ഗൾഫ് മോഹവുമായി ടിക്കറ്റെടുക്കാൻ പോയ യുവാവ് കുടുങ്ങി: പോലീസുമായി തർക്കം, കേസ്

കാസർകോട്: (KasargodVartha) ഗൾഫിലേക്ക് പോകാൻ ടിക്കറ്റെടുക്കാൻ കാസർകോട് നഗരത്തിലെത്തിയ 19-കാരൻ പോലീസുമായി തർക്കത്തിലായ സംഭവത്തിൽ പോലീസ് കേസെടുത്തു. കാസർകോട് ടൗൺ പോലീസ് സ്റ്റേഷൻ പരിധിയിലെ മുഹമ്മദ് അയനെതിരെയാണ് കേസെടുത്തിരിക്കുന്നത്. 

വെള്ളിയാഴ്ച രാവിലെ 11:50-ഓടെ കാസർകോട് പഴയ പ്രസ് ക്ലബ് ജങ്ഷന് സമീപം എൽഐസി ഓഫീസിനും ജ്വല്ലറിക്കും ഇടയിലായിരുന്നു സംഭവം.

പൊതുജനങ്ങൾക്കും മറ്റ് വാഹനങ്ങൾക്കും തടസ്സമുണ്ടാക്കുന്ന രീതിയിൽ വാഹനം പാർക്ക് ചെയ്തത് കണ്ടതിനെ തുടർന്ന് പെട്രോളിങ് ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥർ വാഹനം മാറ്റാൻ ആവശ്യപ്പെട്ടു. എന്നാൽ, യുവാവ് പോലീസുമായി തർക്കത്തിലേർപ്പെടുകയും ഔദ്യോഗിക കൃത്യനിർവഹണം തടസ്സപ്പെടുത്തുകയും ചെയ്തുവെന്ന് പരാതിയിൽ പറയുന്നു. 

വാഹനം പാർക്ക് ചെയ്തതിൻ്റെ കാരണം ചോദിച്ചപ്പോൾ, 'നീ എനിക്ക് പാർക്ക് ചെയ്യാൻ റോഡ് ഉണ്ടാക്കിത്താടാ', എന്ന് പറഞ്ഞ് വെല്ലുവിളിച്ചതായും ഗൾഫിലേക്ക് ടിക്കറ്റെടുക്കാൻ വന്നതിനാൽ 15 മിനിറ്റേ ആയിട്ടുള്ളൂ കാർ ഇവിടെ വെച്ചിട്ടെന്നും യുവാവ് പോലീസിനോട് പറഞ്ഞു.

തുടർന്ന് യുവാവിനെ അറസ്റ്റ് ചെയ്യുകയും വാഹനം കസ്റ്റഡിയിലെടുക്കുകയും ചെയ്തു. പ്രതിയെ പോലീസ് സ്റ്റേഷനിലേക്ക് കൊണ്ടുപോകുന്ന വഴിയിൽ, 'ഞാൻ നിന്നെ സ്റ്റേഷനിൽ കൊണ്ടുപോകില്ലെന്നും എൻ്റെ വീട്ടിൽ കൊണ്ടുപോകുന്നത് നിനക്ക് കാണിച്ചുതരാം' എന്നും പറഞ്ഞ് ഭീഷണിപ്പെടുത്തുകയും അസഭ്യം പറയുകയും ചെയ്തതായി എഫ്ഐആറിൽ പറയുന്നു. ബലം പ്രയോഗിച്ചാണ് ഉച്ചയ്ക്ക് 12:30-ഓടെ പ്രതിയെ പോലീസ് സ്റ്റേഷനിലെത്തിച്ചത്.

പൊതുഗതാഗതം തടസ്സപ്പെടുത്തിയതിനും ഔദ്യോഗിക കൃത്യനിർവഹണം തടസ്സപ്പെടുത്തി അസഭ്യം പറഞ്ഞതിനും ഭാരതീയ ന്യായ സംഹിത, 2023-ലെ 285-ാം വകുപ്പും കേരള പോലീസ് നിയമം, 2011-ലെ 117(e) വകുപ്പും പ്രകാരമാണ് കേസെടുത്തിരിക്കുന്നത്. സബ് ഇൻസ്പെക്ടർ എൻ. അൻസാർ ആണ് പരാതിക്കാരൻ. സബ് ഇൻസ്പെക്ടർ കെ. രാജീവനാണ് കേസ് അന്വേഷിക്കുന്നത്.

ഇത്തരം സംഭവങ്ങളെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യാനും ഈ വാർത്ത ഷെയർ ചെയ്യാനും മറക്കരുത്.

Article Summary: 19-year-old arrested in Kasaragod for arguing with police over illegal parking.

#Kasaragod #KeralaPolice #TrafficViolation #KeralaNews #PoliceCase #LegalAction