കാസർകോട് ആരിക്കാടി ടോൾ ഗേറ്റ് വിവാദം; യുവാവിനെ വലിച്ചിഴച്ച് അറസ്റ്റ് ചെയ്ത കുമ്പള സി ഐയ്ക്ക് 10 ദിവസത്തെ നിർബന്ധിത അവധി

കാസർകോട്: (KasargodVartha) ആരിക്കാടി ടോൾ ഗേറ്റ് പരിസരത്ത് നടന്ന പൊലീസ് നടപടികൾ വിവാദമായതിനെ തുടർന്ന് കുമ്പള സി.ഐയ്ക്ക് 10 ദിവസത്തെ നിർബന്ധിത അവധി നിർദേശിച്ചു. ജനുവരി 28-നാണ് കേസിനാസ്പദമായ സംഭവം നടന്നത്. അന്വേഷണ വിധേയമായുള്ള തുടർനടപടികൾക്ക് മുൻപായാണ് സി.ഐയെ നിർബന്ധിത അവധിയിൽ പ്രവേശിപ്പിച്ചിരിക്കുന്നത്.

ടോൾ ഗേറ്റിലെ തർക്കം

മുളിയാർ ആലൂർ സ്വദേശിയായ മുഹമ്മദ് റിയാസ് കാറിൽ കുടുംബാംഗങ്ങളോടൊപ്പം ഉള്ളാൾ ദർഗയിൽ സിയാറത്ത് കഴിഞ്ഞ് മടങ്ങുന്നതിനിടെയാണ് സംഭവം നടന്നത്. റിയാസിനൊപ്പം പിതാവിന്റെ സഹോദരിയും അവരുടെ രണ്ട് പെൺമക്കളും ആറുമാസം പ്രായമുള്ള കുഞ്ഞും വാഹനത്തിലുണ്ടായിരുന്നു. ആരിക്കാടി ടോൾ ഗേറ്റിൽ ഫാസ്റ്റ് ടാഗിലൂടെ ടോൾ ഫീ അടച്ച ശേഷം ബാരിക്കേഡ് തുറന്നു. കാർ മുന്നോട്ടെടുത്തപ്പോൾ ബാരിക്കേഡ് കാറിന്റെ ഗ്ലാസിലേക്ക് വീഴുകയും, മുൻ സീറ്റിലിരുന്ന കുട്ടി ഭയന്ന് കരയാൻ തുടങ്ങുകയും ചെയ്തു.

കുടുംബത്തെ പെരുവഴിയിലാക്കി അറസ്റ്റ്

ഇത് സംബന്ധിച്ച് ടോൾ ഗേറ്റ് ജീവനക്കാരോട് വിശദീകരിക്കാൻ ശ്രമിക്കുന്നതിനിടെയാണ് ഗതാഗത കുരുക്ക് സൃഷ്ടിച്ചുവെന്നാരോപിച്ച് സി.ഐയുടെ നേതൃത്വത്തിൽ പൊലീസ് സ്ഥലത്തെത്തിയത്. തുടർന്ന് മുഹമ്മദ് റിയാസിനെ കാറിൽ നിന്ന് ബലമായി പിടിച്ചിറക്കി വലിച്ചിഴച്ച് കൊണ്ടുപോയി സ്റ്റേഷനിലെത്തിച്ച് അറസ്റ്റ് ചെയ്യുകയായിരുന്നു. വാഹനത്തിലുണ്ടായിരുന്ന ബന്ധുക്കളായ രണ്ട് പെൺകുട്ടികളും ആറുമാസം പ്രായമുള്ള കുഞ്ഞും ഏകദേശം ഒന്നര മണിക്കൂറോളം ടോൾ ഗേറ്റ് പരിസരത്ത് നിൽക്കേണ്ടിവന്നതായും പരാതിയിലുണ്ട്.

വ്യാജ എഫ് ഐ ആറും അന്വേഷണവും

സ്റ്റേഷനിൽ രജിസ്റ്റർ ചെയ്ത എഫ്.ഐ.ആറിൽ, 'അക്രമം നടത്തണമെന്ന ഉദ്ദേശത്തോടെ ടോൾ പരിസരത്ത് നിൽക്കുകയായിരുന്ന യുവാവിനെ അറസ്റ്റ് ചെയ്തു' എന്നായിരുന്നു രേഖപ്പെടുത്തിയിരുന്നത്. ഈ നടപടി സമൂഹമാധ്യമങ്ങളിലും പൊതുജനമധ്യത്തിലും ശക്തമായ വിമർശനങ്ങൾക്ക് ഇടയാക്കി. തുടർന്ന് റിയാസിന്റെ കുടുംബം മുഖ്യമന്ത്രിക്കും ഡി.ജി.പിക്കും പരാതി നൽകി.

പരാതിയുടെ അടിസ്ഥാനത്തിൽ ജില്ലാ പൊലീസ് മേധാവിയുടെ നിർദ്ദേശപ്രകാരം കാസർകോട് അഡീഷണൽ എസ്.പി അന്വേഷണം നടത്തി റിപ്പോർട്ട് ഉത്തരമേഖലാ ഐ.ജിക്ക് കൈമാറിയിട്ടുണ്ട്. ഈ അന്വേഷണ റിപ്പോർട്ടിൽ സി.ഐക്കെതിരെ വകുപ്പുതല നടപടി ശുപാർശ ചെയ്തതായാണ് സൂചന ലഭിക്കുന്നത്.

ഉന്നത പോലീസ് ഉദ്യോഗസ്ഥർക്ക് ലഭിച്ച പരാതിയുടെയും അന്വേഷണ റിപ്പോർട്ടുകളുടെയും അടിസ്ഥാനപ്പെടുത്തിയുള്ള ഈ വാർത്തയില്‍ നിങ്ങളുടെ അഭിപ്രായം പങ്കുവെക്കൂ. വാര്‍ത്ത ഷെയര്‍ ചെയ്യൂ. കാസർകോട്ടെ വാർത്തകളും പ്രാദേശിക വിവരങ്ങളും അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: The Kumbla Circle Inspector (CI) has been sent on a 10-day compulsory leave following the controversy over a police action at the Arikkady toll gate. The incident occurred on January 28, when a youth traveling with his family was allegedly dragged out of his car and arrested by the CI over a minor dispute with toll plaza staff. Based on a complaint regarding a fake FIR and police high-handedness, an investigation was conducted by the Kasaragod Additional SP.

#KasaragodNews #Kumbla #ArikkadyTollGate #KeralaPolice #Controversy #NewsUpdate #LocalNews