷണം വേണമെന്ന ആവശ്യത്തിലേക്ക് കുടുംബത്തെ എത്തിച്ചിരിക്കുന്നത്. കേസിന് കൂടുതൽ സങ്കീർണതയുണ്ടെന്നായിരുന്നു ക്രൈംബ്രാഞ്ച് നേരത്തെ വ്യക്തമാക്കിയിരുന്നത്.

ഈ വിഷയത്തെക്കുറിച്ച് നിങ്ങൾക്ക് എന്താണ് പറയാനുള്ളത്? നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Truck driver's death linked to youth leader and sand mafia through audio messages; family demands Central probe.

#Kasargod #MurderMystery #AmitShah #CentralProbe #SandMafia #CrimeNews