ലഹരി മാഫിയക്കെതിരെ പിടിമുറുക്കി പോലീസ്

കാസർകോട്: (KasargodVartha) വിവിധ ഓപ്പറേഷൻ പദ്ധതികളിലൂടെ വ്യാപകമായ പരിശോധനകളും പിടികൂടലുകളും നടക്കുമ്പോഴും സംസ്ഥാനത്ത് ലഹരിക്കടത്തും ഉപയോഗവും വിൽപനയും വർധിച്ചു വരുന്ന സാഹചര്യത്തിൽ നടപടികൾ കൂടുതൽ ശക്തമാക്കാൻ പോലീസും എക്സൈസും തീരുമാനിച്ചു.

സംസ്ഥാനത്ത് ലഹരിയുടെ ഒഴുക്ക് വ്യാപകമായതോടെയാണ് പോലീസ് കർശന നിലപാട് സ്വീകരിക്കുന്നത്. കരുതൽ തടങ്കൽ ഉൾപ്പെടെയുള്ള നടപടികളാണ് ഇതിനകം പോലീസ് സ്വീകരിച്ചു വരുന്നത്. വിവിധ ജില്ലകളിൽ ഇത്തരം കേസുകളിൽപ്പെട്ടവരെ കരുതൽ തടങ്കലിലാക്കിയിട്ടുണ്ട്. ലഹരിക്കടത്ത് കേസിൽ ഉൾപ്പെട്ട പലരും ജയിലിൽ നിന്ന് ഇറങ്ങിയശേഷം വീണ്ടും കുറ്റകൃത്യങ്ങളിൽ ഏർപ്പെടുന്നത് തടയാനാണ് ഈ നീക്കം.

പോലീസും എക്സൈസും ചേർന്ന് വിവിധ ജില്ലകളിൽ ഇത്തരത്തിൽ പട്ടിക തയ്യാറാക്കി വരുന്നുണ്ട്. ഇവരെ കൂടുതൽ നിരീക്ഷിക്കാനാണ് പോലീസിന്റെ തീരുമാനം. പിടികൂടുന്നവരെ പിറ്റ് എൻ.ഡി.പി.എസ്. ആക്ട് പ്രകാരമാണ് കരുതൽ തടങ്കലിലാക്കുന്നത്. 

ഇവർക്ക് സാമ്പത്തിക സഹായം നൽകി സഹായിക്കുന്നവരെയും നിയമപ്രകാരം കരുതൽ തടങ്കലിൽ വെക്കാൻ ഈ നിയമം അനുശാസിക്കുന്നു. ആദ്യഘട്ടത്തിൽ ആറുമാസത്തേക്കായിരിക്കും തടങ്കൽ, ആവശ്യമെങ്കിൽ ഇത് രണ്ടുവർഷം വരെ ദീർഘിപ്പിക്കാൻ കഴിയും. ഇവരുടെ ബാങ്ക് അക്കൗണ്ട് ഉൾപ്പെടെ മരവിപ്പിക്കാനും ഈ നിയമം വഴി സാധിക്കും.

കണ്ണൂർ ജില്ലയിൽ ഇതിനകം രണ്ട് കേസുകൾ ഇത്തരത്തിൽ റിപ്പോർട്ട് ചെയ്തിട്ടുണ്ട്. ഇവരെ കരുതൽ തടങ്കലിലാക്കുകയും ചെയ്തു. തടങ്കലിലാക്കുന്നവരെ പൂജപ്പുര ജയിലിൽ പാർപ്പിക്കാനുള്ള സൗകര്യമാണ് ഒരുക്കിയിട്ടുള്ളത്.

ലഹരി മാഫിയക്കെതിരായ പോലീസിൻ്റെ ഈ പുതിയ നീക്കത്തെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത സുഹൃത്തുക്കളുമായി പങ്കിടൂ.

Article Summary: Police to use preventive detention against drug mafia.

#KeralaPolice #DrugMafia #LSD #PreventiveDetention #KeralaNews #AntiDrugCampaign