യുവാവിനെ കഴുത്തിൽ കത്തി കുത്തിയിറക്കി കൊലപ്പെടുത്താൻ ശ്രമിച്ച കേസ്: മുഖ്യപ്രതിക്ക് പിന്നാലെ 4 പേർ കൂടി അറസ്റ്റിൽ

കുമ്പള: (KasargodVartha) കുമ്പള പൊലീസ് സ്റ്റേഷൻ പരിധിയിലെ സീതാംഗോളിയിൽ യുവാവിനെ കഴുത്തിൽ കത്തി കുത്തിയിറക്കി വധിക്കാൻ ശ്രമിച്ച കേസിൽ മുഖ്യ പ്രതിക്ക് പിന്നാലെ നാല് പേരെ കൂടി പൊലീസ് അറസ്റ്റ് ചെയ്തു. കുമ്പള പൊലീസ് സ്റ്റേഷൻ പരിധിയിലെ മഹേഷ് (30), രജീഷ് (32), ഹരികൃഷ്ണൻ (31), അജിത് കുമാർ (28) എന്നിവരെയാണ് എ എസ് പി എം നന്ദഗോപന്റെ നിർദ്ദേശപ്രകാരം കുമ്പള പൊലീസ് ഇൻസ്‌പെക്ടർ പി കെ ജിജീഷിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

മുഖ്യപ്രതികളിലൊരാളായ ബദിയടുക്ക പൊലീസ് സ്റ്റേഷൻ പരിധിയിലെ പി അക്ഷയ് (30) നേരത്തെ തന്നെ അറസ്റ്റിലായിരുന്നു. നിരവധി കേസുകളിലെ പ്രതിയായ ഇയാൾ നിലവിൽ റിമാൻഡിലാണ്. ഞായറാഴ്ച രാത്രി ഏകദേശം 11.30 മണിയോടെയായിരുന്നു ബദിയഡുക്കയിലെ മത്സ്യവിൽപ്പനക്കാരനായ കുതിരപ്പാടിയിലെ അനിൽ കുമാർ (40) ആക്രമിക്കപ്പെട്ടത്.

സാമ്പത്തിക ഇടപാടുമായി ബന്ധപ്പെട്ട വിഷയത്തിൽ ഉണ്ടായ വാക്കുതർക്കത്തിനിടെ കഴുത്തിൽ കത്തി കുത്തിയിറക്കി കൊലപ്പെടുത്താൻ ശ്രമിച്ചുവെന്നാണ് പൊലീസ് കേസിൽ രേഖപ്പെടുത്തിയിരിക്കുന്നത്. ഗുരുതരമായി പരിക്കേറ്റ അനിൽ കുമാറിനെ ഉടൻതന്നെ ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ കഴുത്തിൽ തറച്ച കത്തി മംഗളൂറിലെ ആശുപത്രിയിൽ നടത്തിയ ശസ്ത്രക്രിയയിലൂടെ നീക്കം ചെയ്തു. നിലവിൽ അനിൽ കുമാർ അപകടനില തരണം ചെയ്തതായാണ് വിവരം.

ജില്ലാ പൊലീസ് മേധാവി ബി വി വിജയഭരത് റെഡ്ഡിയുടെ നിർദേശപ്രകാരം പ്രവർത്തിച്ച ഡാൻസാഫ് (DANSAF) സ്‌ക്വാഡ് അംഗങ്ങളായ എസ് ഐ കെ നാരായണൻ നായർ, എ എസ്‌ഐ ബി വി ഷാജു, സീനിയർ സിവിൽ പൊലീസ് ഓഫീസർ എൻ രാജേഷ്, സി പി ഒ ജെ സജീഷ് എന്നിവരായിരുന്നു പ്രതികളെ പിടികൂടാൻ നേതൃത്വം നൽകിയ സംഘത്തിൽ ഉണ്ടായിരുന്നത്. കേസിൽ ഇനി എട്ട് പ്രതികളെ കൂടി പിടികൂടാനുണ്ടെന്ന് അന്വേഷണ സംഘം അറിയിച്ചു. ഇവർക്ക് വേണ്ടിയുള്ള തിരച്ചിൽ ഊർജിതമാക്കിയിട്ടുണ്ട്.
 

സാമ്പത്തിക തർക്കങ്ങൾ ക്രിമിനൽ നടപടികളിലേക്ക് നീങ്ങുന്നതിനെക്കുറിച്ച് നിങ്ങളുടെ അഭിപ്രായം എന്താണ്? ഷെയർ ചെയ്യുക.

Article Summary: 4 more arrested in the attempted murder case of a fish vendor in Kumbla; 8 suspects are still absconding.

#KumblaCrime #AttemptedMurder #KeralaPolice #SeethamgoliAttack #DansafSquad #ArrestNews