അനധികൃത ഫ്ലക്സ് ബോർഡുകൾ: പിഴ ഈടാക്കിയില്ലെങ്കിൽ സെക്രട്ടറിമാർ കുടുങ്ങും; ഹർജി വ്യാഴാഴ്ച ഹൈകോടതി പരിഗണിക്കും

കൊച്ചി: (KasargodVartha) പരിസ്ഥിതിയെ ഗുരുതരമായി ബാധിക്കുന്ന പ്ലാസ്റ്റിക്, ഫ്ലക്സുകൾക്ക് ഹൈകോടതി നിരോധനം ഏർപ്പെടുത്തി വർഷങ്ങൾ പിന്നിട്ടിട്ടും അധികൃതർ നടപടി സ്വീകരിക്കാത്തത് മനപ്പൂർവമാണോ അലംഭാവമാണോ എന്ന ചോദ്യമുയരുന്നു. അനധികൃത ബോർഡുകൾ സ്ഥാപിച്ചതിലെ പിഴത്തുക എവിടെയെന്ന് ഹൈകോടതി ആരാഞ്ഞതിന് പിന്നിൽ പഞ്ചായത്ത് സെക്രട്ടറിമാർ ഉത്തരവാദിത്തം നിറവേറ്റുന്നില്ലെന്നതിൻ്റെ സൂചനയാണ്. 

ഓഗസ്റ്റ് 21-നായിരുന്നു കോടതിയുടെ ഈ നിരീക്ഷണം. നിയമം ലംഘിച്ച് സ്ഥാപിക്കുന്നവരിൽ നിന്ന് 5,000 മുതൽ 10,000 രൂപ വരെ പിഴ ഈടാക്കാൻ കോടതി സർക്കാരിന് നിർദേശം നൽകിയിരുന്നു. എന്നിട്ടും അനധികൃത ഫ്ലക്സ് ബോർഡുകൾ ഇപ്പോഴും തെരുവോരങ്ങളിലുണ്ട്.

പിഴ ഈടാക്കുന്നതിൽ വീഴ്ച

ഒട്ടേറെ ബോർഡുകളും മറ്റും നീക്കിയിട്ടും തുച്ഛമായ തുക മാത്രമാണ് പിഴയിനത്തിൽ ലഭിച്ചതെന്ന് കോടതി വ്യക്തമാക്കിയിരുന്നു. പിഴ ഈടാക്കാനുള്ള ഇച്ഛാശക്തി ഇല്ലെന്നാണ് ഇത് കാണിക്കുന്നത്. പിഴത്തുക പിരിച്ചില്ലെങ്കിൽ തദ്ദേശ സ്ഥാപന സെക്രട്ടറിമാർ വ്യക്തിപരമായി ഉത്തരവാദികളായിരിക്കുമെന്ന് നേരത്തെ കോടതി ഉത്തരവിട്ടതുമാണ്. തിരുവനന്തപുരം, കൊല്ലം കോർപറേഷനുകൾക്കെതിരെയുള്ള ഹർജിയിലാണ് ഹൈകോടതിയുടെ ഈ നിർണായക നിരീക്ഷണം. ഈ കേസ് വ്യാഴാഴ്ച (സെപ്റ്റംബർ 3) കോടതി വീണ്ടും പരിഗണിക്കും.

പരിസ്ഥിതിക്കും ആരോഗ്യത്തിനും ഭീഷണി

ഹൈകോടതി നിരോധനത്തിന് പിന്നിൽ പരിസ്ഥിതിയെ ബാധിക്കുന്ന ഒട്ടനവധി വിഷയങ്ങളുണ്ട്. പ്ലാസ്റ്റിക്കുകളും ഫ്ലക്സുകളും ചിലവ് കുറഞ്ഞതാണെന്നും ഉപയോഗിക്കാൻ എളുപ്പമാണെന്നും പറഞ്ഞാണ് പലരും ഇത് കെട്ടുന്നത്. ഇത് പ്ലാസ്റ്റിക് മലിനീകരണം വർധിച്ചുവരാൻ കാരണമായിട്ടുണ്ടെന്ന തിരിച്ചറിവ് ഇവ സ്ഥാപിക്കുന്നവർക്കില്ല. ഫ്ലക്സുകൾ വലിച്ചുകീറി ഭൂമിയിലും ജലാശയങ്ങളിലും തള്ളുമ്പോൾ ഉണ്ടാകുന്നത് ജലജീവികളുടെ ജീവന് ഭീഷണിയാവുകയും ഒഴുക്ക് തടസ്സപ്പെടുകയും ചെയ്യുന്നു. 

ചിലർ ഇതിനെ കത്തിച്ചുകളയാറുമുണ്ട്. ഇതിലെ മാരക വിഷവാതകങ്ങൾ വായുവിൽ കലരുന്നത് കാൻസർ, ശ്വാസകോശ രോഗങ്ങൾ, ചർമ രോഗങ്ങൾ എന്നിവയ്ക്ക് കാരണമാകുന്നു. ഫ്ലക്സ് പ്രിൻ്റ് ചെയ്യാൻ ഉപയോഗിക്കുന്ന മഷികളിൽ പോലും മാരക ലോഹങ്ങൾ അടങ്ങിയിട്ടുണ്ടെന്ന് ശാസ്ത്രീയ പഠനങ്ങളിൽ തെളിഞ്ഞതുമാണ്. പ്രകൃതിയെയും ജീവജാലങ്ങളെയും കൊന്നൊടുക്കുന്ന ഇത്തരം പ്ലാസ്റ്റിക് ഉപയോഗങ്ങളെയാണ് ഹൈകോടതി കർശനമായി വിലക്കിയത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The Kerala High Court will hear the petition against Thiruvananthapuram and Kollam corporations on Thursday, September 3, 2026, warning that local body secretaries will be held personally liable for failing to collect fines ranging from Rs 5,000 to 10,000 for illegal flex boards.

#KasargodVartha #KeralaHighCourt #IllegalFlexBoards #PlasticPollution #KeralaNews #MalayalamNews #EnvironmentalHazard #LocalSelfGovernment #AparnaNews